Read Northwest Gbaya JOB 1 Bible Online

JOB 1 - Northwest Gbaya bible

JOB 1

¹Ŋma bíí duka so sɛn nù Us, nin-a nɛ Job. A̧ nɛ de bíí in wi-de-mɔ nɛ yuwar-a mbɛt. A̧ nɛ wi-yu-kíí Sɔ̧ nɛ duk kɔ‘i nyɛi̧ nɛ ɗaŋmɔ.

²A̧ koo bem, be-wiwii mɔɔrɔ-ɗoŋ-yiitoo in be-okoo taar.

³A̧ a̧a̧ so nɛ sami booro-mɔɔrɔ-ɗoŋ-yiitoo, ŋgeloba booro-taar, ndai-de-tom booro, nana tuifuu gɔmŋmaa-mɔɔrɔ in o wi-de-tom nɛ dɔka-a. A̧ nɛ wi nɛ kpaa mɔ gan o bíí mɛ si daŋa-wese lɛŋ.

⁴O bem kɔ̧-a̧ duka so nɛ́ tɛ ko o ŋmaa, de nɛ be gbaŋa, ɓɛɛ toma sa o boko nya-wa taar mɛ tɛ̀ɛ́ nyɔŋ mɔ, nɔ nɛ mɔ in wa mbɛt.

⁵Kà wa dé yɔyɛ dam wa lɛŋ kaɗi, ɓɛɛ Job saa o bem kɔ‘i lɛŋ ha̧ a̧ mɛ ɗafi war-tɛ-wa. Kà a̧ kúr mɛ tutuyɛ, ɓɛɛ a̧ dɔɔ kpoo ɗafi nɛ sɔ̧ wen wa kpɔk kpɔk. Taamɔ ko Job'e, ŋmafara o bem kɔ‘i dee ɗaŋmɔ, da̧ nɛ Sɔ̧ nɛ kɔ̧ see-wa. Tom-dee ko Job nɛ mɔ‘i ɓɔnsɛnɛ.

⁶Ŋma wese, o betom[1] ko GASA WAN tɛɛ tɛ a̧ mɛ we ɗoŋ tom kɔ-wa, ɓɛɛ Satan wi-ba-wen zu bíí tɛ kànà in wa mbɛt.

⁷GASA WAN aka a̧: «Mɛ tɛ nɛ déè?» Wi-ɓir-wen e nú-wi kifa nú: «Mi yara so zɔk nɛ nù nɛnɛ.»

⁸Nɛ mɔ'ɔ nɛ GASA WAN aka a̧ woyo: «Mɛ zɔka wi-de-tom kɔ‘m Job nde? Ŋma bíí hee a̧ ga zu nù bo na. A̧ nɛ́ de bíí in wi-de-mɔ nɛ yuwar-a, nɛ yu kíí Sɔ̧, in nɛ duk kɔ‘i nyɛi̧ nɛ ɗaŋmɔ.»

⁹Wi-ɓir-wen e nú-wi kifa nú ha̧ GASA WAN: «Job yu so kíí GASA WAN géè nde?

¹⁰Bó nɛ́ wen n’ɛnɛ dee kira ɓor nɛ ɗoŋ tua kɔ̧-a̧ in o mɔ kɔ̧-a̧ lɛŋ na nde? O mɔ kɔ̧-a̧ n'aa dee lɛŋ, ɛnɛ toka de yoŋgo zu a̧, ɓɛɛ o mɔ-dai kɔ̧-a̧ to nɛnɛ hukɛ-hukɛ.

¹¹Mi ee mɔ: ɛ̀nɛ̀ nyɛ́í̧ er'nɛ́, ɛ̀nɛ̀ fó mɔ kɔ̧-a̧ lɛŋ; kà a̧ nɛ́ foma'nɛ́ na, ɓɛɛ bó nɛ́ mi a̧ tɔ̧ wen'i na!»

