Read Northwest Gbaya GBOA-A 3 Bible Online

GBOA-A 3 - Northwest Gbaya bible

GBOA-A 3

¹Moisɛ daia so sami ko for-aa Jetro, wi-ɗafi-sɔ̧ sɛn Madiaŋ, ɓɛɛ a̧ kai wa ɓir nɛ ŋga gbara, hɔ nɛnɛ ká̧ naŋ kaya ko Sɔ̧ nɛ wa sa'e, Sinai.

²Betom ko GASA WAN usa tɛ ha̧ a̧ tɛ leɓe-wee mgbara da̧a̧-be-te. A̧ zɔka wee tɛ be te'i, ɓɛɛ be te'i bíí wee na.

³A̧ tɔ̧a̧: «Mi tɛ nɛ siti mɛ zɔk mgbara mɔɔ-kifi’ɛ in ha̧‘m mɛ iŋ wen ge da̧a̧-be-te’ɛ bíí wee na ge.»

⁴GASA WAN zɔka a̧ fara tɛa-a mɛ zɔk mɔ‘i nɛ de-a, ɓɛɛ sa a̧ nɛ mgbara be te: «Moisɛ! Moisɛ!» Moisɛ tɔ̧a̧: «Mi nɛ mɔ'ɔ.»

⁵Ɓɛɛ a̧ tɔ̧: «Ká mɛ́ ɗɔŋ pii hɛ̧ɛ̧ na; mɛ̀ kpɔ̧́í̧ ndárà naŋ-mɛ yinɛ, wen fara nɛ mɛ i̧si̧‘i nɛ sa̧a̧-fara.»

⁶Sɔ̧ tɔ̧ɔ̧ woyo: «Mɛ̀ nɛ́ mi Sɔ̧ ko dáà kɔ-mɛ! Sɔ̧ ko Abraham, Sɔ̧ ko Izak in Sɔ̧ ko Jakob.» Moisɛ baa mɔ kpe nɛ yi wen kíì dee a̧ wen zɔka saŋa-yí Sɔ̧.

⁷GASA WAN tɔ̧a̧: «Mi zɔka bɔnɛ ko zuduk bíí kɔ‘m sɛn Egiptɛ. Mi zia hiɗimɔ nɛ wa hiɗi zaŋ bɔnɛ nɛ o wi-duk-zu wa usi ha̧ wa'i. Nɛ mbetɛ, mi iŋa bɔnɛ kɔ-wa.

⁸Mi baa keta nɛ tɛ‘m mɛ gbo wa yinɛ er o be Egiptɛ, ha̧‘m mɛ de ha̧ wa mɛ nɛ si sɛn tɛ ŋma de pɛsa nu, nɛ yibere in gɔrɔ fok fok sɛnɛ; fara'i nɛ fara ko o be Kanaŋ, o be Hit, o be Amɔr, o be Periz, o be Hiv in o be Jebus.

⁹Kinii hee mɔ'ɔ nɛ hiɗimɔ ko o bezaŋ Israɛl tɛ̀ɛ́ hɔ tɛ‘m in hee mi zɔka bɔnɛ nɛ o be Egiptɛ usi ha̧ wa ga,

¹⁰mi tom nɛ mɛ nɛnɛ tɛ wannu Egiptɛ ha̧ mɛ mɛ gbo o bezaŋ Israɛl, dukbíí kɔ‘m sɛn nú Egiptɛ yinɛ.»

¹¹Moisɛ tɔ̧ɔ̧ ha̧ Sɔ̧: «Mi nɛ ge bíí ge mɛ nɛ̀ɛ́ kpa wannu Egiptɛ, mɛ kai o bezaŋ Israɛl gbonɛ sɛn nú Egiptɛ ge nde?»

¹²Sɔ̧ tɔ̧a̧: «Mi a̧a̧ in mɛɛ, ɓɛɛ mɔ nɛ tɛ usi'e, mi toma mɛ nɛ mɔ'ɔ. Ŋgimbi nɛ mɛ tɛ kai nɛ zuduk bíí gbonɛ Egiptɛ, ɛnɛ tɛ gas'am sɛn zu kaya’ɛ.»

¹³Moisɛ tɔ̧ɔ̧ ha̧ Sɔ̧: «Mi tɛ nɛ tɛ o be Israɛl, ɓɛɛ mi tɔ̧ɔ̧ ha̧ wa nde, Sɔ̧ ko o dáà kɔ-wa toma'm pii tɛ wa. Kà wa nɛ aka'm'e: ‹Nin-a nɛ o?› Ɓɛɛ nɛ́ ge a̧‘m tɛ tɔ̧ ha̧ wa ge?»

