Read Northwest Gbaya JOB 3 Bible Online

JOB 3 - Northwest Gbaya bible

JOB 3

¹Nɛ mɔ'ɔ nɛ Job hu̧i̧a̧ nú, fom wese nɛ wa kòó nɛ̀ wi,

²ɓɛɛ tɔ̧:

³Fom a̧ ba wese nɛ wa koo nɛ‘m, in zɛ nɛ naa kɔ‘m baa nɛ zaŋ-am!

⁴Wese'i a̧ ba tum kpɔ̧ɔ̧-kpɔ̧ɔ̧! Tɛ Sɔ̧ nɛ duk ŋgɔn mɛ‘i a̧ bi ɗoŋ wese'i ɓɔn ndo-ndo-ndo; ká sa̧a̧mɔ nyɛk wese'i na.

⁵Gasa tum kpɔ̧ɔ̧-kpɔ̧ɔ̧ in gi̧ɔ̧ a̧ kpe zu wese'i, o tu̧-zan a̧ kpe zu a liŋgɔm; zɛ a̧ gur wese'i nɛ ɗaŋ-a!

⁶Zɛ‘i a̧ ba tum kpɔ̧ɔ̧-kpɔ̧ɔ̧; ká‘i tɔr a zaŋ o dɔka zɛ zaŋ fio-zɛ kóó tɛ pɛ na mbɛt.

⁷Zɛ‘i a̧ duk nɛ ɗaŋ zɛ, ká mɔɔ-nyɛŋɛ bo tɛ zɛ‘i na!

⁸O wi-fom-wese nɛ sa ndiɓa a̧ fom zɛ‘i.

⁹Tɛ zɛ‘i, o sɔra-tuyɛ a̧ ba tum; ká zɛ‘i e ta'e sa̧a̧mɔ tɛ nyɛk na, ká a̧ ta'e ndaa-zan tɛ gɔn na,

¹⁰wen n'aa kpe so nú tua nɛ wa kòó nɛ̀‘m na. Kà a̧ dé so hegɔ, bó nɛ́ mi tɛ̀ɛ́ zɔk so bɔnɛ'ɛ na.

¹¹Gana so a̧‘m fe so ɓɔn kɔ̧ zaŋ nàà kɔ‘m, kóó a̧‘m fe so ɓɔn ti pɛr.

¹²Duka-a gɔn ku bíí dee nɛ ge ha̧‘m ge? Ama-bere dee nɛ ge ha̧‘m ge?

¹³Kà‘m fé so fee gáà, mana mi tɛɛ duk tɛ ga̧a̧mɔ sɛn kɔ̧ pɛsi mɛ; tɛ fea-a'i, mi tɛ̀ɛ́ ɔ ya, ɔm nɛ tɛ

¹⁴in o wannu ba nɛ o gasawi zu nù'ɛ nɛ mboo so o mɔ nɛ ɗàŋá e ŋgɔn woyo;

¹⁵kóó in o be-wan nɛ a̧a̧ nɛ lɔr in mbɔi nɛ duna tua kɔ-wa.

¹⁶Kà‘m hɔ́ so hɔɔ gaa, bó nɛ́ wi tɛ̀ɛ́ iŋ so oi-am na, hee o obem nɛ zɔk wese na si nɛ ɗoŋ'ɛ ga.

¹⁷Ɗaŋ ko o wi-ɗaŋ kaɗi fara'i; nɛ́ hi̧i̧ a̧ o wi nɛ ŋgai kaɗa ɔm tɛ sɛnɛ.

¹⁸O wi-zɔɓɔ ya mɔ kɔ-wa nɛ desee hi̧i̧, wa zii tuɓa da̧ ko o wi-pɛm-wa ɓɔna;

¹⁹o bara bo ɗɔɔ ŋgai ko dáa-bara kɔ-wa ɓɔna mbɛt. Ɛ̧ɛ̧ wi’ɛ nɛ́ gasawi, kóó, i̧i̧ wi’ɛi nɛ́ obem wó, bó fara'i na.

²⁰Sɔ̧ ha̧ sa̧a̧mɔ ha̧ o wi-kɔsa de nɛ ge? A̧ de ha̧ wan-ɗaŋ-see mɛ duk kpasa wen ge?

²¹Wa pɛm fio takaɗi, fio ba wa na; wa kia fio gan mbɔi.

²²Wa a̧ bo so kɔ̧ pɛsi fio gáà, wa tɛ̀ɛ́ ya nɛ desee, de nɛ tortɛ.

²³Wi ha̧ duka-kpasa ha̧ bíí nɛ iŋ yuwar kɔ‘i na de nɛ ge? Nɛ́ wi’ɛi a̧ Sɔ̧ ɓora so mɔ pɛm nɛnɛ!

²⁴Mɔɔ-nyɔŋ kɔ‘m nɛ́ taŋa-kɔ̧a̧; hiɗimɔ-bɔnɛ kɔ‘m gɔn na hee yì nɛ fok’ɛ ga.

²⁵O mɔ n'am dee so kíí-a kpaa'm kaɗi, mɔ n'am yuu so tika zu'm kaɗi.

²⁶Kɔ‘m, ga̧a̧mɔ, duka-a keɗeŋ in ɔma-tɛ bo na, kànà nɛ́ dita see ɓɛɛ.