¹²Ɓɛɛ GASA WAN kifi nú ha̧ a̧: «Mi zia. O mɔ kɔ̧-a̧ lɛŋ a̧a̧ ɗɔɔ ŋgai kɔ-mɛ; mɔ kpɔk, ká mɛ́ tam gee tama tɛ-a na.» Nɛ mɔ'ɔ nɛ wi-ɓir-wen e nú-wi kura ti GASA WAN, ɓɛɛ yak.

¹³Ŋma wese, o bem ko Job mɛ wiwii-a in be okoo-a nyɔŋ nɛ mɔ, nɔ nɛ mɔ tɛ ko zɔmwi kɔ-wa.

¹⁴Nɛ mɔ'ɔ nɛ ŋma betom tɛa, ɓɛɛ tɔ̧ ha̧ Job: «O ndai k’ɛ́nɛ́ ya wa nɛ fɔ, ɓɛɛ o nana tuifuu nyɔŋ nɛ mɔ katɛ wa.

¹⁵Nɛ mɔ'ɔ nɛ o be Sabee hɔa, ɓar wa lɛŋ, ɓɛɛ wa kum o wi-de-tom k’ɛ́nɛ́ mbɛt. Wi nɛ gboo mgbara wa kpɔk, nɛ́ mi n'am tɛɛ mɛ tɔ̧ h’ɛ́nɛ́'ɛ.»

¹⁶Wi’ɛi biti fara tɔ̧ɔ̧ wen, ɓɛɛ ŋma mbe bíí tɛ́ɛ̀ tɔ̧ ha̧ Job woyo: «Wee ko Sɔ̧ hɔ̧fa̧ nɛ yiwese, tik zu o sami in o wi-de-tom k’ɛ́nɛ́ lɛŋ, dɔ wa gbɛ. Wi nɛ gboo mgbara wa kpɔk, nɛ́ mi n'am tɛɛ mɛ tɔ̧ h’ɛ́nɛ́'ɛ.»

¹⁷Nú wi’ɛi tɛ zɔm tɛ wen'i hɔ̧ɔ̧ na, ɓɛɛ ŋma mbe bíí gɔm ɓɛɛ tɔ̧ ha̧ a̧: «O be Kaldee kɛ̧a̧ tɛ́ fara taar tik zu o ŋgeloba k’ɛ́nɛ́, kai wa yaknɛ. Wa kuma o wi-de-tom k’ɛ́nɛ́ lɛŋ mbɛt; wi nɛ gboo mgbara wa kpɔk, nɛ́ mi n'am tɛɛ mɛ tɔ̧ h’ɛ́nɛ́'ɛ.»

¹⁸A̧ tɛ kaɗi tɔ̧ɔ̧ wen'i hɔ̧ɔ̧ na, ɓɛɛ mbe bíí hɔ woyo, ɓɛɛ tɔ̧: «O bem k’ɛ́nɛ́ mɔi̧a ya nyɔŋ nɛ mɔ, nɔ nɛ mɔ tɛ ko zɔmwi kɔ-wa,

¹⁹ɓɛɛ hara-búk yu nɛ ŋga-gbárà mɛ tɛnɛ gbin tua a zu wa; wa fea lɛŋ, wi nɛ gboo mgbara wa kpɔk, nɛ́ mi n'am tɛɛ mɛ tɔ̧ h’ɛ́nɛ́'ɛ.»

²⁰Ɓɛɛ Job kur ŋgɔn, a̧k gba laa tɛ a nù, kpui zu lɛŋ, hɔ̧fi̧ tik nù, ba yi gu nù,

²¹ɓɛɛ tɔ̧: «Mi gboo nɛ kɔ̧ zaŋ nàà kɔ‘m nɛ mgbii, mi tɛ si kànà ɗoŋ nɛ mgbii mbɛt. Mɔ nɛ GASA WAN baa ha̧ so, nɛ́ mɔ'ɔ n'aa baa mɔ kɔ̧-a̧ siɗoŋ; bíí lɛŋ a̧ zɔn nin GASA WAN.»

²²Tɛ mɔ‘i lɛŋ, Job de ŋma ɗaŋmɔ na, a̧ tɔ̧ ŋma ɗaŋ wen zu Sɔ̧ na.