Read Northwest Gbaya JOB 35 Bible Online

JOB 35 - Northwest Gbaya bible

JOB 35

¹Elihu tɔ̧ɔ̧ siti woyo:

²Mɛ‘e, wen kɔ‘i ɔ sa̧a̧ tɛ tɔ̧a̧-a̧ nɛ mɛ tɔ̧‘e, wi dee mɔ nɛ yuwar-a gan Sɔ̧, nde?

³Wen mɛ‘e, kóó wi dee ɗaŋmɔ, kóó wi de ɗaŋmɔ na, nɛ́ kpɔk mɔ yí-a.

⁴Kɔ‘m, mi tɛ kifi nú h’ɛ́nɛ́, in o sɛm kɔ-mɛ.

⁵Mɛ̀ mbáɗí yiwese mɛ̀ zɔ̀k; bó nɛ́ o tura-zan kusa gan mɛ nyɛmna na nde?

⁶Kà mɛ̀ dé ɗaŋmɔ, mɔ‘i ba nɛ tɛ Sɔ̧ nde? O ŋgazu kɔ-mɛ de kɔ‘i nɛ́ ge ha̧ a̧ ge?

⁷Ŋma mɔ n'aa kpa in nɛ̀ gbak a̧ tɛ deemɔ kɔ-mɛ nɛ yuwar-a, nɛ́ ge?

⁸Nɛ́ o ŋma-mɛ a̧ zɔk bɔnɛ ɗaŋ kɔ-mɛ; deemɔ kɔ-mɛ nɛ yuwar-a gbak nɛ o bíí hee mɛ ga.

⁹Gɔfamɔ tɛ nasa ŋmaa in hiɗimɔ gbo nɛ ɗɔɔ er o gasawi.

¹⁰Ɓɛɛ ŋma bíí mɛ tɔ̧‘e, Sɔ̧-e-wi nɛ̀ de h’ɛ́ɛ́ mɛ bìì gima mɛ zaŋzɛ,

¹¹nɛ̀ usi mɔ h’ɛ́ɛ́ gan o saɗi zu nù, in nɛ̀ de h’ɛ́ɛ́ mɛ iŋ mgbara mɔ gan o nɔ̧́í̧ mɛ yiwese, a̧a̧ déè ndé wó'ɛ, bo na.

¹²Hegɔ, kóó ɛɛ aia nú sitɛ a̧, a̧ beka kifi nú na, wen zu saka-yí ko o wi-ɗaŋ.

¹³Nɛ́ o géé tum-wen a̧ Sɔ̧ Wan nɛ a̧a̧ nɛ ŋgayamɔ lɛŋ zii mɛ kifi nú sɛnɛ na, ɓɛɛ.

¹⁴Mɛ‘e, wen kɔ‘i lɛŋ a̧a̧ ti a, wi pɛm kànà nɛ a̧, ɓɛɛ wi iŋ oi-aa na;

¹⁵kifa-er-nyimsea kɔ̧-a̧ bo na, a̧ pi̧ nú tɛ ɗaŋmɔ ko bíí na.

¹⁶Bura wen ko Job nɛ́ géé búk; gba̧a̧ wen-aa bo na.