Read Northwest Gbaya GBOA-A 12 Bible Online

GBOA-A 12 - Northwest Gbaya bible

GBOA-A 12

¹GASA WAN tɔ̧ɔ̧ ha̧ Moisɛ in Arɔŋ sɛn nú Egiptɛ:

²«Fio-zɛ'ɛ tɛ duk nɛ kuti fio-zɛ k’ɛ́nɛ́. Ɛnɛ tɛ ku̧ naŋ tɔra pɛ nɛ a̧.

³Ɛ̀nɛ̀ nɛ́ɛ̀ tɔ̧ ha̧ zuduk be Israɛl lɛŋ nde: Ŋgimbi nɛ fio-zɛ‘i hɔɔ ɔ zɛ ɓu kaɗi, kóó o nde a̧ ba mɔ-dai kpɔk sɛn nú-gara kɔ‘i, kóó sɛn nutua kɔ‘i.

⁴Ɓɛɛ kà'ì nɛ́ dɔka sɛn nutua kɔ‘i wen nyɔŋa saɗi'i na, wi tɛ kpa ŋma sɛm kɔ‘i nɛ‘i ɔ katɛ ŋmaa in a̧ mɛ nyɔŋ saɗi'i nyɛm nɛ ɗoŋ dɔka bíí. Wi tɛ hok nɛ saɗi nyɛm nɛ dɔka bíí.

⁵Saɗi'i tɛ duk nɛ de wiwii-a nɛ a̧a̧ nɛ pɛ kpɔk ɓɛɛ. Ɛnɛ tɛ hɔk a̧ mgbara o sami, kóó mgbara o gbadua.

⁶Ɛnɛ tɛ e a̧ hegɔ hɔ tɛ ɓu-zua-naar zɛ tɛ fio-zɛ‘i, ɓɛɛ zuduk be Israɛl tɛ mɔi̧ gɔn o saɗi nɔ‘i tɛ ŋgimbi yee-wese.

⁷Wa tɛ ba tɔk-aa sɔ̧ ká̧ nu tua nɛ mgbɔɔr, nɛ mgbɔɔr in zu-a mbɛt sɛn fara nɛ wa tɛ nyɔŋ saɗi'i sɛnɛ.

⁸Wa tɛ nyɔŋ nɛ kpoo mɛ zɛ‘i. Wa a̧ dɔ dɔɔ nyɔŋ nɛ brɛt nɛ̀ hao bó sɛnɛ na in nɛ paŋ wa̧a̧-kpoo.

⁹K’ɛ́nɛ́ nyɔŋ nɛ̀ tɔra in ea-a tɛ wee na mbɛt, ɓɛɛ ɛ̀nɛ̀ dɔ́ dɔɔ nyɔŋ nɛnɛ. Ɛ̀nɛ̀ nyɔ́ŋ nɛ oi zu-a, mbayo-a in o mɔɔ-kɔ̧-zaŋ-aa mbɛt.

¹⁰Ɛnɛ beka e kpoo-aa ŋgɔn na; mɔ nɛ tɛ ɔ ŋgɔn, ɛ̀nɛ̀ dɔ́ a nu mɛ tutuyɛ.

¹¹Yuwar nyɔŋa-a n’ɛnɛ tɛ nyɔŋ‘i nɛ mɔ'ɔ: Ɛnɛ tɛ hɛr zaŋ‘nɛ́ nɛ kanda, ɛnɛ tɛ duk nɛ̀ ndárà naŋ‘nɛ́, in nɛ dɔra sɛn er'nɛ́. Ɛnɛ tɛ nyɔŋ mɔ‘i nɛ haya-a. Mɔ‘i nɛ gbaŋa Paska ko GASA WAN.

¹²«Mɛ zɛ‘i, mi tɛ yar sɛn nú Egiptɛ lɛŋ mɛ gbɛ o kaya-bem, in o kaya mɔ-dai, ɓɛɛ mi gɔna kita zu o géé-sɔ̧ Egiptɛ lɛŋ; nɛ́ mi GASA WAN a̧ tɔ̧.

¹³Nɛ́ tɔk a̧ tɛ duk nɛ mɔɔ-usi-mɔ sɛn zu nú tua n’ɛnɛ ya sɛnɛ. Ŋgimbi n'am tɛ zɔk tɔk'i, mi tɛ yak, ɓɛɛ ŋgamɔ beka kpa'nɛ́ ŋgimbi n'am tɛ nɛ mɛ gbɛ nɛ o be Egiptɛ na.

