Read Northwest Gbaya JOB 31 Bible Online

JOB 31 - Northwest Gbaya bible

JOB 31

¹Mi ha̧a̧ so nú tɛ káná mɔ‘e, gbaayí‘m a̧ ká yeŋ be-zɔŋa na.

²Nɛ́ ge mɔ ge a̧ Sɔ̧ ha̧ nɛ̀ yiwese mɛ ge? Ge a̧ Wan nɛ a̧a̧ nɛ ŋgayamɔ lɛŋ ɗafa e nɛ̀ yiwese wen bíí ge?

³Ɛnɛ‘e a̧ ee bɔnɛ wen o wi nɛ de mɔ nɛ yuwar-a na, in ŋgamɔ wen wi-de-ɗaŋmɔ.

⁴Ɓɛɛ war kɔ‘m, a̧ iŋa naŋanɔ kɔ‘m, a̧ iŋa oi naŋ-am lɛŋ.

⁵Mi nɛ̀ɛ́ nɔ̀ zu ndela nde? Naŋ-am kpàná nɔ̀ wen zu̧u̧ mɔ nde?

⁶Sɔ̧ a̧ we'm tɛ de mɔɔ-we-mɔ, ɓɛɛ a̧ tɛ iŋ ndé, mi de ŋma ɗaŋmɔ na.

⁷Kà‘m nɛ́ a̧ra̧ tɛ yuwar kɔ̧-a̧, kà see-am nɛ́ dee wɔ-mɛ nɛ yí‘m zɔk, kà ŋma ndiŋ a̧ baa er-am,

⁸mi nɛ́ guna mɔ, ɓɛɛ nɛ̀ ŋma bíí nɛtɛ à̧ nyɔ́ŋ nyɔŋa-a; wa a̧ zuɗi o be-te n'am ŋmaa.

⁹Kà wɔ kóò ko ŋma'm nɛ́ dea'm, kà‘m nɛ́ pɛma a̧ ɗoŋ nú tua kɔ̧-a̧,

¹⁰kóò kɔ‘m a̧ de tom hɔ̧na fuu ha̧ ŋma bíí, ɓɛɛ bíí à̧ ɔ́ in a̧ mbɛt,

¹¹wen mɔ‘i nɛ́ ɗaŋ mɔɔ-búù, nɛ‘i tɛ̀ɛ́ gɔn kita zu-a.

¹²Mɔ‘i tɛ̀ɛ́ duk nɛ́ ŋma wee nɛ tɛ̀ɛ́ ɗaŋ am ɗaŋ yinɛ, ɗaŋ nɛ̀ waya-mɔ kɔ‘m lɛŋ hɔ gun-aa mɛ.

¹³Kà‘m nɛ́ bìì so zu wen ko wi-de-tom, in ko kó-de-tom kɔ‘m ŋgimbi nɛ wa a̧a̧ so nɛ̀ wen in am,

¹⁴nɛ́ ge a̧‘m tɛ de ŋgimbi nɛ Sɔ̧ bé tɛ̀ɛ́ kur in am ge? A̧ bé tɛ̀ɛ́ ak mɔ, nɛ́ ge a̧‘m tɛ kifi nú sɛnɛ ha̧ a̧ ge?

¹⁵Sɔ̧ nɛ dee am pi̧ kɔ̧ zaŋ á̧ dee wa mbɛt; nɛ́ kpɔk a̧‘i a̧ ɓoo yɛ lɛŋ.

¹⁶Mi bɛ̧ɛ̧ so kɔfamɔ ko o wi-kɔsa nde? Mi dee so ha̧ yí ko-gera mɛ́ gar nɛ̀ mi̧i̧kɔ̧a̧ nde?

¹⁷Só nɛ́ ɛ̀n’ám a̧‘m nyɔŋ so nɛ mɔ kɔ‘m, ɓɛɛ be-oi kpa war kɔ‘i na nde?

¹⁸Weyaa, ká‘m bítí nɛ̀ bem mɛ, a̧‘m dai nɛ̀ a̧; koa'm pi̧ nù hegɔ a̧‘m kù̧ú̧ nɛ̀ naŋ gbaka ko-gera.

