Read Northwest Gbaya JOB 13 Bible Online

JOB 13 - Northwest Gbaya bible

JOB 13

¹Yí‘m zɔka mɔ‘i lɛŋ, zer-am zia mɔ‘i lɛŋ, ɓɛɛ mi iŋ mgbara-a mbɛt.

²Mɔ n’ɛnɛ iŋa, mi iŋa kànà mbɛt; ŋma mɔ n’ɛnɛ gana nɛ̀‘m bo na.

³Ɓɛɛ kɔ‘m mi kɔ̧ɔ̧ mɛ tɔ̧ wen ha̧ Wan nɛ a̧a̧ nɛ ŋgayamɔ lɛŋ; mi kɔ̧ɔ̧ mɛ si kafɛ in Sɔ̧.

⁴K’ɛ́nɛ́, ɛnɛ nɛ́ o wi-de-ndela ɔr nɛ bíí; ɛnɛ nɛ́ o wi-de-nyina nɛ̀ gba̧a̧-a̧ bo na.

⁵Ŋma wi-kpe-nú‘nɛ́ war kpɔk a̧ bo so gáà, mɔ‘i tɛ̀ɛ́ duk nɛ iŋa-mgbara-mɔ h’ɛ́nɛ́.

⁶Ɛ̀nɛ̀ zíí war wen kɔ‘m, ɛ̀nɛ̀ yéŋ zer'nɛ́ tɛ gba̧a̧ wen kɔ‘m n'am tɛ ɓa'i.

⁷Ɛ́nɛ́ tɛ yor ɗoŋ Sɔ̧, de nɛ ndela nɛ nin-a nde?

⁸Ɛ́nɛ́ yé nɛ ɗoŋ Sɔ̧ nde? Ɛ́nɛ́ kɔ̧ɔ̧ mɛ ɓa wen oi nú-a nde?

⁹Kà a̧ kíí mɔ tɛ‘nɛ́, ɓɛɛ tɛ́ de wen'nɛ́ nde? Ɛ́nɛ́ nyɛma mɛ ɔr a̧ hee mɔ'ɔ nɛ‘i ɔr nɛ bíí'ɛ ga nde?

¹⁰A̧ tɛ tɔ̧ ŋga wen h’ɛ́nɛ́, wen n’ɛnɛ yee ɗoŋ-aa nɛ hu̧sa̧-a̧.

¹¹Gasamɔ kɔ̧-a̧ pi̧ kíì tɛ‘nɛ́ na nde? Kíì tɛ-a de'nɛ́ na nde?

¹²O gba̧‘a̧ tua-wen nɔ‘i k’ɛ́nɛ́‘i nɛ géé bùk-wee; wen k’ɛ́nɛ́ nɛ géé bú-kpánà.

¹³Ɛ̀nɛ̀ kpé nú‘nɛ́! Nɛ́ mi'i tɛ tɔ̧ wen kinii! Mɔ lɛŋ nɛ tɛ kpa'm a̧ kpá‘m!

¹⁴Mi duk zu naŋ-am wen mɔ lɛŋ, mi tɛ we; kà‘m nɛ́ fea, ɓɛɛ kaɗa.

¹⁵A̧ nɛ́ kɔ̧a̧, a̧ a̧ gbɛ‘m, wen kɔ‘m bó na;[12] mɔ kpɔk, mi tɛ ɓa kànà wen kɔ‘m ti a̧!

¹⁶Nɛ́ mɔ‘i a̧ tɛ kpas'am, wen wi-hu̧si-ɗaŋmɔ yor ti a̧ na.

¹⁷Ɛ̀nɛ̀ zíí wen kɔ‘m; ɛ̀nɛ̀ yéŋ zer'nɛ́ tɛ gba̧a̧ wen n'am tɛ tɔ̧‘i.

¹⁸Mi nɛ́ mɔ'ɔ: mi tɛ ɓa wen kɔ‘m kinii; mi iŋa ndé, wen kɔ‘m tɛ yor.

¹⁹Ŋma bíí nɛ́ bòò mɛ́ ba wen zu'm, a̧ a̧ tɔ̧; kà wen kɔ‘m a̧ ɗaŋa, ha̧‘m kpe nú‘m a̧‘m fé.

²⁰GASA WAN, nɛ́ mɔ yiitoo a̧‘m ak er'nɛ́. K’ɛ̀nɛ̀ kpɛ́k, ɓɛɛ mi hu̧si tɛ‘m ti'nɛ́ ɓɔna:

²¹ɛ̀nɛ̀ bá er'nɛ́ yinɛ zu'm, ɓɛɛ k’ɛ́nɛ́ pi̧ kíì tɛ‘m ɓɔna;

²²ɛ̀nɛ̀ kú̧ naŋ wen, ɓɛɛ mi tɛ kifi nú h’ɛ́nɛ́; kóó mi tɔ̧ɔ̧ wen, ɓɛɛ ɛnɛ kifa nú ha̧‘m.

²³Yɔɔ kaya kɔ‘m in ɗaŋmɔ n'am dee ti'nɛ́ bɔɔ géè? Ɛ̀nɛ̀ úsí heembea n'am gbina in ɗaŋmɔ n'am dea ha̧‘m iŋ.

²⁴Wen ge ɛ́nɛ́ bá yí‘nɛ́ hu̧si nɛ‘m ge nde? Ɛ́nɛ́ bá‘m hee wisɛn k’ɛ́nɛ́ ga, wen ge?

²⁵Ɛ́nɛ́ kɔ̧ɔ̧ mɛ nasi géé wa̧a̧ nɛ búk ba yaknɛ'ɛ, kóó ndaka ɗoŋ géé kora zɔ̧ nde?

²⁶Wen ge ɛnɛ gɔn ŋga kita zu'm ge? Wen ge ɛnɛ usi bɔnɛ ha̧‘m oi o ɗaŋmɔ n'am dee nɛ̀ bem mɛ ge?

²⁷Wen ge ɛnɛ pi̧ naŋ-am kɔ̧ poka, zɔk nɛ o naŋanɔ kɔ‘m lɛŋ ge?

²⁸Duka-a ko bíí duk hee ɓuka gua ga; kóó hee ŋma laa nɛ zɛmɛ yii ga.