¹⁴Wese'i, tɛ duk nɛ gasa wese k’ɛ́nɛ́; ɛnɛ tɛ de gbaŋa'i gasi nɛ GASA WAN pɛ nɛ pɛ! Gbaŋa'i tɛ duk nɛ heembea n’ɛnɛ beka gbin na.»

¹⁵«Ɛnɛ tɛ nyɔŋ nɛ́ brɛt nɛ̀ hao bó sɛnɛ na sɛn tɛ ɔɔ-zɛ mɔɔrɔ-ɗoŋ-yiitoo. Sɛn tɛ kuti wese, ɛnɛ tɛ kai hao yinɛ kɔ̧ tua k’ɛ́nɛ́; ɓɛɛ kóó o nde nɛ tɛ nyɔŋ brɛt nɛ hao a̧a̧ sɛnɛ tɛ kuti wese hɔ tɛ ɔɔ-zɛ mɔɔrɔ-ɗoŋ-yiitoo'i, wa tɛ fo a̧ yinɛ mgbara o be Israɛl.

¹⁶Sɛn tɛ kuti wese, ɛnɛ tɛ mɔi̧ mɛ gasi Sɔ̧, in sɛn tɛ mɔɔrɔ-ɗoŋ-yiitoo wese, ɛnɛ tɛ de kale-a hegɔ mbɛt. Wi beka de ŋma tom sɛn tɛ o wese nɔ‘i na; ɓɛɛ mɔ nɛ‘i tɛ de nɛ́ gii nyɔŋmɔ kɔ‘i ɓɛɛ.

¹⁷Ɛnɛ tɛ de gbaŋa brɛt nɛ̀ hao bó sɛnɛ na ɓɔnsɛnɛ, wen nɛ́ wese'i a̧‘m kaia nɛ dukbíí k’ɛ́nɛ́ gbonɛ nɛ nú Egiptɛ. Ɛnɛ tɛ de gbaŋa wese'i pɛ nɛ pɛ; gbaŋa'i tɛ duk nɛ́ heembea nɛ‘i beka gbin na.

¹⁸Sɛn tɛ kuti fio-zɛ, tɛ ɓu-zua-naar ɔɔ-zɛ, mɛ ga̧a̧mɔ hɔ nɛnɛ tɛ ɓu-yiitoo-zua-kpɔk ɔɔ-zɛ mɛ ga̧a̧mɔ, ɛnɛ tɛ nyɔŋ nɛ́ brɛt nɛ̀ hao bó sɛnɛ na.

¹⁹Zaŋ zɛ mɔɔrɔ-ɗoŋ-yiitoo, wi beka kpa hao sɛn kɔ̧ tua k’ɛ́nɛ́ na. Ɓɛɛ kóó o nde nɛ tɛ nyɔŋ brɛt nɛ hao a̧a̧ sɛnɛ, kóó wi’ɛi nɛ gɛnɛ, kóó a̧ nɛ be-nu mbɛt, wi tɛ fo a̧ yinɛ mgbara o be Israɛl.

²⁰Fara lɛŋ n’ɛnɛ tɛ duk sɛnɛ, ɛnɛ beka nyɔŋ brɛt nɛ hao a̧a̧ sɛnɛ na; ɓɛɛ ɛnɛ tɛ nyɔŋ nɛ brɛt nɛ̀ hao bó sɛnɛ na.»

²¹Moisɛ saa o kuti bíí Israɛl lɛŋ, ɓɛɛ tɔ̧ ha̧ wa: «Ɛ̀nɛ̀ nɛ́ɛ̀ kai o mɔ-dai wen o bíí nú-gara k’ɛ́nɛ́, wen gbɛa-a wese gbaŋa Paska.

²²Ɛnɛ tɛ ba wa̧a̧[5] pi̧ ɗɔɔ tɔk nɛ a̧a̧ sɛn kɔ̧ kpánà, ɓɛɛ ɛnɛ tɛ ba wa̧a̧‘i nɛ oi tɔk'i sɔ̧ nɛ te-ka̧-nú tua nɛ mgbɔɔr nɛ mgbɔɔr in nɛ zu nu tua mbɛt. Ká ŋma bíí mgbara'nɛ́ kpɔk gbo kɔ̧ tua kɔ‘i na hɔ sa̧a̧mɔ mɛ tutuyɛ.

