Read Northwest Gbaya GBOA-A 7 Bible Online

GBOA-A 7 - Northwest Gbaya bible

GBOA-A 7

¹GASA WAN tɔ̧ɔ̧ ha̧ Moisɛ: «Mi tɛ e mɛ hee Sɔ̧ ga sɛn ti wannu Egiptɛ, ɓɛɛ Arɔŋ nya-mɛ tɛ duk kɔ‘i hee wi-tɔ̧-wen oi nú mɛ ga.

²Nɛ́ mɛ a̧ tɛ tɔ̧ mɔ n'am tɛ tɔ̧, ɓɛɛ Arɔŋ nya-mɛ wee kɔ‘i nɛ ɗoŋ-aa ha̧ wannu Egiptɛ, wen ha̧ a̧ mɛ e o be Israɛl mɛ gbo tɛ nu kɔ̧-a̧.

³Ɓɛɛ kɔ‘m, mi tɛ pi̧ nɛ ŋga-see tɛ wannu Egiptɛ. Mi tɛ de mɔɔ-usi-mɔ in mɔɔ-kifi nɛ dɔka-a sɛn nú Egiptɛ.

⁴Hee mɔ'ɔ nɛ wannu Egiptɛ beka zii wen nú‘nɛ́ na ga, mi tɛ pi̧ ŋgamɔ sɛn nú Egiptɛ, mi tɛ gbo o bíí kɔ‘m, o be Israɛl sɛn nú Egiptɛ nɛ yuwar-a.

⁵Hegɔ, o be Egiptɛ tɛ iŋ‘e, mi nɛ GASA WAN, ŋgimbi n'am tɛ pi̧ ŋgayamɔ zu wa, kai nɛ o be Israɛl gbonɛ mgbara wa.»

⁶Moisɛ in Arɔŋ mboo zu, ɓɛɛ wa de hee mɔ'ɔ nɛ GASA WAN usa ha̧ wa ga.

⁷Moisɛ a̧a̧ so nɛ pɛ ɓu-mɔɔrɔ-ɗoŋ-taar ɓɛɛ Arɔŋ a̧a̧ nɛ pɛ ɓu-mɔɔrɔ-ɗoŋ-taar-zua-taar ŋgimbi nɛ wa tɔ̧ɔ̧ nɛ wen ha̧ wannu Egiptɛ.

⁸GASA WAN tɔ̧ɔ̧ ha̧ Moisɛ in Arɔŋ:

⁹«Kà wannu Egiptɛ ha̧ nú‘e, ɛ̀nɛ̀ dé mɔɔ-kifi wó, ɓɛɛ mɛ̀ tɔ̧́ ha̧ Arɔŋ mɛ ba dɔra kɔ‘i pi̧ nu sɛn ti wannu Egiptɛ ha̧ dɔra'i mɛ kifi gɔ́k.»

¹⁰Moisɛ in Arɔŋ nɛ̀ɛ́ sɛn tɛ wannu Egiptɛ, ɓɛɛ wa de hee mɔ'ɔ nɛ GASA WAN tɔ̧ɔ̧ ha̧ wa ga. Arɔŋ pi̧i̧ dɔra kɔ‘i sɛn ti wannu Egiptɛ in o wi-de-tom kɔ̧-a̧, ɓɛɛ dɔra'i kifi gɔ́k.

¹¹Wannu Egiptɛ mbɛt saa o wi-iŋ-mgbara-mɔ in o wan-gbana, ɓɛɛ o wi-de-mɔɔ-kifi mɛ Egiptɛ de kpɔk mɔ‘i.

¹²Wa pi̧i̧ dɔra kɔ-wa nu, ɓɛɛ kifi gɔ́k, ɓɛɛ dɔra ko Arɔŋ gur ko o wan-gbana nɔ‘i.

¹³Zu mɔɔ nɔ‘i lɛŋ, see wannu Egiptɛ ŋgaia; a̧ kɔ̧ zia wen ko Moisɛ in Arɔŋ na hee mɔ'ɔ nɛ GASA WAN baa tɔ̧ so ga.

¹⁴Ɓɛɛ GASA WAN tɔ̧ ha̧ Moisɛ: «Wannu Egiptɛ de nɛ ŋgazu, a̧ bɛ̧ɛ̧ ea-a ha̧ zuduk bíí mɛ yak.

¹⁵Mɛ̀ nɛ́ɛ̀ kpá a̧ mɛ tutuyɛ ŋgimbi n'aa nɛ́ nɛnɛ si nú yì, ɓɛɛ mɛ̀ pɛ́m a̧ ká̧ zaŋ nana-yì. Mɛ̀ bá dɔra kɔ-mɛ nɛ kifa so gɔ́k'i er-mɛ.

