Read Northwest Gbaya JOB 18 Bible Online

JOB 18 - Northwest Gbaya bible

JOB 18

¹Nɛ mɔ'ɔ nɛ Bildad be Sua baa wen, ɓɛɛ tɔ̧:

²Mɛ tɛ kaɗi tɔ̧ɔ̧ wen kɔ-mɛ mɛ gese ge? Mɛ beka e war h’ɛ́ɛ́ mɛ tɔ̧ k’ɛɛ na nde?

³Wen ge mɛ e yɛ hee saɗi ga ge? Mɛ zɔk yɛ hee mgbelewi ga, wen ge?

⁴Kɔ-mɛ, nyimsea kɔ-mɛ sakali nɛ mɛ nɛ̀ tɛ-mɛ! Mɛ ta kɔ-mɛ‘e nɛ́ wen zu-mɛ a̧ nù tɛ kifi nɛ ŋga-gbárà kóó a̧ kam-ta tɛ kin nɛnɛ yinɛ fara kɔ‘i nde?

⁵Sa̧a̧mɔ ko wi-ɗaŋ tɛ bi, wee kɔ̧ tua kɔ̧-a̧ beka ba ɓɔna;

⁶kɔ̧ tua kɔ̧-a̧ tɛ ba tum, lamba tɛ bi zu a̧.

⁷A̧ beka nɛ nɔ̀ nɛ de-a ɓɔna, a̧ tɛ tik tɛ o ee-zu-mɔ kɔ̧-a̧.

⁸Naŋ-a tɛ ba a pi̧ yí yɔk, a̧ tɛ tik lim;

⁹pɛ́r tɛ ba naŋ-a, a̧ tɛ ba mbala;

¹⁰bolo-pɛr-ba a̧‘i a̧a̧ ɗɔɔ nù, sak a̧a̧ yuwar kɔ̧-a̧.

¹¹O mɔɔ-kíì ndak nɛ ɗoŋ-aa, pi̧ nɛ̀ kíì tɛ-a dam fara lɛŋ.

¹²Wɔ tɛ wɔi a̧ mgbélé ŋgimbi n'aa ɓɔna nɛ̀ ŋgai, bɔnɛ tɛ ba fara katɛ a̧.

¹³Ŋga zɛɛ tɛ nyɔŋ o naŋ-a in er-a, ɓɛɛ ndàrà-tɛ-a kaɗa lɛŋ.

¹⁴Wa tɛ zuɗ‘a nɛ kɔ̧ tua kɔ̧-a̧ n'aa e nɛ ta-a'i, ba a̧ sitɛ wan ko o fio.

¹⁵Ŋma bíí tɛ ba tua oi-aa, wa tɛ suk bumui̧ fara kɔ̧-a̧.

¹⁶A̧ tɛ hɔ ŋmaa in ŋma te nɛ kunin-a fee nɛ̀ ɗɔɔ nù, ɓɛɛ o gbaa er-a kor nɛ̀ ŋgɔn.

¹⁷Bíí beka ta mɔ wen-aa tɛ kao’ɛ ɓɔna, ŋma mɔ nɛ tɛ ba nin-a e ŋgɔn zu nù'ɛ bo ɓɔna.

¹⁸Wa tɛ ndak a̧ zu nù'ɛ yinɛ, wa tɛ ir a̧ nɛ tɛ sa̧a̧mɔ pi̧ ti-tum.

¹⁹Nú-bere kɔ̧-a̧ beka nɛ siti ɓɔna; ŋma bezaŋ beka ɓɔn oi-aa na.

²⁰Mɔ nɛ kpaa a̧‘i tɛ pi̧ kíì tɛ o bíí mɛ yee-wese, bele tɛ ba o bíí mɛ daŋa-wese,

²¹ɓɛɛ wa tɛ tɔ̧: «Mɔ nɛ kpa tua ko wi-ɗaŋ, fara ko wi-iŋ Sɔ̧ na, a̧‘i.»