Read Northwest Gbaya JOB 34 Bible Online

JOB 34 - Northwest Gbaya bible

JOB 34

¹Elihu tɔ̧ɔ̧ siti:

²Ɛ́nɛ́ o wi-iŋ-mgbara-mɔ, ɛ̀nɛ̀ zíí wen kɔ‘m; ɛ̀nɛ̀ yéŋ zer'nɛ́, ɛ́nɛ́ o wi-iŋ-mɔ.

³Wen nɛ́ zer-wi a̧ kɛ̧ mgbara wen, hee mɔ'ɔ nɛ kɔ̧ nú-wi kpa nɛ nyɔ̧ɔ̧ nyɔŋmɔ'ɛ ga.

⁴Ɛ̀ɛ̀ kíí mɛ kɛ̧ mgbara mɔ nɛ duk nɛ yuwar-a; mi in'nɛ̀ɛ́, ɛ̀ɛ̀ kíí mɛ iŋ mɔ nɛ duk nɛ de-a.

⁵Job'e wi de ŋma ɗaŋmɔ na, ɓɛɛ nɛ́ Sɔ̧ a̧ de mɔ in wi nɛ yuwar-a na.

⁶Tɛ kia deemɔ kɔ‘i nɛ yuwar-a, wa ba wi e tɛ wi-ndela, wi de ɗaŋmɔ na, zu-a'i, góò pi̧i̧ wi sar.

⁷Ŋma bíí hee Job ga a̧a̧ sɛnɛ? A̧ tɔ̧ ɗaŋ wen hee yì a̧ a̧ nɔ ga.

⁸A̧ nɛ́ nɔ̀ kpɔk in o wi-de-ɗaŋmɔ; kpɔk yuwar ko o wi-ɗaŋ a̧ a̧ ba.

⁹A̧‘e, «Ŋma mɔ nɛ bíí kpa oi duka-a nɛ de-a in Sɔ̧ bo na.»

¹⁰Ɛ́nɛ́ o wi-zii-mɔ, ɛ̀nɛ̀ zíí wen kɔ‘m! Sɔ̧ de ɗaŋ na! Wan nɛ a̧a̧ nɛ ŋgayamɔ lɛŋ de gɔɔmɔ na!

¹¹A̧ de mɔ in bíí nyɛm nɛ ɗoŋ tom ko wi’ɛi; a̧ ha̧ mɔ ha̧ bíí nyɛm nɛ mɔ nɛ wi’ɛi de.

¹²Nɛ mbetɛ, Sɔ̧ bó nɛ́ wi-de-ɗaŋ na, Wan nɛ a̧a̧ nɛ ŋgayamɔ lɛŋ yɔ́ kaya deemɔ nɛ yuwar-a na.

¹³Ŋma bíí a̧a̧ sɛnɛ nɛtɛ nɛ ee nù er-a nde? Ŋma bíí a̧a̧ sɛnɛ ee nɛ tom zɔka kao er-a nde?

¹⁴Kà a̧ tá so nɛ mɔ kɔ̧-a̧ wen zu-a mɛ tɛ-a ɓɛɛ, dak nɛ ɔmi kɔ̧-a̧ siɗoŋ sitɛ-a,

¹⁵mɔ nɛ ya kpasa lɛŋ tɛ̀ɛ́ kum war kpɔk; bíí tɛ̀ɛ́ si ɗoŋ tɛ fuunu.

¹⁶Job, hee mɔ'ɔ nɛ mɛ nɛ́ wi-iŋ-mɔ ga, mɛ̀ yéŋ zer-mɛ tɛ wen kɔ‘m.

¹⁷Wi-sɛ̀n-dee-mɔ nɛ yuwar-a nyɛma mɛ ɔ wan nde? Hee ge mɛ tɛ ba wen zu zɔm gasa bíí ko wan-aa, Wan-de-mɔ nɛ yuwar-a ge?

¹⁸Wi nɛ̀ nyɛma mɛ́ tɔ̧ ha̧ wannu: «Hoo! Yokoɗo-o!» nɛ́ a̧ kpɔk. Nɛ́ a̧ á̧ nyɛma mɛ tɔ̧ ha̧ o gasawi: «Ɛnɛ́ nɛ́ o wi-gbɛ-zu.»

