Read Northwest Gbaya GBOA-A 26 Bible Online

GBOA-A 26 - Northwest Gbaya bible

GBOA-A 26

¹«War ko sa̧a̧-fara, mɛ tɛ de a̧ nɛ yɛm-yɛm toka-zɔ̧-laa zu ŋmaa ɓu nɛ tu̧-a̧, nɛ gbɛ̧-a̧ in gbɛ̧-a̧ zóŋ-zóŋ. Mɛ̀ dé dap laa'i nɛ o keribim nɛ‘i toka nɛ de-a.

²Dura toka-zɔ̧-laa kpɔk nɛ mɛtrɛ ɓu-zua-naar, ɓɛɛ pɛsa-a tɛ duk nɛ mɛtrɛ yiitoo; o zɔ̧ laa lɛŋ tɛ ba nɛ kpɔk dura-a in pɛsa-a nyɛm ŋmaa in oi-aa lɛŋ.

³Mɛ tɛ ye o zɔ̧ laa mɔɔrɔ nu ŋmaa, ɓɛɛ mɛ yee oi-aa mɔɔrɔ nu ŋmaa mbɛt.

⁴Mɛ tɛ kpo be bolo-a nɛ tu̧ nyak e nu kuti toka-zɔ̧-laa; mɛ tɛ de kalemɔ‘i nu ɓii gasa laa mbɛt.

⁵Mɛ tɛ gbɛ nu kuti toka-zɔ̧-laa nɔ‘i nɛ mɛ yee nú-wa'i nɛ bolo-a ɓu-mɔɔrɔ ɓu-mɔɔrɔ; o bolo-a tɛ ya nyɛm ŋmaa.

⁶Mɛ tɛ de o boi-kɔk-mɔ ɓu-mɔɔrɔ nɛ lɔr, wen yee o toka-zɔ̧-laa nɔ‘i ndaɗi nɛ ŋmaa, ha̧ mɔ lɛŋ mɛ duk nɛ kpɔk.

⁷Mɛ tɛ de toka-zɔ̧-laa nɛ buma gbadua ha̧ mɛ duk nɛ tu̧-a̧ zu sa̧a̧-fara. Mɛ tɛ de wa hegɔ ɓu-zua-kpɔk.

⁸Zi̧a̧-a̧ kpɔk tɛ duk nɛ mɛtrɛ ɓu-zua-mɔɔrɔ, ɓɛɛ pɛsa-a tɛ duk nɛ mɛtrɛ yiitoo. O toka-zɔ̧-laa nɔ‘i ɓu-zua-yiitoo tɛ ba nɛ kpɔk dura-a in pɛsa-a ko kuti-a.

⁹Mɛ tɛ ye toka-zɔ̧-laa mɔɔrɔ nɛtɛ, o ɛ̧ɛ̧ nɔ'ɔ mɔɔrɔ-ɗoŋ-kpɔk’ɛ nɛtɛ, ɓɛɛ mɛ goia mɔɔrɔ-ɗoŋ-kpɔk toka-zɔ̧-laa si nu tua.

¹⁰«Mɛ tɛ kpo bolo ɓu-mɔɔrɔ e nu o sɔŋkur toka-zɔ̧-laa nɛ mɛ mɔi̧a e kpɔk'i, ɓɛɛ mɛ dee mbe-a ɓu-mɔɔrɔ e nu ɓii mɔi̧a toka-zɔ̧-laa.

¹¹Mɛ tɛ de boi-kɔk-mɔ ɓu-mɔɔrɔ nɛ ndɛrɛ, ɓɛɛ mɛ aa wa kɔ̧ o bolo nɔ‘i ha̧ tua-laa mɛ duk in a̧ kpɔk.

¹²Hee mɔ'ɔ nɛ oi nu toka-zɔ̧-laa tɛ gan tua-laa ga, oi reeta nu toka-zɔ̧-laa tɛ tik si ɗoŋ sa̧a̧-fara.

¹³Nyɛm nɛ ɗoŋ zi̧a̧ toka-zɔ̧-laa, ndɔŋ nú-a hee reeta mɛtrɛ ga tɛ duk nɛ ká̧ a̧ lɛŋ gee, wen kpee ká̧ sa̧a̧-fara zik ɗoŋ-aa lɛŋ.

¹⁴Mɛ tɛ de ndàrá vala sami nɛ wa gbɛ̧ɛ̧ gbɛ̧ɛ̧, in mɔɔ-gu-zu a̧ nɛ wa dee nɛ ŋga ndàrá.

¹⁵«Mɛ tɛ de gaŋgala tua sa̧a̧-fara nɛ o te akasia nɛ mɛ tɛ ba e ŋgɔn.

¹⁶Dura gaŋgala tua sa̧a̧-fara kpɔk tɛ duk nɛ mɛtrɛ mɔɔrɔ, ɓɛɛ pɛsa-a tɛ duk nɛ reeta mɛtrɛ nɛ ŋma mɔ zu-a.

¹⁷Mɛ tɛ e naŋ-a yiitoo yiitoo wen ha̧ wa mɛ ya nyɛm ŋmaa. Mɛ tɛ de kpɔk mɔ‘i in o dɔka gaŋgala tua sa̧a̧-fara lɛŋ.

¹⁸Mɛ tɛ de ha̧ o gaŋgala-tua ɓu-yiitoo mɛ zɔk mɔ si ká̧-zan-mɛ́-ɗɔɔ nɛ war Nɛgɛb.