¹⁹Wi-kɔsa nɛ̀ bo so nɛ̀ laa na, in wisan nɛ̀ mɔɔ-kpe-tɛ bo so na

²⁰tok so de yoŋgo zu'm, wen laa-buma-sami kɔ‘m n'am kpe so nɛ tɛ-wa na nde?

²¹Kà‘m nɛ́ nasa be-oi, wen n'am iŋa'e o bíí-yor-ɗoŋ-am ti kita a̧a̧ sɛnɛ wó,

²²tɔlɔ-ɓaa'm a̧ nyun, ɓɛɛ ɓaa'm a̧ gbin nyɛm nɛ gbɛŋgɛlɛ-a.

²³Wen mi yu so nɛ́ usa bɔnɛ ko Sɔ̧, ɓɛɛ mi nyɛm mɛ yor ti gasamɔ kɔ̧-a̧ na.

²⁴Kà‘m é so ta nɛ̀ lɔr, kà‘m tɔ̧́ so a̧ nɛ́ mɔɔ-duk-tɛ kɔ‘m,

²⁵kà desee kɔ‘m lɛŋ dúk so zu dɔka mbɔi kɔ‘m in o kpaamɔ kɔ‘m,

²⁶kóó kà‘m zɔk so de nyɛka wese, in de daŋa-a ko nyaŋa-zɛ,

²⁷ha̧ see-am mɛ ba wa, ha̧‘m mɛ́ gbɛ zugur-am[35] nù gasi nɛ wa,

²⁸mɔ‘i tɛ̀ɛ́ duk nɛ yɔɔ-kaya nɛ‘i tɛ̀ɛ́ gɔn kita zu-a, wen nɛ́ káfá Sɔ̧ nɛ̀ duk ŋgɔn mɛ.

²⁹Mi dee so tortɛ wen tika-a ko wi-sɛn-am nde? Mi dee so nyɛŋɛ ŋgamɔ nɛ̀ kpaa a̧ nde?

³⁰Leɓ‘am de ɗaŋmɔ, fom nɛ a̧ gbákná a̧ fee na mbɛt.

³¹Ge gɛnɛ ge nɛ tɛ so kɔ̧ tua kɔ‘m ɓɛɛ tɔ̧ɔ̧‘e wi nyɔŋ kpoo zaŋ sur na nɛ́ o?

³²Mi e so ha̧ o gɛnɛ mɛ ɔ ɓɔn zan na; nú tua kɔ‘m duk so nɛ hu̧i̧a̧-a̧ ha̧ o wi-nɛ-gɛnɛ.

³³Mi hu̧si so ɗaŋmɔ kɔ‘m hee o ŋma bíí ga[36] na; mi hu̧si so yɔɔ-kaya kɔ‘m kɔ̧ see-am na,

³⁴wen mi de so kíì giiwi na; mi yu so zɛkɛɗa-wi ko o bíí ha̧‘m mɛ kpe nú‘m hu̧si nɛ̀ tɛ‘m kɔ̧ tua kɔ‘m na.

³⁵Ho! O'o tɛ zii am o? Sɔŋkur wen kɔ‘m nɛ mɔ‘i. Wan nɛ a̧a̧ nɛ ŋgayamɔ lɛŋ a̧ kifi nú ha̧‘m.

³⁶Nɛ̀ war ko baa-wen zu'm'i, mi kpɛka mɛ tui tui-a; mi tɛ hɛr mɔ‘i zu'm hee mɔɔ-wan ga.

³⁷Mi tɛ we ɗoŋ naŋanɔ kɔ‘m lɛŋ ha̧ Sɔ̧; mi tɛ yor ti a̧ nɛ tu̧u̧-tɛ hee be-wan ga.

³⁸Mi nɛ́ dee so ha̧ fɔ kɔ‘m mɛ ku̧i̧ mɔ zu'm, mi nɛ́ dee ha̧ nù nɛ‘i gaia mɛ hi̧i̧ kɔ̧a̧,

³⁹mi nɛ́ nyɔŋa waya-tom er o wi-de-tom sɛnɛ géè, gbɛ nɛ̀ wa kaɗi,

⁴⁰ɓɛɛ nɛ̀ nù‘i à̧ dɛ́m nɛ o ɗaŋ tɛn-te in o sɛ̧ɛ̧-zɔ̧, nɛ̀ bó nɛ́ alkamaari in be-fon[37] na. Sɔŋkur wen ko Job nɛ́ mɔ‘i!