Read Northwest Gbaya JOB 23 Bible Online

JOB 23 - Northwest Gbaya bible

JOB 23

¹Nɛ mɔ'ɔ nɛ Job kifa nú:

²Mi kɔ̧ɔ̧ so nyɛmna mɛ nyɔŋ nin-am zu gɔfamɔ kɔ‘m, ɓɛɛ sɔsɔɔ aia-nú kɔ‘m[19] ŋgai ŋgai siti.

³Kà‘m íŋ so fara n'am tɛ kpa Sɔ̧ sɛnɛ, mi tɛ̀ɛ́ nɛ hɔ ti damti kɔ̧-a̧.

⁴Mi tɛ̀ɛ́ tɔ̧ mɔ nɛ ba tɛ‘m'i ha̧ a̧; ɓɛɛ mɔ n'am tɛ̀ɛ́ tɔ̧ ha̧ a̧ tɛ̀ɛ́ dɔk.

⁵Mi tɛ̀ɛ́ zii so kifa-nú kɔ̧-a̧ lɛŋ; mi tɛ̀ɛ́ zii mɔ n'aa kɔ̧ɔ̧ mɛ tɔ̧ ha̧‘m!

⁶A̧ tɛ̀ɛ́ ba so nɛ ŋgai duk nɛ̀ zu in am nde? Weyaa, a̧ tɛ̀ɛ́ yeŋ nɛ́ zer-aa tɛ wen kɔ‘m ɛ̧.

⁷Hegɔ, nɛ́ wi de mɔ nɛ yuwar-a a̧ tɛ̀ɛ́ tɔ̧ wen in a̧, ɓɛɛ mi tɛ̀ɛ́ kpasi tɛ wen nɛ tɛ̀ɛ́ ba'm ti wi-gɔn-kita zu'm.

⁸Ɓɛɛ kà‘m nɛ́ si daŋa-wese, a̧ bo hi̧i̧ na, kà‘m nɛ́ si yee-wese, mi zɔk a̧ na mbɛt.

⁹A̧ de nɛ ŋma tom si zu-zan mɛ nde? Mi kpa a̧ hi̧i̧ na. A̧ hu̧sa̧ hu̧si sɛn ndaa-zan nde? Mi zɔk a̧ hi̧i̧ na mbɛt.

¹⁰Mɔ kpɔk, a̧ iŋa yuwar n'am ba lɛŋ; kà a̧ wé‘m, ɓɛɛ mi tɛ gbo nɛ sa̧a̧-a̧ hee lɔr ga.

¹¹Naŋ-am ɓaa so nɛ́ oi pata naŋ-a, ɓɛɛ mi ndak kànà nɛ́ ɗoŋ yuwar kɔ̧-a̧, mi a̧r na mbɛt.

¹²Mi e geŋa kɔ̧-a̧ tɛ geemɔ na; mi kasa so o wen nɛ gboo nɛ nú-a kɔ̧ see-am.

¹³Ɓɛɛ kɔ̧-a̧, mɔ n'aa hoka a̧a̧ sɛnɛ; nɛ́ o'o tɛ tɔ̧ ha̧ a̧ mɛ e mɔ‘i duk o? A̧ de nɛ mɔ nɛ see-aa kɔ̧a̧.

¹⁴A̧ ɗafa mɔ nɛtɛ nɛtɛ e pɛm nɛ mɔ; war kɔ‘m n'aa ɗafa mɛ de in am'i, a̧ tɛ de kànà.

¹⁵Mɛ̀ nɛ́ wen hegɔ kà a̧ dúk katɛ‘m, ɓɛɛ kíì de'm dee; kà‘m tá mɔ sitɛ a̧, ɓɛɛ tɛ‘m naka.

¹⁶Sɔ̧ gbina gba̧a̧ tɛ‘m, Wan nɛ a̧a̧ nɛ ŋgayamɔ lɛŋ pi̧i̧ kíì tɛ‘m.

¹⁷Zu-a'i, mi fe nɛti ha̧ zaŋzɛ mɛ de na; mɔ kpɔk, a̧ dor gba-tum mɛ́ tik zu'm na.[20]