¹⁹Mɛ tɛ de gun-aa ɓu-naar nɛ bu-mbɔi, gun-aa yiitoo yiitoo tɛ ya ɗɔɔ gaŋgala-tua kpɔk kpɔk, dam nɛ naŋ-wa.

²⁰Mɛ tɛ de gaŋgala-tua ɓu-yiitoo a nɛ war mgbɔɔr si ká̧-zan-mɛ́-ŋgɔn nɛ war yee-wese.

²¹O gun-aa ɓu-naar nɛ mɛ dee nɛ bu-mbɔi tɛ ya yiitoo yiitoo ɗɔɔ gaŋgala-tua kpɔk kpɔk.

²²Mɛ tɛ de gaŋgala-tua mɔɔrɔ-ɗoŋ-kpɔk a nɛ ndaa tua nɛ zɔk mɔ si yee-wese.

²³Mɛ tɛ de gaŋgala-tua yiitoo yiitoo wen o mgbii tua.

²⁴Wa tɛ ya nyɛi̧ nɛ ŋmaa nɛ gun-aa, ɓɛɛ zu-wa yee ŋmaa lɛŋ tɛ kuti koe wele. Nɛ kpɔk kalemɔ wen wa lɛŋ yiitoo yiitoo.

²⁵O te-mgbii-tua tɛ ya nɛ mɔɔrɔ-ɗoŋ-taar, in o gun-aa ɓu-zua-mɔɔrɔ-ɗoŋ-kpɔk nɛ‘i dee nɛ bu-mbɔi; gun-aa tɛ ya yiitoo yiitoo ɗɔɔ gaŋgala-tua kpɔk hegɔ yak nɛnɛ.

²⁶«Mɛ tɛ de o be-saŋ nɛ te akasia, o be-saŋ mɔɔrɔ wen gita-a zu o gaŋgala-tua sa̧a̧-fara nɛ mgbɔɔr,

²⁷mɔɔrɔ wen gita-a zu o gaŋgala ndaa tua nɛ mgbɔɔr mbɛt si war gba-tɔp.

²⁸Wi tɛ giti ŋma gbaŋ see-a nɛ tɛ dor o gaŋgala lɛŋ hɔ sɔŋkur-aa.

²⁹Mɛ tɛ sɔ̧ lɔr ɗoŋ o gaŋgala nɔ‘i, ɓɛɛ mɛ dee o koe nɛ gaŋgala tɛ ye sɛnɛ‘i nɛ lɔr; ɓɛɛ mɛ tɛ sɔ̧ lɔr tɛ o gaŋgala nɔ‘i mbɛt.

³⁰Hegɔ, mɛ tɛ de sa̧a̧-fara nyɛm nɛ ɗoŋ mɔ n'am usa ha̧ mɛ sɛn zu kaya.

³¹«Mɛ tɛ de babir nɛ toka tu̧-zɔ̧-laa, in toka gbɛ̧ zɔ̧-laa, in toka gbɛ̧ zɔ̧-laa zóŋ-zóŋ, ká bá nɛ̀ yɛm-yɛm laa; wi tɛ gɔn dap keribim a sɛnɛ nɛ de-a.

³²Mɛ tɛ ga̧i̧ wa tɛ o mbiŋ-tua naar nɛ‘i dee nɛ te akasia, ɓɛɛ nɛ‘i sɔ̧ɔ̧ lɔr sɛnɛ. O boi-kɔk-mɔ nɛ‘i dee nɛ lɔr tɛ ya zu o mbiŋ tua nɔ‘i, ɓɛɛ o mbiŋ yaa kɔ‘i zu naŋ o wan nɛ‘i dee nɛ bu-mbɔi.

³³Mɛ tɛ ga̧i̧ babir-laa tɛ o boi-kɔk-mɔ, ɓɛɛ mɛ baa Kuɓa nɔɔ-tɔk e ɗoŋ-aa. Babir-laa'i tɛ kɛ̧ mgbara sa̧a̧-fara in fara nɛ ɔ sa̧a̧ nyɛmna.

³⁴Nɛ́ sɛn fara nɛ ɔ sa̧a̧ nyɛmna a̧ mɛ tɛ ba mɔɔ-kpe-nú Kuɓa nɔɔ-tɔk gu nɛ nú-a.

³⁵Mɛ tɛ gɔ taŋe-nyɔŋ-mɔ e kɔ̧ sa̧a̧-fara ti babir-laa nɛ war ká̧-zan-mɛ́-ŋgɔn, ɓɛɛ mɛ baa dek-e-wee e ti taŋe-nyɔŋ-mɔ nɛ war ká̧-zan-mɛ́-ɗɔɔ.

³⁶«Mɛ tɛ de laa-kpe-nú tua nɛ toka tu̧-zɔ̧-laa, nɛ toka gbɛ̧ zɔ̧-laa, nɛ toka gbɛ̧ zɔ̧-laa zóŋ-zóŋ in nɛ toka yɛm-yɛm zɔ̧-laa nɛ wi-tok-laa dee tom-aa.

³⁷Mɛ tɛ de o mbiŋ-tua mɔɔrɔ nɛ te akasia wen ga̧i̧a̧ laa'i sɛnɛ. Mɛ tɛ sɔ̧ lɔr ɗoŋ-wa. Mɛ tɛ de boi-kɔk-mɔ nɛ lɔr e sɛnɛ, ɓɛɛ mɛ nɔi̧a ndɛrɛ dui nɛ o gun-aa mɔɔrɔ.»