Read Northwest Gbaya JOB 33 Bible Online

JOB 33 - Northwest Gbaya bible

JOB 33

¹Kinii, Job, mɛ̀ zíí wen n'am tɛ tɔ̧; mɛ̀ yéŋ zer-mɛ tɛ o wen kɔ‘m lɛŋ.

²Mi tɛ hu̧i̧ nú‘m ha̧ wen mɛ gbo nɛ̀ kɔ̧ war ger-am kinii.

³Nɛ́ mɔ nɛ duk nɛ yuwar-a nɛ a̧a̧ kɔ̧ see-am a̧‘m tɛ́ tɔ̧; kànà nɛ́ kpasawen a̧‘m tɛ́ tɔ̧ ɛ̧́.

⁴Nɛ́ ɔmi ko Sɔ̧ a̧ dee am; nɛ́ ɔmi ko Wan nɛ a̧a̧ nɛ ŋgayamɔ lɛŋ a̧ de ha̧‘m mɛ duk kpasa.

⁵Mɛ́ nɛ́ nyɛma mɛ́ kifi nú ha̧‘m, mɛ̀ ɗáfí tɛ-mɛ nɛ̀ de-a, a̧ mɛ̀ kifi!

⁶Mɛ̀ zɔ̀k, ti Sɔ̧ mi nyɛma ŋmaa in mɛɛ; nɛ́ nù a̧ wa dee nɛ‘m mbɛt.

⁷Hegɔ, ká kíí tɛ‘m de mɛ na; ká mɛ ta'e mi tɛ nasi nɛ mɛ nɛ̀ ŋgai kɔ‘m na.

⁸Wen'i nɛ̀ mɛ́ tɔ̧a̧, nɛ̀ ɓɔna wora-a kɔ̧ zer-am'e,

⁹wi nɛ sa̧a̧ bíí, wi bo nɛ̀ ɗaŋmɔ na; war-tɛ-wi ɔ sa̧a̧, ŋma ɗaŋmɔ bo zu-wi na,

¹⁰ɓɛɛ nɛ́ Sɔ̧ a̧ gɔn tɛ̀ ɓir nɛ̀ wen e nú-wi, zɔk nɛ̀ wi hee wisɛn ga,

¹¹pi̧ nɛ̀ poka naŋ-wi, mbaɗi nɛ̀ o naŋanɔ kɔ‘i lɛŋ wó‘i,

¹²mi tɛ kifi nú sɛnɛ ha̧ mɛ‘e, mɛ́ yɔɔ kaya, wen Sɔ̧ gana bíí.

¹³Ɓɛɛ wen ge mɛ pi̧ wen zu a̧, a̧ n'aa bó nɛ́ wi-ha̧-kifa nú zu o deemɔ kɔ̧-a̧ na ge?

¹⁴Sɔ̧ a̧a̧ nɛ̀ yuwar tɔ̧ɔ̧ wen kɔ‘i nɛtɛ nɛtɛ, ɓɛɛ nɛ́ bíí a̧ kɔɓi na ɛ̧́.

¹⁵A̧ tɔ̧ wen ha̧ bíí nɛ̀ ɔɔ-zu in nɛ̀ hɔɔ-zu mɛ zɛ, ŋgimbi nɛ̀ ɗuka ya ba nɛ̀ bíí gɔn yara,

¹⁶ɓɛɛ a̧ hu̧i̧a̧ nú tua zer-aa mɛ mbaŋ tɛ-a pi̧ nɛ kíì tɛ-a,

¹⁷wen ha̧ wi’ɛi mɛ e yuwar deemɔ kɔ‘i duk, in ká a̧ tɛ̀ɛ́ ŋmaŋ tɛ-a mbɛt.

¹⁸Nɛ́ hegɔ a̧ Sɔ̧ dor nɛ a̧ kɔ̧ war-ger-fio,[39] in tɛ nɛa-a si nú kɔ̧-fio.

¹⁹Ŋma ɓɛɛ Sɔ̧ usa mɔ ha̧ bíí tɛ nyimmɔ-zɛ́ɛ́ nɛ̀ ba tɛ wi’ɛi gɔn yara, ŋgimbi nɛ̀ o gba̧a̧ tɛ-a lɛŋ nyim nɛnɛ.

²⁰Kɔ̧ nú wi’ɛi ɔ nyɔ̧ɔ̧ na, de nyɔŋmɔ n'aa kɔ̧ɔ̧ so nɛti de tɛ-a ɓɔna.

²¹A̧ ɔ̧k nɛ gbaayí gbaayí, o gba̧a̧ ŋgazi-a lɛŋ ya zan.

²²Duka-a kɔ̧-a̧ hɛɗa ká̧ nú kɔ̧-fio; duka-kpasa kɔ̧-a̧ a̧a̧ kɔ̧ er o wi-gbɛ-bíí.

²³Ɓɛɛ kà ŋma betom mɛ yiwese kpɔk mgbara o dɔka-a booro nɛ́ bòò mɛ́ àm mɔ, usi nɛ yuwar mɔ nɛ wi’ɛi tɛ de,

²⁴de nɛ̀ ko ha̧ a̧, tɔ̧ nɛnɛ ha̧ Sɔ̧‘e: «K’ɛ́nɛ́ e ha̧ a̧ mɛ zir si kɔ̧ fio na, mi kpaa mɔ mɛ gɔn nɛ̀ zu a,»

²⁵ɓɛɛ kpoo-tɛ wi’ɛi tɛ kpa ŋgai, tɛ-a tɛ pii ɗoŋ hee wan mɛ ŋgimbi daŋa ŋgaiwi kɔ̧-a̧ ga.

²⁶Kà a̧ áí nú ha̧ Sɔ̧ ɓɛɛ Sɔ̧ kpɛka; ɓɛɛ a̧ kpiɗa nɛ̀ desee sɛn ti Sɔ̧ nɛ̀ dee ha̧ a̧ mɛ pii ɗoŋ duk nɛ yuwar-a woyo.

²⁷A̧ tɛ bìì gima ti o bíí tɔ̧ nɛnɛ‘e: «Mi dee so ɗaŋmɔ, mi yɔɔ kaya deemɔ nɛ yuwar-a, zu-a'i, Sɔ̧ de mɔ in am hee war kɔ‘m ga na.

²⁸A̧ baa'm yinɛ nú kɔ̧ fio, ɓɛɛ duka-a kɔ‘m a̧a̧ tɛ sa̧a̧mɔ.»

²⁹War ɔ dɔka, Sɔ̧ de mɔɔ nɔ‘i lɛŋ ha̧ bíí

³⁰dak nɛ bíí yinɛ nú kɔ̧ fio, ba nɛ a̧ e tɛ sa̧a̧mɔ ko o wi nɛ ya kpasa.

³¹Job, mɛ̀ yéŋ zer-mɛ, mɛ̀ zíí wen kɔ‘m, mɛ̀ dúk nɛ̀ oi nú-mɛ ha̧‘m tɔ̧ wen.

³²Kà mɛ̀ nɛ́ bòó nɛ̀ ŋma wen mɛ̀ tɔ̧, mɛ̀ kífí nú ha̧‘m; mi kɔ̧ɔ̧ nyɛmna ha̧ wen kɔ-mɛ mɛ́ yor.

³³Ɓɛɛ wen nɛ́ bòò nú-mɛ ɓɔna, mɛ̀ yéŋ zer-mɛ tɛ wen kɔ‘m; mɛ̀ dúk nɛ oi nú-mɛ ha̧‘m usi iŋa-mgbara-mɔ ha̧ mɛ.