²³Hegɔ, ŋgimbi nɛ GASA WAN be tɛ̀ɛ́ yar nɛ nú Egiptɛ wen dee ŋgamɔ, a̧ tɛ zɔk tɔk sɛn zu nu tua, in tɛ o te-ka̧-nú tua; a̧ tɛ ɓir nɛ nú tua'i yak, ɓɛɛ a̧ beka e ha̧ ŋgamɔ mɛ ye tua k’ɛ́nɛ́ mɛ gbɛ‘nɛ́ na.

²⁴Ɛnɛ tɛ kasi o mɔɔ nɔ‘i lɛŋ, wen nɛ́ heembea k’ɛ́nɛ́ in o bezaŋ‘nɛ́ kpoo nɛ kpoo.

²⁵Ŋgimbi n’ɛnɛ tɛ ye nu nɛ GASA WAN tɛ ha̧ h’ɛ́nɛ́ nyɛm nɛ ɗoŋ ha̧a̧nú kɔ̧-a̧, ɛnɛ tɛ kasi yuwar dee do-mɔ‘i.

²⁶Ɓɛɛ ŋgimbi nɛ o bezaŋ‘nɛ́ be tɛ̀ɛ́ ak'nɛ́ nde: Do-mɔ n’ɛnɛ de’ɛ nɛ ge?

²⁷Ɛnɛ tɛ kifi nú ha̧ wa'e: Mɛ̀ nɛ́ ɗafa-sɔ̧ Paska ɛ̀ɛ̀ de ha̧ GASA WAN nɛ ɓira so yak nu tua ko o be Israɛl sɛn Egiptɛ, ká a̧ gbɛ nɛ o be Egiptɛ, ɓɛɛ a̧ gbo ɛɛ yínɛ́'ɛ.» Ŋgimbi'i, dukbíí gbɛɛ zugur nu, ɓɛɛ wa gu nu.

²⁸O be Israɛl pɛsa ɓɛɛ wa ku̧ naŋ dee mɔ‘i. Wa dee mɔ nyɛm nɛ ɗoŋ mɔ nɛ GASA WAN tɔ̧a̧ ha̧ Moisɛ in Arɔŋ.

²⁹Mɛ biŋgi-zɛ, GASA WAN gbɛɛ o kaya-bem lɛŋ sɛn nú Egiptɛ; ku̧u̧naŋ-a nɛ kaya-bem ko wannu Egiptɛ nɛ tɛ̀ɛ́ bà wan oi dáà kɔ‘i hɔ nɛnɛ tɛ kaya-bem ko bara sɛn kɔ̧ zɔɓɔ mɛ, gu nɛ o kaya mɔ-dai lɛŋ.

³⁰Wannu Egiptɛ kura mɛ biŋgi-zɛ‘i in o wi-de-tom kɔ‘i, gu nɛ o bíí Egiptɛ lɛŋ, wa kura gai nɛ mɔ-fio wen ŋma tua nú Egiptɛ nɛ fio bo sɛnɛ na bo na.

³¹Wannu Egiptɛ toma sa Moisɛ in Arɔŋ tɛnɛ mɛ zɛ‘i, ɓɛɛ tɔ̧ ha̧ wa: «Ɛnɛ, in o bezaŋ Israɛl, ɛ̀nɛ̀ kúr, ɛ̀nɛ̀ gbó sɛn mgbara dukbíí kɔ‘m. Ɛ̀nɛ̀ nɛ́, ɓɛɛ ɛ̀nɛ̀ gásí GASA WAN hee mɔ'ɔ n’ɛnɛ tɔ̧ɔ̧ ga.

³²Ɛ̀nɛ̀ káí o gasa mɔ-dai k’ɛ́nɛ́ in o geɗek-a, ɛ̀nɛ̀ yák hee mɔ'ɔ n’ɛnɛ kɔ̧ɔ̧ so ga, ɓɛɛ ɛ̀nɛ̀ tók de yoŋgo ha̧‘m mbɛt.»

³³O be Egiptɛ dee ha̧ o bezaŋ Israɛl mɛ yak mgbara wa nɛ haya-a, wen o be Egiptɛ taa'e, wi tɛ kum lɛŋ!

³⁴O bíí kaia mbɔɗa brɛt kɔ‘i, nɛti ha̧ hao mɛ kur, wa hɛra nɛ̀ o gba laa kɔ-wa, ba e zu kóŋgó-ɓaa-wa.

