Read Northwest Gbaya GBOA-A 28 Bible Online

GBOA-A 28 - Northwest Gbaya bible

GBOA-A 28

¹«Moisɛ, mɛ̀ sá nya-mɛ Arɔŋ, in o bem kɔ̧-a̧ Nadab, Abihu, Eleazar, in Itamar, mgbara o be Israɛl tɛnɛ ha̧ wa mɛ ya nɛ́ o wi-ɗafi-sɔ̧.

²Mɛ tɛ fur o laa-ɗafi-sɔ̧ ha̧ nya-mɛ Arɔŋ wen ha̧ o bíí mɛ tu̧ tɛ-a in mɛ yu a̧.

³Mɛ tɛ tɔ̧ ha̧ o wi-fur-laa n'am ha̧a̧ iŋamɔ ha̧ wa, mɛ fur fura laa ko Arɔŋ, wen ha̧ a̧ mɛ duk wen dee tom-ɗaf'am.

⁴O laa nɛ wa tɛ fur'i nɛ mɔɔ nɔ'ɔ: de toka laa-kpe-yí-ŋguɗi, de gasa laa nɛ‘i sa'e Efod,[10] gasa laa-kpe-tɛ, be laa nɛ‘i toka tok, mɛtɛwol in kanda. Wa tɛ fur o laa nɔ‘i ha̧ nya-mɛ Arɔŋ in o bem kɔ̧-a̧, wen ha̧ wa mɛ de nɛ tom-ɗafa'm.

⁵Wa tɛ de tom o laa nɔ‘i nɛ lɔr, nɛ tu̧ zɔ̧-laa, nɛ gbɛ̧ laa, nɛ gbɛ̧ laa zóŋ-zóŋ, in yɛ́m-yɛ́m zɔ̧-laa.

⁶«Wa tɛ dè dé gasa laa nɛ‘i sa'e Efod'i nɛ lɔr, nɛ tu̧ zɔ̧-laa, nɛ gbɛ̧ laa, nɛ gbɛ̧ laa zóŋ-zóŋ, in nɛ yɛ́m-yɛ́m laa. Tom'i nɛ tom ko o wi-iŋ-toka-laa.

⁷Wa tɛ fur nyak kasa a̧ yiitoo e nú-a.

⁸Kanda-a tɛ duk nɛ kpɔk kale tom nɛ wa dee tɛ laa'i. Wa tɛ de nɛ lɔr, nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧ zɔ̧-laa zóŋ-zóŋ in nɛ yɛ́m-yɛ́m zɔ̧-laa.

⁹Mɛ tɛ kai de toka ta kɛn-kɛn yiitoo, ɓɛɛ mɛ yɔra nin o bem ko Israɛl zu a̧.

¹⁰Mɛ̀ yɔ́r nin ɛ̧ɛ̧ nɔ'ɔ mɔɔrɔ-ɗoŋ-kpɔk’ɛ tɛ kuti ta, ɓɛɛ mɛ yɔra nin oi-aa mɔɔrɔ-ɗoŋ-kpɔk tɛ yiitoo ta nyɛm nɛ ɗoŋ yuwar kóó wa.

¹¹Mɛ̀ yɔ́r nin o bem ko Israɛl zu o ta nɔ‘i hee mɔ'ɔ nɛ‘i gɔn nɛ dap tɛ ta’ɛ ga, hee tɛ tumbal ga; mɛ̀ nɔ̧́í̧ lɔr a ɗoŋ wa wen kasa wa.

¹²Mɛ̀ á o ta nɔ‘i yiitoo'i tɛ nyak Efod wen usa o be Israɛl. Hegɔ‘i nin o be Israɛl tɛ duk kóŋgó-ɓaa Arɔŋ ti GASA WAN hee mɔɔ-mbaŋ tɛ Sɔ̧ ga.

¹³Mɛ̀ nɔ̧́í̧ be lɔr de nɛ fara-kasi o ta nɔ‘i,

¹⁴ɓɛɛ mɛ̀ dé o be ɓaɓa nyak-lɔr yiitoo ga̧i̧ sɛnɛ.»

¹⁵«Mɛ̀ fúr laa-kpe-yí-ŋguɗi hee mɔ'ɔ nɛ‘i fura nɛ Efod ga, wen tani. Mɛ̀ dé nɛ̀ lɔr in nɛ tu̧ zɔ̧-laa, nɛ gbɛ̧ zɔ̧-laa, nɛ gbɛ̧ zɔ̧-laa zóŋ-zóŋ, in nɛ yɛm-yɛm zɔ̧-laa.