¹⁹A̧ ye ɗoŋ o be-wan na; a̧ kɛ̧ mgbara wanmbɔi in wisan na, wen wa lɛŋ nɛ́ a̧ á̧ dea.

²⁰Kóó mɛ ɗuka zaŋzɛ, bíí a̧ fe'i. Kà o bíí kúr, ɓɛɛ gasawi yɔa; kóó wi foo o ŋga wan na mbɛt, wa tika.

²¹Sɔ̧ zɔk nɛ deemɔ ko bíí; a̧ mbaɗi nɛ naŋanɔ kɔ-wa.

²²Kóó nɛ́ gba tum kpɔ̧ɔ̧-kpɔ̧ɔ̧ hee tum-fio ga nyɛm mɛ hu̧si o wi-de-ɗaŋmɔ yí-a na.

²³Sɔ̧ ɓa ɗoŋ bíí nɛ nyɛi̧a-a, sɛka wi’ɛi hɔɔ ti a̧ ti kita na.

²⁴A̧ beka kii ndaa-mɔ kaɗi sɛka a̧ ndaka o gasawi yinɛ e nɛ mbe bíí oi wa na.

²⁵A̧ iŋa tom kɔ-wa; tɛ zɛ kpɔk a̧ ira wa á nù, ɓɛɛ ɓaa kɔ-wa á̧ kaɗa'i.

²⁶A̧ gusi wa sɛn yí-bíí lɛŋ hee mɔ'ɔ nɛ‘i de in o wi-de-ɗaŋmɔ ga.

²⁷O wi nɔ‘i kɔ̧ so mɛ ndak ɗoŋ-aa ɓɔna; wa bɛ̧ɛ̧ yuwar kɔ̧-a̧ lɛŋ.

²⁸Hiɗimɔ-bɔnɛ nɛ wa usi ha̧ o wi-kɔsa mɛ daŋ hɔ tɛ-a; a̧ zii aia-nú ko o bíí nɛ wa nasi zii.

²⁹Zu-a'i, kà ŋma wen ko Sɔ̧ bó só kɔ‘i sɛnɛ na, nɛ́ o'o tɛ tɔ̧ wen zu a̧ o? Kà a̧ bá yí-a hu̧si, nɛ́ o'o tɛ zɔk a̧ o? Mɔ kpɔk, a̧ zɔk nù nɛ de-a in bíí mbɛt;

³⁰a̧ kpɛk ha̧ o wi-iŋ-sɔ̧-na mɛ ɔ wan na, wen ká wa tɛ̀ɛ́ tui pɛ́r ha̧ gii wi.

³¹Kà ŋma bíí tɔ̧ ha̧ Sɔ̧‘e, wi zɔka bɔnɛ oi ɗaŋmɔ kɔ‘i, wi beka de woyo ɓɔna;

³²Sɔ̧ nɛ tɛ-a, a̧ a̧ usi o wan nɛ‘i iŋ na, kà‘i nɛ́ dee mɔ de na, ha'i e duk wó,

³³tɛ taamɔ kɔ-mɛ, Sɔ̧ a̧ usi bɔnɛ oi-aa nde? Mi iŋa mɛ kpɛk na, ɓɛɛ hee mɛ a̧ tɛ hok, bo nɛ mi na ga, mɛ̀ tɔ̧́ nɛ́ mɔ nɛ̀ mɛ́ iŋa.

³⁴O wi-zii-mɔ tɛ kifi nú ha̧‘m, in o wi-iŋ-mɔ nɛ zii wen n'am tɔ̧‘i tɛ tɔ̧:

³⁵«Job tɔ̧ wen nɛ tum; gba̧a̧ wen kɔ̧-a̧ bo na.»

³⁶Kɔ‘m, wa a̧ we Job hɔ sɔŋkur-aa ha̧ a̧ kifi taamɔ kɔ̧-a̧ piiɗoŋ, wen zu tɔ̧ɔ̧ wen kɔ̧-a̧ hee ɗaŋwi ga.

³⁷Zu yɔɔ-kaya kɔ̧-a̧, a̧ dee ŋgazu e sɛnɛ, pi̧ nɛ̀ sii-kafɛ mgbara yɛ, ba nɛ̀ wen zu Sɔ̧ siti.