Read Northwest Gbaya JOB 27 Bible Online

JOB 27 - Northwest Gbaya bible

JOB 27

¹Job tɔ̧ɔ̧ siti woyo:

²Nɛ̀ nin Sɔ̧ nɛ duk kpasa, Wan nɛ a̧a̧ nɛ ŋgayamɔ lɛŋ nɛ̀ bɛ̧ gɔna kita zu'm in nɛ̀ ha̧a̧ tu̧u̧-see ha̧‘m,

³ŋgimbi n'am bítí ɔm, nɛ̀ ɔmi ko Sɔ̧ tɛ ɓɔn kànà tɛ‘m,

⁴ndàrá-nú‘m beka tɔ̧ ŋma ɗaŋ wen na, ɓɛɛ leɓ‘am beka de ndela na mbɛt.

⁵Kóó ge, mi beka kpɛk wen k’ɛ́nɛ́ na! Mɔ n'am de na, mi beka kpɛk'e mi dea na hɔ wese fio kɔ‘m.

⁶Mi tɛ yor kànà zu kpasawen kɔ‘m, mi beka e duk na; taamɔ kɔ‘m usi ŋma ɗaŋmɔ n'am dea tɛ duka-a kɔ‘m na.

⁷Mɔ a̧ kpa wisɛn kɔ‘m hee mɔ'ɔ nɛ mɔ kpa nɛ̀ wi-ɗaŋ'ɛ ga! Mɔ a̧ kpa wi-de-ŋmaa in am hee mɔ'ɔ nɛ mɔ kpa nɛ̀ wi-de-ɗaŋmɔ'ɛ ga!

⁸Ɛnɛ‘e, ge a̧ ɗaŋwi tɛ e nɛ ta, ŋgimbi nɛ Sɔ̧ tɛ ba ɔmi yinɛ tɛ-a ge?

⁹Sɔ̧ tɛ zii aia-nú kɔ̧-a̧, ŋgimbi nɛ ŋga bɔnɛ tɛ tik nɛnɛ zu a̧ nde?

¹⁰A̧ bó nɛ́ bíí-duk nɛ desee wen zu Sɔ̧ Wan nɛ a̧a̧ nɛ ŋgayamɔ lɛŋ na, kóó bíí-e-see tɛ kɔfa Sɔ̧ ŋgimbi lɛŋ na mbɛt.

¹¹War-a kɔ‘m, mi usi nɛ ŋgai deemɔ ko Sɔ̧ h’ɛ́nɛ́; mi hu̧si taamɔ ko Wan nɛ a̧a̧ nɛ ŋgayamɔ lɛŋ nɛ̀ ɛnɛ na.

¹²Ɓɛɛ hee mɔ'ɔ nɛ ɛnɛ lɛŋ zɔka mɔ‘i kaɗi ga, wen ge s’ɛnɛ wor mɔ sɔɔ géè ge?

¹³[26] Mɔ nɛ Sɔ̧ Wan nɛ a̧a̧ nɛ ŋgayamɔ lɛŋ e wen wi-ɗaŋ in wi-de-ŋgamɔ nɛ mɔ'ɔ:

¹⁴Kà o bem kɔ-wa nɛ́ dɔka, mɛ̀ nɛ́ wen ha̧ gba-paa mɛ kum wa, o bezaŋ-wa beka kpa mɔɔ-nyɔŋ na.

¹⁵Ŋga zɛɛ tɛ kum oi o bezaŋ-wa, ɓɛɛ o ko-gera kɔ-wa beka hi̧i̧ wa na.

¹⁶Kà wi-ɗaŋ in wi-de-ŋgamɔ nɛ́ kpaa mbɔi hee fuunu ga, kà wa nɛ́ kpaa zɔm dɔka laa hee zɔ̧́[27] ga,

¹⁷wa a̧ mɔi̧ kànà: nɛ́ wi-de-mɔ nɛ yuwar-a a̧ tɛ pi̧ pi̧a-a̧; war ko sede kɔ-wa, nɛ́ wi-de-mɔ nyɛm sɛnɛ a̧ tɛ kai.

¹⁸Tua kɔ-wa nɛ́ géé mbul wanto, nɛ́ géé tua-duk-nɔ̧́í̧-fɔ.

¹⁹O wanmbɔi nɔ‘i ɔ nù mɛ zɛ, ɓɛɛ mɔ kaɗa; kà wa bé tɛ̀ɛ́ tùn, ɓɛɛ yàà, ŋma mɔ bo ɓɔna.

²⁰Gasa kíì ba wa hee mbɛŋ a̧ hu̧ra wa ga, ɓɛɛ mɛ zɛ hara-búk tɛɛ ba wa yinɛ;

²¹gba-búk nɛ̀ tɛ́ nɛ̀ daŋa-wese kaia wa yaknɛ nyɛi̧ nɛ̀ fara kɔ-wa.

²²Sɔ̧ pi̧ nɛ wa, kó bó na, ɓɛɛ wa ye tɛ yuu ŋgai kɔ̧-a̧.[28]

²³Tɛ́ fara kɔ-wa mɛ a̧ o bíí duk sɛnɛ, ɓu nɛ̀ er, dɔm nɛ̀ fɔ̧i̧-desee zu tika-a kɔ-wa.