¹⁶Wi tɛ goi a si zu ŋmaa, ɓɛɛ dura-a in pɛsa-a nyɛma ŋmaa tɛ dɔ̧-er.

¹⁷Mɛ̀ ɗáfí fara a o be toka-ta nɛtɛ nɛtɛ, tɛ fara naar. Mɛ̀ á o ta-kui nɛ‘i sa'e sardɔan, ta nɛ yi-a ɔ tara nɛ‘i sa'e topaz in tu̧ ta mít-mít nɛ‘i sa'e emerod tɛ kuti nɛka-a.

¹⁸Yiitoo nɛka-a tɛ duk nɛ gbɛ̧ ta yúŋú-yúŋú nɛ‘i sa'e ɛskarbuklɛ, tu̧ ta hee gba̧a̧-yí-zan ga nɛ‘i sa'e safir in toka ta nɛ‘i sa'e jaspɛ.

¹⁹Tɛ taar nɛka-a, mɛ tɛ a nɛ ŋga ta nɛ‘i sa'e agat, gbɛ̧ ta nɛ‘i sa'e kɔrnalin in ta nɛ dap-aa nɛtɛ nɛtɛ nɛ‘i sa'e ametist;

²⁰ɓɛɛ naar nɛka-a, mɛ̀ á nɛ mbui ta nɛ‘i sa'e krizolit, toka ta kɛn-kɛn nɛ‘i sa'e beril in tu̧ ta nɛ‘i sa'e oniks. Mɛ̀ nɔ̧́í̧ lɔr a wa sɛnɛ.

²¹Nin o bem ko Israɛl tɛ ya zu o ta nɔ‘i ɓu-zua-yiitoo, ɓɛɛ wi tɛ yɔr mɔ zu wa hee mɔ'ɔ nɛ‘i yɔr nɛ mɔ zu tumbal ga, ta kpɔk kpɔk nɛ̀ nin, dam o zuduk be Israɛl ɓu-zua-yiitoo.

²²Mɛ̀ ɓáɓí o be geɗek nyak-lɔr wen aa zu laa-kpe-yí-ŋguɗi.

²³Mɛ̀ dé o kana yiitoo nɛ lɔr, ɓɛɛ mɛ à wá nu laa-kpe-yí-ŋguɗi nɛ ŋgɔn.

²⁴Mɛ̀ kún nyak-lɔr yiitoo'i tɛ o kana yiitoo nɛ ya nu laa-kpe-yí-ŋguɗi,

²⁵ɓɛɛ mɛ̀ kún o ɓii nu ɓaɓa nyak-lɔr nɔ‘i tɛ o mɔɔ-kasi-ta nɛ ya tɛ Efod nɛ war ti.

²⁶Mɛ̀ dúí mbe kana lɔr yiitoo, nɛ‘i tɛ ga̧i̧ nu laa-kpe-yí-ŋguɗi nɛ war fara nɛ ndaɗa ŋmaa in Efod nɛ kɔ̧ a̧.

²⁷Mɛ̀ dúí káná lɔr yiitoo woyo, ɓɛɛ mɛ̀ gá̧í̧ tɛ ɓaa Efod nɛ war ɗɔɔ, nyɛm nɛ fara hɛra-a sɛn zu kanda Efod'i.

²⁸Mɛ̀ kún laa-kpe-yí-ŋguɗi nɛ o kana-a tɛ o kana Efod nɛ tu̧ zɔ̧-laa ha̧ laa-kpe-yí-ŋguɗi mɛ duk zu kanda Efod wen ká a̧ tɛɛ yu zu-a.

²⁹«Ŋgimbi nɛ Arɔŋ tɛ ye fara-gɔn-kita, a̧ tɛ pi̧ nɛ laa-kpe-tɛ nɛ‘i gɔna nin o bem ko Israɛl sɛnɛ‘i; hegɔ nin o bem ko Israɛl tɛ duk hee mɔɔ-mbaŋ-tɛ-mɔ ti GASA WAN ga ɓɔnsɛnɛ.

³⁰Mɛ tɛ a Urim in Tumim[11] tɛ laa-kpe-yí-ŋguɗi wen tani ha̧ mɛ duk yí-ŋguɗi Arɔŋ ŋgimbi n'aa tɛ nɛ ti GASA WAN; hegɔ‘i Arɔŋ tɛ pi̧ laa'i ɓɔnsɛnɛ tɛ o ŋgimbi n'aa tɛ́ tɛ̀ ti GASA WAN.»

