Read Northwest Gbaya JOB 14 Bible Online

JOB 14 - Northwest Gbaya bible

JOB 14

¹Bíí nɛ̀ okoo koa, kànà nɛ́ bɔnɛ a̧ gan zu a, ɓɛɛ ɗoŋ duka-a kɔ̧-a̧ zu nù nyɛi̧ na.

²Bíí duk hee do-mɔ nɛ mir, ɓɛɛ ɓan na ɔ̧ka̧'ɛ ga; a̧ hɔɔ ŋmaa in gi̧ɔ̧ nɛ yambali’ɛ.

³Ɓɛɛ ɛnɛ tɛ hu̧i̧ yí‘nɛ́ zu a hee ge? Ɛnɛ tɛ mgbɔ a e ti kita hee ge?

⁴Nɛ́ o'o nyɛma mɛ de ha̧ mɔ nɛ ɔ sa̧a̧ mɛ gbo nɛ tɛ ndiŋmɔ o? Ŋma wi-a bo kɔ‘i na!

⁵Ɛnɛ gɔna ŋgimbi duka-a ko bíí gɔn, ɛnɛ tɔra fio-zɛ duka-a kɔ̧-a̧ tɔr, a̧ nyɛm mɛ gan zu ŋgimbi n’ɛnɛ ea ha̧ a̧ na.

⁶Ɓɛɛ ɛ̀nɛ̀ bá yí‘nɛ́ yinɛ tɛ a̧, ɛ̀nɛ̀ é a̧ geɗek, ha̧ a̧ kaɗi be wese-tom kɔ̧-a̧ nɛ ga̧a̧-see na nde?

⁷Te a̧a̧ nɛ̀ mɔɔ-e-nɛ-ta kɔ‘i; kà bíí gɔ́m a̧ pi̧ nu, a̧ nyɛma mɛ ɓɔ woyo, ɓɛɛ o gbaia-a gboo siti.

⁸Kóó nɛ́ o kunin-a a̧ fee ɗɔɔ nù, kóó nɛ́ ŋginda-a a̧ ɓɔna ɗɔɔ nù;

⁹kà yì hɔ́ sɛnɛ ɓɛɛ a̧ ɓɔa, ɓɛɛ a̧ gbaa er-a hee be daŋa-te ga.

¹⁰Ɓɛɛ ko bíí, kà a̧ fé, ɓɛɛ ɓaa kɔ̧-a̧ a̧ kaɗa'i! Kà bíí pɛ́ see kaɗi, wi iŋ oi-aa ɓɔna.

¹¹Yì gboo tɛ gba-tɔp yak; zer ɔ̧si̧, ɓɛɛ kora ndaɗi kpáá-kpáá;

¹²nɛ́ hegɔ a̧ bíí fe nɛnɛ ɓɛɛ kur ɓɔna. Ŋgimbi nɛ yiwese biti duka-a kaŋ, bíí beka tun tɛ ɔɔ ŋgírí-ya kɔ‘i na.

¹³Ho! Ɛ́nɛ́ tɛ̀ɛ́ hu̧si so'm sɛn fara ko o fio, ha̧‘m duk hi̧i̧ hɔ ŋgimbi nɛ nyimsea k’ɛ́nɛ́ tɛ ga̧ zu'm na nde? Ɛnɛ tɛ̀ɛ́ gɔn so ŋma ŋgimbi nɛ tɛ‘nɛ́ tɛ mbaŋ nɛ ɗoŋ-am na nde?

¹⁴Mɔ kpɔk, kà bíí fe kaɗi, a̧ kur ŋgɔn woyo ɓɔna. Wen kà bó só hegɔ na, mi tɛ̀ɛ́ pɛm mɔ, hɔ ŋgimbi n’ɛnɛ tɛ̀ɛ́ tɛ mɛ ba'm e ŋgɔn.

¹⁵Ɛnɛ tɛ̀ɛ́ sa'm, ɓɛɛ mi kɔ̧ɔ̧ sara, ɛnɛ tɛ̀ɛ́ kpa desee zu tom n’ɛnɛ dee nɛ er'nɛ́.

¹⁶Kinii, ɛ̀nɛ̀ ɓá nɛ oi naŋ-am; k’ɛ́nɛ́ kii mɛ zɔk ɗaŋmɔ kɔ‘m lɛŋ na.

¹⁷Ɛ̀nɛ̀ hɛ́r nú o ɗaŋmɔ kɔ‘m e kɔ̧ ŋgoɓo; ɛ̀nɛ̀ é tumbal zu o yɔɔ kaya kɔ‘m.

¹⁸Kaya mbaŋ mbaŋ ɓɛɛ gbina a nù; kam-ta kin kin yak fara kɔ‘i e duk,

¹⁹yi ɗɔkɔri ta ɗɔkɔri, yì-kórò aŋ mɔka nù aŋ; nɛ́ hegɔ a̧ ɛnɛ ɗaŋ nɛ mɔɔ-e-nɛ-ta ko bíí.

²⁰Ɛ́nɛ́ yó bíí nɛ̀ nù, ɓɛɛ wi’ɛi kur ɓɔna; ɛnɛ kpaia saŋa yí-a, ɓɛɛ ndak a̧ yaknɛ.

²¹Kóó bíí tɛ tu̧ tɛ o bem kɔ̧-a̧ ndé, a̧ iŋ kɔ̧-a̧ na; kóó wa tɛ e wa tɛ geemɔ nde, a̧ iŋ na mbɛt.

²²Kànà nɛ war bɔnɛ kɔ̧-a̧ mɛ tɛ-a a̧ a̧ zɔk, in gɔfa mɔ zu dita see kɔ̧-a̧ ɓɛɛ.