¹⁶Ɓɛɛ mɛ̀ tɔ̧́ ha̧ a̧ hegɔ: GASA WAN, Sɔ̧ ko o be Hebreu toma'm pii tɛ-mɛ mɛ tɔ̧ ha̧ mɛ‘e, mɛ̀ é ha̧ o bíí kɔ‘i mɛ yak ha̧ wa mɛ gasi wi sɛn ŋga-gbárà. Ɓɛɛ hɔ kinii, mɛ kpe nɛ zer-mɛ.

¹⁷Hegɔ GASA WAN tɔ̧a̧, mɔ nɛ tɛ usi ha̧ mɛ ndé, wi nɛ GASA WAN nɛ mɔ'ɔ: ‹Mi tɛ gusi nana-yì'ɛ nɛ dɔra nɛ duk er-am’ɛ, ɓɛɛ yì'ɛ tɛ kifi tɔk.

¹⁸O zoro ɗɔɔ yì'ɛ tɛ fe, pɛr yì tɛ nun, ɓɛɛ o be Egiptɛ tɛ kimi nɔa-a takaɗi.› »

¹⁹GASA WAN tɔ̧ɔ̧ ha̧ Moisɛ: «Mɛ̀ tɔ̧́ ha̧ Arɔŋ hegɔ: ‹Mɛ̀ bá dɔra kɔ-mɛ usi si zu o yi Egiptɛ, si sɛn ɗɔɔ o gasa yì, si ɗɔɔ mbaŋa-yì,[3] si zu tɔp in fara lɛŋ nɛ yì a̧a̧ sɛnɛ, ha̧ wa lɛŋ mɛ kifi tɔk; tɔk a̧ dam fara lɛŋ nú Egiptɛ, sɛn kɔ̧ o yèè in o tasi nɛ wa sɛka nɛ ta mbɛt.› »

²⁰Moisɛ in Arɔŋ dee hee mɔ'ɔ nɛ GASA WAN usa ha̧ wa ga. Arɔŋ baa dɔra kɔ‘i nɛ ŋgɔn, ɓɛɛ a̧ gusi yì ti wannu Egiptɛ in o wi-de-tom kɔ‘i, ɓɛɛ nana-yì kifi tɔk lɛŋ.

²¹O zoro ɗɔɔ nana-yì‘i fea lɛŋ, ɓɛɛ pɛr yì nun nɛ o be Egiptɛ nyɛm mɛ nɔ na. Ɓɛɛ tɔk dam Egiptɛ lɛŋ.

²²Nɛ mɔ'ɔ nɛ o wi-de-mɔɔ-kifi mɛ́ nú Egiptɛ dee kpɔk mɔ‘i mbɛt. See wannu Egiptɛ ŋgaia, ɓɛɛ a̧ kɔ̧ mɛ zii wen nú Moisɛ in Arɔŋ na hee mɔ'ɔ nɛ GASA WAN baa tɔ̧ so ga.

²³Wannu Egiptɛ zika tɛ si ɗoŋ tɛ kɔ‘i, a̧ pi̧ nú-a tɛ mɔ nɛ yaka na.

²⁴O be Egiptɛ lɛŋ za̧a̧ mɔ nɛ ká̧ ŋgere nana-yì mɛ kpa de yí-nɔ, wen wa nyɛm so mɛ nɔ yì nana-yì ɓɔna.

²⁵Zɛ mɔɔrɔ-ɗoŋ-yiitoo yaka ɗoŋ dee gasamɔ nɛ GASA WAN dee in nana-yì‘i.

²⁶Nɛ mɔ'ɔ nɛ GASA WAN tɔ̧ɔ̧ ha̧ Moisɛ: «Mɛ̀ nɛ́ tɛ ko wannu Egiptɛ, mɛ tɔ̧ ha̧ a̧: GASA WAN tɔ̧a̧‘e, a̧ a̧ e ha̧ dukbíí kɔ‘i mɛ yak ha̧ wa mɛ nɛ̀ɛ́ gasi wi.

²⁷Kà mɛ nɛ kɔ̧ɔ̧ ha̧ wa mɛ yak na, wi tɛ de ha̧ o yaa-gbazal mɛ dun nu kɔ-mɛ.

²⁸Wa tɛ dun ɗɔɔ nana-yì, wa tɛ daŋ nɛ̀ hi̧i̧ mɛ yak si kɔ̧ tua kɔ-mɛ, si fara-ɔɔ kɔ-mɛ, gɔn gado kɔ-mɛ, si kɔ̧ tua ko o wi-de-tom kɔ-mɛ in ko dukbíí kɔ-mɛ, hɔ fara-gi-nyɔŋmɔ kɔ-mɛ in fara-hɔ̧n-mɔ kɔ-mɛ mbɛt.

²⁹Yaa-gbazal tɛ daŋ zu-mɛ, zu dukbíí kɔ-mɛ, in zu o wi-de-tom kɔ-mɛ.»