³¹«Mɛ tɛ fur gasa laa nɛ‘i tɛ pi̧ Efod zu-a'i nɛ tu̧ zɔ̧-laa.

³²Mɛ̀ gɔ́n ger laa ha̧ duk tan see-a, ɓɛɛ mɛ̀ tók nú-a nɛ garaazi ha̧ duk nɛ ndota-a, wen ká tɛɛ a̧k.

³³Mɛ tɛ fur o ŋma be mɔ nɛ hɔɔ ŋmaa in o be tu̧ waya kóɓò zik nɛ naŋ-a kpa lɛŋ nɛ tu̧ zɔ̧-laa, nɛ gbɛ̧ zɔ̧-laa in nɛ gbɛ̧-a̧ zóŋ-zóŋ, záŋ nɛ ŋmaa in o be mana nɛ‘i dee nɛ lɔr.

³⁴O fura be mɔɔ nɔ‘i nɛ̀ hɔɔ ŋmaa in o be tu̧ waya kóɓò, ká bá nɛ̀ o be mana nɛ‘i dee nɛ lɔr tɛ ya ŋgam ŋmaa zik ká̧ naŋ laa'i.

³⁵Arɔŋ tɛ pi̧ laa'i ŋgimbi n'aa tɛ de tom-ɗafa-sɔ̧. Wi tɛ zii giti mana ŋgimbi yea-a si sa̧a̧-fara ti GASA WAN in gboa-a mbɛt; hegɔ a̧ beka fe na.

³⁶«Mɛ̀ dúí sa̧a̧ lɔr hɔ ŋmaa in do-te, ɓɛɛ mɛ̀ yɔ́r mɔ zu a̧ hee mɔ'ɔ nɛ‘i yɔr nɛ mɔ tɛ tumbal’ɛ ga: ‹Mɔ nɛ duk nɛ sa̧a̧-a̧ wen GASA WAN.›

³⁷Mɛ tɛ kun lɔr'i zu zɔ̧-laa nɛ tu̧ nyak e tɛ mɛtɛwol nɛ war sɔnti.

³⁸Arɔŋ tɛ hɛr mɔ‘i e sɔnti wen zu o yɔɔ-kaya ko o be Israɛl ŋgimbi ha̧a̧mɔ kɔ-wa ha̧ Sɔ̧. Arɔŋ tɛ e mɔ‘i sɔnti ɓɔnsɛnɛ wen ha̧ GASA WAN mɛ kpɛk o ha̧a̧mɔ nɔ‘i ko o be Israɛl‘i.

³⁹«Mɛ tɛ tok gɔna be laa in mɛtɛwol nɛ yɛ́m-yɛ́m laa; mɛ tɛ tok kanda mbɛt. Mɔ‘i tɛ duk nɛ tom ko wi-iŋa-a.

⁴⁰«Mɛ̀ fúr o gɔna be laa, o kanda in o mɔɔ-hɛr-zu ha̧ o bem ko Arɔŋ ha̧ o bíí mɛ tu̧ tɛ-wa in mɛ yu wa.

⁴¹Mɛ tɛ pi̧ o laa nɔ‘i tɛ nya-mɛ Arɔŋ in o bem kɔ̧-a̧, mɛ tɛ tɛn nɔ̧́ a zu-wa e nɛ wa nɛtɛ, mɛ tɛ e tom er-wa wen ɗafa'm.

⁴²Mɛ tɛ fur o laa-mɛ-ɗɔɔ ha̧ wa mɛ pi̧ wen ká'í tɛɛ zɔk zim-tɛ-wa. O laa nɔ‘i mɛ ɗɔɔ‘i tɛ duk nɛ yɛ́m-yɛ́m laa nɛ tɛ ba wa guntir-wa hɔ ku-wa.

⁴³Arɔŋ in o bem kɔ‘i tɛ pi̧ o laa nɔ‘i ŋgimbi nɛ wa tɛ ye kɔ̧ tua-kpa-ŋmaa, kóó ŋgimbi nɛ wa tɛ ye si sa̧a̧-fara wen dee tom-ɗafa'm, wen ká ŋma wen tɛɛ bo zu wa nɛ tɛ de ha̧ wa mɛ fe. Mɔ‘i tɛ duk nɛ gasa heembea ɓɔnsɛnɛ wen Arɔŋ in o bezaŋ-aa mɛ ɗoŋ.»