Read Northwest Gbaya JOB 28 Bible Online

JOB 28 - Northwest Gbaya bible

JOB 28

¹Fara kpa bu-mbɔi, in fara fɔr lɔr a̧a̧ sɛnɛ.

²Wi kpa boi ɗɔɔ nù; wi nɔ̧́í̧ ta, ɓɛɛ wi kpaa ndɛrɛ.

³Wi e wee ti-tum ɗɔɔ ɗuka nù kpɔ̧ɔ̧-kpɔ̧ɔ̧, mɛ kii nɛ ta.

⁴Wan-za̧-lɔr ga̧i̧ tɛ nyak mii nɛnɛ de nɛ tom nyɛi̧ nɛ̀ fara-duk ko o bíí, tɛ ɗuka fara nɛ bíí iŋ na.

⁵Zu nù dɛm kɔ‘i nɛ nyɔnɔ, ɓɛɛ ɗɔɔ nù ɗaŋ lɛŋ ŋa̧a̧ er-wa hee wee a̧ dɔɔ ga.

⁶Tu̧ ta nɛ‘i sa'e Safir a̧a̧ kɔ̧ o ta fara'i, ɓɛɛ fuu lɔr a̧a̧ hi̧i̧ mbɛt.

⁷Yí o tama kɔɓi fara'i na, o nɔ̧́í̧-ba-mɔ iŋ yuwar si sɛnɛ na;

⁸dila ɓir sɛnɛ na, o saɗi-ba-mɔ ba yuwar'i na mbɛt.

⁹Bíí mbaŋ nɛ o ŋga ta; wa za̧ nɛ o gasa kaya hɔ ɗɔɔ-aa mɛ.

¹⁰Kɔ̧ ta mɛ lɛŋ yuwar kɔ-wa aa ŋmaa, ŋma de mɔ nɛ yí-wa yaka zu a bo na.

¹¹Zu-zer gɔna wen zu wa; hegɔ, wa baa mɔ nɛ̀ duk nɛ̀ hu̧sa̧-a̧ e zan.

¹²Ɓɛɛ nɛ̀ war ko iŋa-mgbara-mɔ, wi kpa de? Iŋamɔ duk de?

¹³Mɔ nɛ bíí tɛ ha̧ mɛ kpa nɛnɛ wi iŋ na; kpaa-a zu nù fara nɛ bíí ya sɛnɛ bo na.

¹⁴Ɗuka-fara‘e a̧ bo tɛ̀ wi mɛ na, ɓɛɛ gba-tɔp mbɛt'e, a̧ bo ɗɔɔ wi na.

¹⁵Kóó nɛ̀ kii lɔr, wi nyɛm mɛ hi̧fi nɛnɛ na, kóó nɛ̀ bu-mbɔi na mbɛt.

¹⁶Wi beka ba lɔr mɛ nú Ofir kóó gbɛ̧ ta nɛ‘i sa'e kɔrnalin, kóó tu̧ ta hee gba̧a̧-yí-zan ga nɛ‘i sa'e safir mɛ we nɛ̀ a̧ na.

¹⁷Wi beka ba lɔr, kóó ŋma de toka-mɔ zar-zar ŋgɛ́lɛ́lɛ́[29] we nɛ̀ a̧ na; kpánà nɛ‘i dee nɛ sa̧a̧ lɔr nyɛm a̧ na,

¹⁸kà bó nɛ̀ gba̧a̧-nyaŋa in bu bereŋ ta na mbɛt. Kia-a mɛ kpa iŋa-mgbara-mɔ gana de kísí.

¹⁹Ta nɛ ɔ tara mɛ nú Etiopii nɛ‘i sa'e topaz nyɛm géé nyɛma ŋmaa in a̧ na; de sa̧a̧ lɔr hɛɗi ka̧ tɛ a na.

²⁰Iŋa-mgbara-mɔ tɛ́ bɔɔ nɛ̀ de? Iŋamɔ duk de?

²¹Bíí nyɛm mɛ zɔk a̧ na; o nɔ̧́í̧ zɔk a̧ na mbɛt.

²²Ɗuka-fara [30] in fio'e zer-wi zia kɔ‘i nɛ́ nyɛrɛ-a ɓɛɛ.

²³Nɛ́ Sɔ̧ a̧ iŋa yuwar n'aa tɛ nɛnɛ, nɛ́ a̧ a̧ iŋa fara n'aa duk sɛnɛ;

²⁴wen a̧ zɔk mɔ hɔ nduti nù, ɓɛɛ a̧ zɔka mɔ nɛ a̧a̧ ɗɔɔ yiwese’ɛ lɛŋ.

²⁵Ŋgimbi n'aa wee nɛ búk, in dɔka yì,

²⁶ŋgimbi n'aa ha̧a̧ nɛ heembea ha̧ kórò, in n'aa mbaŋa nɛ yuwar ha̧ pi̧i̧-kórò,

²⁷a̧ zɔka iŋa-mgbara-mɔ; a̧ wee a̧, a̧ mbaɗa a̧, a̧ kia mɔ sɛnɛ lɛŋ,

²⁸ɓɛɛ a̧ tɔ̧ ha̧ bíí: «Yuu kíí GASA WAN nɛ́ iŋa-mgbara-mɔ; yuu ɗaŋmɔ nɛ́ iŋamɔ.»