Read Northwest Gbaya JOB 32 Bible Online

JOB 32 - Northwest Gbaya bible

JOB 32

¹O bíí nɔ‘i taar'i ee kifa nú ha̧ Job duk, wen nɛ̀ Job tɔ̧ɔ̧‘e ndé, wi nɛ́ wi-de-mɔ nɛ̀ yuwar-a.

²See Elihu bem ko Barakɛl be Buz, nú-gara ko Ram nyima. A̧ dee nyimsea in Job wen nɛ̀ Job ta'e, wi dee mɔ nɛ yuwar-a gan Sɔ̧.

³Ɓɛɛ see-aa ɗaŋ in o sɛm kɔ̧-a̧ nɔ‘i taar'i mbɛt, wen nɛ̀ wa iŋ so kifa nú ha̧ Job nɛ de-a na, ɓɛɛ dúk hee Sɔ̧[38] dee ɗaŋmɔ ga.

⁴Elihu tɔ̧ wen ha̧ Job nɛti na wen nɛ̀ o dɔka-a nɔ‘i taar'i gana so a̧ nɛ̀ pɛ.

⁵Ŋgimbi nɛ̀ Elihu zɔka'e, o wi nɔ‘i bo nɛ̀ kifa-nú ɓɔna, see-aa nyima.

⁶Nɛ mɔ'ɔ nɛ Elihu baa wen ɓɛɛ tɔ̧: Mi nɛ́ be-ŋgaiwi, ɓɛɛ k’ɛ́nɛ́, ɛ́nɛ́ nɛ́ o gasawi; hegɔ, kíì de so nɛ‘m, mi yu so nɛ mɔ mɛ tɔ̧ mɔ n'am iŋa h’ɛ́nɛ́.

⁷Mi taá so, nɛ́ gasawi a̧ tɛ́ tɔ̧ wen, nɛ́ wi nɛ̀ a̧a̧ nɛ̀ dɔka pɛ a̧ tɛ usi iŋa-mgbara-mɔ;

⁸mɔ kpɔk, nɛ̀ ɔmi nɛ́ duk tɛ bíí, nɛ́ ɔmi ko Wan nɛ a̧a̧ nɛ ŋgayamɔ lɛŋ a̧ ha̧ iŋamɔ.

⁹Bo nɛ́ kpaa dɔka pɛ a̧ ha̧ iŋa-mgbara-mɔ na, kóó sɔki a̧ de ha'i mɛ kɛ̧ mgbara mɔ nɛ̀ duk nɛ̀ yuwar-a ɓɛɛ na.

¹⁰Nɛ́ hegɔ sa'm tɔ̧‘e, ɛ̀nɛ̀ zíí wen kɔ‘m; mi kɔ̧ɔ̧ mɛ usi mɔ n'am iŋa.

¹¹Mi pɛma so nɛ́ wen k’ɛ́nɛ́, mi yeŋa zer-am tɛ o taamɔ k’ɛ́nɛ́.

¹²Mi ga̧a̧ tɛ‘m zii nɛ̀ wen k’ɛ́nɛ́, ɓɛɛ ŋma bíí nɛ̀ kifa kpasa nú ha̧ Job bo na; ŋma bíí kifi nú nyɛm yí wen kɔ̧-a̧ na.

¹³K’ɛ́nɛ́ tɔ̧́‘e, wi kpaa iŋa-mgbara-mɔ na; k’ɛ́nɛ́ tɔ̧́‘e nɛ́ Sɔ̧ a̧ nyɛma kifa nú ha̧ a̧, nɛ̀ bó nɛ́ bíí na, na.

¹⁴Bó nɛ́ Job tɔ̧ɔ̧ wen kɔ̧-a̧ ha̧‘m na, ɓɛɛ bó nɛ́ kpɔk kifa nú k’ɛ́nɛ́ a̧‘m tɛ́ tɔ̧ nɛ̀ wen ha̧ a̧ na.

¹⁵Wen bó nú-wa ɓɔna, wa kifi nú ɓɔna, wen kaɗa kɔ̧ nú-wa.

¹⁶Mi pɛma mɔ ha̧ wa tɔ̧ wen wó, takaɗi; ŋma mɔ nɛ̀ wa tɛ́ tɔ̧ wa iŋ ɓɔna.

¹⁷Nɛ́ mi a̧‘m tɛ ha̧ war kifa nú kɔ‘m kinii; mi mbɛt, mi tɛ usi mɔ n'am iŋa.

¹⁸Mi a̧a̧ nɛ̀ mɔ nɛ dɔka-a mɛ tɔ̧; wen daŋ nɛ‘m kinii.

¹⁹Kɔ̧ zaŋ-am mɛ dúk hee dɔ̧ɔ̧́ a'i kpee nú-a e sɛnɛ ga, duk hee mbe kpáná-dɔ̧ɔ̧ a̧ kɔ̧ɔ̧ mɛ mbaŋ ga.

²⁰Mi tɛ tɔ̧ wen ha̧ tɛ‘m mɛ ga̧; mi tɛ hu̧i̧ nú‘m mɛ kifi nú.

²¹Ɓɛɛ bó nɛ́ mi tɛ ye nɛ́ ɗoŋ ŋma bíí na; mi beka mbɔŋgɔli bíí na.

²²Wen mi iŋ mbɔŋgɔla bíí na; à̧ bó só hegɔ, wi nɛ̀ dee am gbɛɛ so'm yinɛ kaɗi.