Read Northwest Gbaya JOB 29 Bible Online

JOB 29 - Northwest Gbaya bible

JOB 29

¹Job tɔ̧ɔ̧ siti woyo:

²Nɛ́ o'o tɛ ba'm pi̧ tɛ ŋgimbi n'am duka so sɛnɛ nɛti, ŋgimbi nɛ GASA WAN pɛma so nɛ‘m,

³ŋgimbi nɛ lamba kɔ̧-a̧ duka so nyɛk nɛnɛ zu'm, nɛ̀ sa̧a̧mɔ kɔ̧-a̧ mgbɔ so nɛ‘m nɛnɛ nɛ ti-tum o?

⁴Ŋgimbi'i mi so nɛ bíí tɛ mɔ lɛŋ, kɔ̧ɔ̧mɔ ko Sɔ̧ duka kɔ̧ tua kɔ‘m.

⁵Wan nɛ a̧a̧ nɛ ŋgayamɔ lɛŋ duka so in am, o be wiwii kɔ‘m ya so zik am.

⁶Gɔtɔ naŋ-am lɛŋ so nɛ fara-kok ko yibere; nɔ̧́ fok so nɛ zaŋ ta gbonɛ ha̧‘m.

⁷Ŋgimbi n'am gbo so si nú ye, mɛ nɛ̀ɛ́ duk sɛn nú gara,

⁸kà o be-ŋgaiwi zɔ́k am, ɓɛɛ wa ee yuwar ha̧‘m, ɓɛɛ o sɔkawi kura yor;

⁹o gasawi kaɗa tɔ̧ɔ̧ wen, kpe nɛ nú-wa nɛ er,

¹⁰ɓɛɛ ger o be-wan kpee si̧nyɔm, leɓe-wa fo mɔ ɓɔna.

¹¹Wi nɛ zii so'm fara tɔ̧ wen zɔn nɛ‘m, bíí nɛ zɔk am lɛŋ tɔ̧ nɛ de wen kɔ‘m.

¹²Mi kpasi so nɛ́ wi-kɔsa nɛ̀ ai nú ak nɛ gbakamɔ, in be-oi nɛ́ bo so nɛ̀ bíí-ɗoŋ-wa na.

¹³Mi dee ha̧ see o ko-gera mɛ de, ɓɛɛ o bíí nɛ hɛɗa mɛ ga̧ tok so nɛ de yoŋgo zu'm.

¹⁴Dee deemɔ nɛ yuwar-a duka so nɛ laa-kpe-tɛ kɔ‘m, deemɔ nɛ yuwar-a so nɛ gba laa kɔ‘m, in mɛtɛwol kɔ‘m.

¹⁵Mi so nɛ gbaayí o wi-zɔk-mɔ na, in naŋ o wi-kum.

¹⁶Mi so nɛ dáà ko o wi-kɔsa, mi gɔn so kita zu o bíí n'am iŋ na nɛ yuwar-a.

¹⁷Mi so nɛ wi-gbin-gba̧a̧-nin wi-de-ɗaŋmɔ, ɓar nɛ mɔ nɛ wa ba yinɛ nú-wa.

¹⁸Taamɔ kɔ‘m so'e mi tɛ sɔk kaɗi sɛka'm fea, zɛ duka-a kɔ‘m tɛ dɔk hee nyɛmɛ ga.

¹⁹Mi duka so hee ŋma te nɛ kunin ye ɗɔɔ yì, ɓɛɛ mɛ zɛ mbɛŋ waia tɛ gbaa er-a’ɛ ga.

²⁰Gásì kɔ‘m tɛ duk siti, ɓɛɛ ŋgaŋa kusaa kɔ‘m tɛ ɓɔn kànà nɛ ŋgaya-a.

²¹Ŋgimbi'i bíí duka so pɛm nɛ‘m mɛ zii mɔ n'am tɛ tɔ̧; wa zii so wen kɔ‘m nɛ oi nú wa.

²²Kà‘m tɔ̧́ wen kaɗi, ŋma bíí mɛ kifi nú sɛnɛ bo na; wen kɔ‘m ye so zer-wa mɔktɛ mɔktɛ hee mɔ'ɔ nɛ mbɛŋ ai nɛnɛ kóɗóŋ-kóɗóŋ'ɛ ga.

²³Bíí duka so pɛm am hee mɔ'ɔ nɛ‘i pɛm nɛ kórò'ɛ ga; nú-wa ɓa pɛm nɛ̀ wen kɔ‘m hee yì-kórò a̧ wa pɛm ga.

²⁴Wa ya so pɛm nɛ mɔ n'am tɛ de lɛŋ sitɛ wa nɛ desee; kà‘m mám mami sitɛ wa, ɓɛɛ wa ta kɔ-wa'e nɛ ɔrmɔ.

²⁵Mi duka nɛ́ gasawi usi nɛ yuwar ha̧ wa; mi duka mgbara wa hee ŋma wannu mgbara o wi-biro kɔ‘i ga, hee wi-ga̧-see o wi-bɔnɛ ga.