Read Northwest Gbaya JOB 2 Bible Online

JOB 2 - Northwest Gbaya bible

JOB 2

¹Ŋma wese, o betom ko GASA WAN tɛɛ tɛ a̧ mɛ we ɗoŋ tom kɔ-wa ha̧ a̧ woyo, ɓɛɛ wi-ɓir-wen e nú-wi tɛ kana in wa mbɛt.

²GASA WAN aka a̧: «Mɛ tɛ nɛ déè nde?» Ɓɛɛ a̧ kifi nú: «Mi yara so zɔk nɛ nù nɛnɛ.»

³Ɓɛɛ GASA WAN ak a̧‘e: «Mɛ zɔka wi-de-tom kɔ‘m Job nde? Ŋma bíí hee a̧ ga zu nù bo na. A̧ nɛ de bíí in wi-de-mɔ nɛ yuwar-a nɛ yu kíí Sɔ̧ in nɛ duk kɔ‘i nyɛi̧ nɛ ɗaŋmɔ. Mɛ kia war ha̧‘m mɛ de ha̧ a̧ mɛ tik sɔɔ géè; kóó hegɔ mbɛt, a̧ yora nɛ nɔa-a nɛ‘i nyɛm mɛ tɔ̧ ŋma wen zu a̧ na.»

⁴Ɓɛɛ wi-ɓir-wen e nú-wi kifi nú ha̧ GASA WAN: «Nɛ́ kpaamɔ kɔ̧-a̧[2] a̧ gɔna zu a. Bíí tɛ ha̧ dɔka mbɔi lɛŋ wen kia war mɛ kpasi tɛ.

⁵Mi ee mɔ: kinii ɛ̀nɛ̀ nyɛ́í̧ er'nɛ́, ɛ̀nɛ̀ fó mur tɛ-a in o gba̧a̧ tɛ-a; kà a̧ nɛ́ foma'nɛ́ na, ɓɛɛ bó nɛ́ mi a̧ tɔ̧ wen'i na!»

⁶Ɓɛɛ GASA WAN tɔ̧ ha̧ wi-ɓir-wen e nú-wi: «Mi zia. A̧ a̧a̧ ɗɔɔ ŋgai kɔ-mɛ. Mɔ kpɔk, ká mɛ́ fo ɔmi kɔ̧-a̧ na.»

⁷Wi-ɓir-wen e nú-wi kura ti GASA WAN yak ɓɛɛ nɛ́ɛ̀ pi̧ ŋma ɗaŋ zɛɛ-tara tɛ Job nɛ de nɛ da̧i̧ nɛ kɔ naŋ-a hɔ zu-a.

⁸Ɓɛɛ Job ba gbàrà-kpánà kpor nɛ tɛ; fara duk kɔ̧-a̧ nɛ́ zuku-paa.

⁹Kóò kɔ̧-a̧ tɔ̧ɔ̧ ha̧ a̧ ndé: «Mɛ tɛ ɓɔn kànà tɛ ee ta nɛ Sɔ̧ kɔ-mɛ‘i siti nde? Mɛ̀ fóm Sɔ̧‘i, a̧ mɛ̀ fé yinɛ ɓaɗi!»

¹⁰Job kifa nú ha̧ kóò: «Mɛ́ tɔ̧ wen hee wi-dawa ga! K’ɛ̀ɛ̀ nɛ́ kpɛka demɔ nɛ Sɔ̧ ha̧ h’ɛ́ɛ́, ɓɛɛ wen ge, ɛ́ɛ́ beka kpɛk bɔnɛ na ge?» Tɛ́ bɔnɛ nɛ Job zɔk'i, a̧ tɔ̧ ŋma ɗaŋ wen zu Sɔ̧ na.

¹¹O sɛm ko Job taar zia nyɛrɛ bɔnɛ‘i, ɓɛɛ wa tɛ nɛ̀ nù kɔ-wa kpɔk kpɔk; mɛ̀ nɛ́ Elifaz be Teman, Bildad be Sua, in Sofar be Naama. Wa ee nú ha̧ wa mɛ nɛ́ɛ̀ ai nú in a̧ in ha̧a̧ ga̧a̧-see ha̧ a̧.

¹²Tɛ zɔka Job nɛ wa zɔka nɛ nyɛi̧a-a, wa yɔɔ yí-a. Wa lɛŋ hi̧a̧ kɔ̧a̧ nɛ ŋgaya-a, wa a̧ka̧ gba laa kɔ-wa tɛ-wa a nù, wa aa fuunu si yiwese ɓɛɛ pii ɗoŋ a zu-wa.

¹³Wa nɛ̀ɛ́ ya nù katɛ a, wa kur na tɛ zɛ mɔɔrɔ-ɗoŋ-yiitoo. Ŋma bíí kpɔk mgbara wa hu̧i̧ nú tɔ̧ wen sitɛ Job na, wen bɔnɛ ko Job nɛ wa zɔka bó nɛ́ mɔ ha̧ nú-wi mɛ tɔ̧ na.