³⁵O be Israɛl dee kana mɔ hee mɔ'ɔ nɛ Moisɛ tɔ̧ɔ̧ so ha̧ wa ga; wa aka o mɔ nɛ‘i dee nɛ bu-mbɔi, in nɛ‘i dee nɛ lɔr, ká bá nɛ̀ o gasa laa er o be Egiptɛ mbɛt.

³⁶GASA WAN ha̧a̧ desee ha̧ o be Egiptɛ mɛ ha̧ mɔɔ nɔ‘i ha̧ o be Israɛl; nɛ́ hegɔ a̧ wa kaia nɛ mɔ lɛŋ er o be Egiptɛ.

³⁷O be Israɛl kura nɛ Ramsɛs si Sukot, wa yaa so hee bíí booro-gɔmŋmaa-mɔɔrɔ-ɗoŋ-kpɔk ga; wi tɔr o okoo in o obem na.

³⁸O ŋma dɔka gee bíí kura in wa, in geɗek mɔ-dai gu nɛ o gasa-a mbɛt nɛ dɔka-a nyɛmna.

³⁹Wa dɔɔ o mbɔɗa brɛt kɔ-wa nɛ wa kaia so tɛnɛ nɛ Egiptɛ, ɓɛɛ wa de nɛ makala nɛ hao bo sɛnɛ na, wen mbɔɗa-a'i kur so na. O be Egiptɛ ndaka wa sɛn Egiptɛ nɛ haya-a, ɓɛɛ wa kpa ŋgimbi wen kaia nyɔŋmɔ na.

⁴⁰O be Israɛl duka sɛn Egiptɛ sɛn tɛ pɛ 430.

⁴¹Ɓɛɛ mɛ nɛ ŋgimbi nɛ pɛ gɔmŋmaa-naar-nɛ-ɓu-taar nɔ‘i dama nɛnɛ, a̧ dukbíí ko GASA WAN lɛŋ gboo nɛnɛ sɛn nú Egiptɛ yak.

⁴²Mɛ zɛ‘i, GASA WAN ɔ ya na; ŋgimbi n'aa gboo nɛ o be Israɛl sɛn nú Egiptɛ, zɛ‘i tɛ duk nɛ ko GASA WAN nɛ o be Israɛl beka ɔ ya sɛnɛ na pɛ nɛ pɛ.

⁴³GASA WAN tɔ̧ɔ̧ ha̧ Moisɛ in Arɔŋ: «Yuwar ɗafa gbaŋa Paska nɛ mɔ'ɔ: ŋma gɛnɛ, kóó kpɔk beka nyɔŋ na.

⁴⁴War ko o wi-de-tom lɛŋ nɛ‘i hi̧fa hi̧fi nɛ sede, a'i gɔn bɔr-wa kaɗi sɛka wa nyɔŋa.

⁴⁵Kóó nɛ gɛnɛ, kóó nɛ wi-de-tom nɛ‘i yoɓi nɛ̀ sede beka nyɔŋ na.

⁴⁶Wi tɛ nyɔŋ mɔ‘i sɛn kɔ̧ kpɔk tua, ŋma bíí beka ba mur-aa gbonɛ kɔ̧ tua'i na. Wi beka gbin gba̧a̧-a̧ na mbɛt.

⁴⁷O tugun be Israɛl lɛŋ tɛ de gbaŋa'i.

⁴⁸Kà ŋma gɛnɛ nɛ pia pii mɛ de ye sɛn nú Israɛl, ɓɛɛ kà a̧ nɛ kɔ̧ɔ̧ mɛ de gbaŋa Paska ko GASA WAN, o wiwii lɛŋ sɛn tɛ kɔ̧-a̧ tɛ gɔn bɔr sɛ; hegɔ a̧ nyɛma mɛ de gbaŋa'i. A̧ tɛ duk hee be-nu ga. Ŋma bíí nɛ gɔn bɔr na beka nyɔŋ na.

⁴⁹Heembea'i bo nɛ wen gɛnɛ nɛ a̧a̧ mgbara'nɛ́ ɓɛɛ na, nɛ wen be-nu mbɛt.»

⁵⁰O be Israɛl lɛŋ dee hee mɔ‘i ga. Wa dee mɔ hee mɔ'ɔ nɛ GASA WAN tɔ̧ɔ̧ so ha̧ Moisɛ in Arɔŋ ga.

⁵¹Mɛ̀ nɛ́ wese'i a̧ GASA WAN gboo nɛ o be Israɛl nú Egiptɛ nɛ yuwar-a.