¹⁴Sɔ̧ tɔ̧ɔ̧ ha̧ Moisɛ: «Mɛ̀ tɔ̧́: ‹Mi nɛ́ Wi nɛ̀ a̧a̧ sɛnɛ!› » Ɓɛɛ a̧ tɔ̧ woyo: «Wen nɛ mɛ tɛ tɔ̧ ha̧ bezaŋ Israɛl nɛ mɔ'ɔ: Nɛ́ Wi nɛ̀ a̧a̧ sɛnɛ a̧ toma'm pii tɛ‘nɛ́.»

¹⁵Sɔ̧ tɔ̧ɔ̧ ha̧ Moisɛ woyo: «Mɛ tɛ tɔ̧ ha̧ wa'e nde, nɛ́ GASA WAN Sɔ̧ ko o dáà kɔ-wa, Sɔ̧ ko Abraham, Sɔ̧ ko Izak in Sɔ̧ ko Jakob a̧ toma mɛ pii tɛ wa. Nin-am a̧‘i kpoo nɛ kpoo, nɛ̀ o bíí tɛ gasi nɛ‘m ɓɔnsɛnɛ.

¹⁶Mɛ̀ nɛ́, mɛ̀ mɔ́í̧ o kuti bíí Israɛl, ɓɛɛ mɛ̀ tɔ̧́ ha̧ wa nde, GASA WAN Sɔ̧ ko o dáà kɔ-wa, Sɔ̧ ko Abraham, Sɔ̧ ko Izak in Sɔ̧ ko Jakob usa tɛ ha̧ mɛ, ɓɛɛ a̧ tɔ̧ ha̧ mɛ‘e, wi nɛ̀ɛ́ hɔ tɛ wa, wi zɔka mɔ nɛ o bíí Egiptɛ de in wa,

¹⁷ɓɛɛ sa'i tɔ̧, wi tɛ de ha̧ wa mɛ gbo tɛ bɔnɛ nú Egiptɛ mɛ, mɛ fo wa si nu ko o be Kanaŋ, o be Hit, ko o be Amɔr, o be Periz, o be Hiv in ko o be Jebus, si fara nɛ yibere in gɔrɔ fok sɛnɛ.

¹⁸«Wa tɛ zii wen kɔ-mɛ, ɓɛɛ mɛ in o kuti bíí Israɛl, ɛnɛ tɛ nɛ tɛ wannu Egiptɛ mɛ tɔ̧ wen’ɛ ha̧ a̧: ‹GASA WAN Sɔ̧ ko o be Hebreu usa tɛ h’ɛ́ɛ́. Ɛ̀nɛ̀ é war h’ɛ́ɛ́ tɛ zɛ taar mɛ nɛ si ŋga gbara, mɛ ɗafi GASA WAN Sɔ̧ k’ɛɛ.›

¹⁹Mi iŋa nɛ de-a wannu Egiptɛ beka e'nɛ́ mɛ yak na hɔ ŋgimbi nɛ ŋma ŋgamɔ tɛ kpa a̧.

²⁰Mi tɛ nyɛi̧ er-am, ɓɛɛ mi tɛ de mɔɔ-gɔn-ɗɛɗɛ nɛtɛ nɛtɛ mɛ pi̧ bɔnɛ zu Egiptɛ, ɓɛɛ a̧ tɛ e h’ɛ́nɛ́ mɛ yak.

²¹«Mi tɛ de ha̧ zuduk bíí Israɛl mɛ kpa demɔ ko Egiptɛ, ɓɛɛ ŋgimbi n’ɛnɛ tɛ kur mɛ yak, ɛnɛ beka yak nɛ gee er na.

²²Ɓɛɛ okoo kpɔk kpɔk tɛ ak sɛm kɔ-wa in o wi nɛ wa ɔ tɛ kɔ-wa mɛ ha̧ o mɔ nɛ‘i dee nɛ bu-mbɔi in lɔr ká bá nɛ̀ o gasa laa ha̧ wa. Ɛ̀nɛ̀ á o mɔɔ nɔ‘i tɛ o bui-bem in o boko-bem k’ɛ́nɛ́, ɓɛɛ hegɔ ɛnɛ tɛ kai mɔ er o be Egiptɛ lɛŋ yinɛ.»