Read Northwest Gbaya JOB 16 Bible Online

JOB 16 - Northwest Gbaya bible

JOB 16

¹Nɛ mɔ'ɔ nɛ Job kifa nú ɓɛɛ tɔ̧:

²Pɛr wen nɔ‘i mi zia war géè ndé kaɗi! Ɛ́nɛ́‘e wi nɛ́ wi-ga̧-see wó, ɓɛɛ ɛ́nɛ́ há̧ k’ɛ́nɛ́ nɛ dita-see.

³Ɛnɛ‘e mi tɛ kaɗi zaŋa nú mɛ gese ge? Ge a̧ ir am mɛ kifi nú hegɔ ge?

⁴K’ɛ̀nɛ̀ duk so fara n'am duk'i, ha̧‘m mɛ duk fara k’ɛ́nɛ́ gáà, mi tɛ̀ɛ́ tɔ̧ pɛrti wen nɔ‘i zu'nɛ́, zɔk nɛ̀ ɛnɛ, mi̧i̧ nɛ̀ zu mbɛt.

⁵Mi tɛ̀ɛ́ bur wen zu'nɛ́, tɔ̧ nɛ géé tum-wen, ha̧ nɛ nɔɔ ŋgiɗi h’ɛ́nɛ́, ga̧ nɛ see'nɛ́ nɛ gba wen mɛ ndàrá nú‘m.

⁶Kɔ‘m, kóó mi tɔ̧ɔ̧ wen, bɔnɛ kɔ‘m kaɗi na; kà‘m dúk nɛ oi nú‘m, bɔnɛ‘i kaɗi na mbɛt.

⁷Ɓɛɛ kinii, mɔ gana zu'm; Sɔ̧ ɗaŋa mɔ nɛ a̧a̧ katɛ‘m lɛŋ yinɛ.

⁸A̧ dee ha̧ sɔnti'm mɛ nik kai siɗi, mɛ usi'e wen a̧a̧ zu'm; ɔ̧ka̧-a̧ kɔ‘m ba nɛ wen zu'm mbɛt.

⁹Nyimsea kɔ̧-a̧ ndak nɛ ɗoŋ-am mɛ gbɔs'am, nin-a bɛŋ nɛ ŋmaa pii tɛ‘m. Yí o wisɛn kɔ‘m gbo nɛ géé wee pii tɛ‘m.

¹⁰Nú-wa ɓa kpooŋ pii tɛ‘m, dara kɔ-wa ye nɛ tɛ‘m hee nyasi ga; wa mɔi̧ nɛ ŋmaa pii zu'm.

¹¹Sɔ̧ ee am nɛ̀ mɔɔ-de-saa ko obem, a̧ pi̧i̧ am er o ɗaŋwi.

¹²Mi duka so keɗeŋ, ɓɛɛ a̧ sakala'm; a̧ baa ger-am nɛ̀ ɗoŋ, gbin nɛ̀ gba̧a̧ tɛ‘m nduku-nduku; a̧ ee am nɛ́ mbélé kɔ̧-a̧.

¹³A̧ ŋgasa'm nɛ̀ góò; ko de a̧ tɛ pi̧i̧ am ti-gun na, a̧ maa pa̧i̧-am a nù.

¹⁴A̧ ee da̧i̧ tɛ‘m zɛlɛgbɛk, a̧ nasa'm hee ŋma wi-biro ga.

¹⁵Mi fura bufu kpe nɛ ndɔla tɛ‘m, ɓɛɛ mi sɔ̧ tɛ‘m nɛ nù.

¹⁶Yí‘m gbɛ̧ɛ̧ fara hi̧a̧ kɔ̧a̧, ɓɛɛ ndàrá yí‘m to ɓurɛ.

¹⁷Ɓɛɛ mɔ kpɔk, ŋma mɔ n'am dee bo na; kɔfa Sɔ̧ kɔ‘m duk nɛ̀ yuwar-a.

¹⁸Nù, ká mɛ kpe zu tɔk tɛ‘m na; ká sara kɔ‘m yambali na.

¹⁹Kinii, mi a̧a̧ nɛ wi-sedaako kɔ‘m sɛn yiwese, wi-yor-ɗoŋ-am a̧a̧ sɛn ŋgɔn mɛ.

²⁰O sɛm kɔ‘m mam nɛ‘m, ɓɛɛ nɛ́ Sɔ̧ a̧‘m hi̧i̧ kɔ̧a̧ sitɛ-a.

²¹Wi-sedaako kɔ‘m a̧ kɛ̧ mgbara wen k’ɛɛ in Sɔ̧, hee mɔ'ɔ nɛ bíí ye nɛ ɗoŋ ŋmaa tɛ kita’ɛ ga;

²²wen pɛ duka-a kɔ‘m bɔ̧i̧ ɓɔna: fara n'am nɛ si sɛnɛ‘i, pia-ɗoŋ bo na.