Read Northwest Gbaya JOB 17 Bible Online

JOB 17 - Northwest Gbaya bible

JOB 17

¹Mi bo nɛ̀ ŋgai ɓɔna; ŋgimbi kɔ‘m hɛɗa yaka-a kaɗi; oi mɔ nɛ ɓɔna ha̧‘m nɛ́ yee kɔ̧-fio ɓɛɛ.

²O wi-zɛkɛɗi-wi kɛra'm e see-a; mi ɔ yá mɛ zɛ tɛ da̧a̧‘m nɛ wa da̧‘i na.

³Ɛ́nɛ́ nɛ̀ tɛ‘nɛ́, ɛ̀nɛ̀ yé ɗoŋ am, GASA WAN. K’ɛ̀nɛ̀ kɔ̧ na, ŋma wi-yor-ɗoŋ-am nɛ́ o?

⁴Ɛnɛ dora o sɛm kɔ‘m mɛ iŋ kpasawen, ɓɛɛ k’ɛ́nɛ́ e ha̧ wa mɛ gan am na.

⁵Hee ŋma bíí nɛ̀ sa o sɛm kɔ‘i mɛ kɛ̧ mɔ, ɓɛɛ o bem kɔ̧-a̧ pɛma war kɔ-wa takaɗi’ɛ ga,

⁶ɛ́nɛ́ ee am nɛ mɔɔ-tɔ̧-tua-wen ko o bíí, ɓɛɛ o bíí a nɛ sap yí‘m.

⁷Dita-see kpee yí‘m, kiitɛ‘m lɛŋ nɛ́ géé hɔɔ-tɛ bíí.

⁸O wi-de-mɔ nɛ yuwar-a ya ɗékéyéké, ɓɛɛ wi nɛ de ɗaŋmɔ na kpa nɛ ɗaŋsee zu ɗaŋwi.

⁹Wi-de-mɔ nɛ yuwar-a a̧ ndak kànà nɛ́ ɗoŋ tom kɔ‘i siti, ɓɛɛ wi nɛ de ɗaŋmɔ na a̧ e nɛ see sɛnɛ siti gan kuti-a mbɛt.

¹⁰Ɓɛɛ nɛ̀ war k’ɛ́nɛ́ lɛŋ, ɛ̀nɛ̀ píí ɗoŋ; mi beka kpa ŋma wi-iŋ-mgbara-mɔ poo'nɛ́ na.

¹¹O wese duka-a kɔ‘m yak yak, ɓɛɛ o mɔ n'am taa so mɛ de ɗaŋa lɛŋ, o mɔ n'am ee so zu-a mɛ de kifa geemɔ.

¹²O sɛm kɔ‘m zɔk zɛ zu'm nɛ́ wese; ŋgimbi nɛ tum ba nù, wa'e mɔ hɛɗa sa̧a̧-a̧ kaɗi.

¹³A̧‘m é ta'm nɛ̀ ge? Ye ko o fio nɛ́ fara-duk kɔ‘m; mi ɗafi nɛ fara-ɔ kɔ‘m sɛn ti-tum mɛ.

¹⁴Mi tɛ tɔ̧ ha̧ pɛsi: «Mɛ́ nɛ́ dáà kɔ‘m!» Ɓɛɛ mi tɛ tɔ̧ ha̧ o dɔk: «Ɛnɛ nɛ́ nàà kɔ‘m in boko-nya'm!»

¹⁵Mɔɔ-e-nɛ-ta kɔ‘m a̧a̧ déè nde? Nɛ́ o'o iŋa oi-aa o nde?

¹⁶A̧ tɛ zir in am si ye ko o fio[13] mɛ? Ɛɛ tɛ ba fara-yaa in ŋmaa lɛŋ ɗɔɔ nù mɛ?