Read Northwest Gbaya JOB 36 Bible Online

JOB 36 - Northwest Gbaya bible

JOB 36

¹Elihu tɔ̧ɔ̧ siti:

²Mɛ̀ gá̧ tɛ-mɛ a̧ mɛ̀ pɛ́m mɔ tikiɗi ha̧‘m usi mɔ ha̧ mɛ; ŋma wen a̧a̧ sɛnɛ ha̧‘m mɛ tɔ̧ wen Sɔ̧.

³Mi tɛ nɛ̀ɛ́ kii iŋa-mgbara-mɔ kɔ‘m nɛ nyɛi̧a-a, mɛ si kafɛ oi nú wi nɛ dee am.

⁴Wen kɔ‘m bó nɛ́ ndela na; mɔ n'am yor zu a mɛ tɔ̧ ha̧ mɛ‘i, mi iŋa.

⁵Sɔ̧ ɔ gasa, a̧ e bíí tɛ geemɔ na; a̧ a̧a̧ nɛ̀ ŋgai, a̧ kpai taamɔ[40] kɔ̧-a̧ na.

⁶A̧ e ha̧ wi-ɗaŋ mɛ duk kpasa na; a̧ gɔn kita nɛ yuwar-a ha̧ wi-kɔsa.

⁷A̧ zik ɗoŋ-aa ha̧ o wi-de-mɔ nɛ yuwar-a na; a̧ e wa kpɔk fara in o wannu zu damti, mɛ ya tɛ gasamɔ ɓɔnsɛnɛ.

⁸Kà poka nɛ́ yee naŋ bíí, kà ŋgamɔ nɛ́ kpaa wa,

⁹ɓɛɛ nɛ́ Sɔ̧'ɔ̧ usi tom kɔ-wa nɛ wa dee so ha̧ wa hegɔ, wen wa ŋmaŋa so tɛ-wa ti a̧.

¹⁰A̧ tuɓi nɛ da̧ mbaŋ nɛ tɛ-wa, tɔ̧ nɛnɛ‘e wa a̧ é ɗaŋmɔ dúk.

¹¹Kà wa nɛ́ zia wen'i mbo nɛ zu, wa tɛ fe tɛ bɔtɛ, ɓɛɛ pɛ kɔ-wa kaɗa zaŋ desee.

¹²Kà bó hegɔ na, wa tɛ kum;[41] wa tɛ fe lɛŋ, wa iŋ mgbara-a na.

¹³Ɓɛɛ nɛ̀ ko o ɗaŋwi nɛ̀ nyimsea kɔ-wa ŋgaia see-wa, wa gɔm er ha̧ Sɔ̧ ŋgimbi n'aa usi nɛ̀ bɔnɛ ha̧ wa[42] na.

¹⁴Wa fee nɛ̀ ŋgaiwi; mɔ kpaa wa hee fio ko wi-de-dàlà[43] ga.

¹⁵Ɓɛɛ nɛ́ bɔnɛ á̧ Sɔ̧ bá gbó nɛ̀ wi nɛ zɔk bɔnɛ; nɛ́ tɛ usa bɔnɛ a̧ a̧ dak nɛ zer wi-kɔsa.

¹⁶Mɛ mbɛt, a̧ kɔ̧ɔ̧ so mɛ ba mɛ yinɛ fara-bɔnɛ, e tɛ gasa fara-yɔli ha̧ o de nyɔŋmɔ mɛ kpe zu taŋge kɔ-mɛ lɛŋ.

¹⁷Ɓɛɛ kà mɛ dák kita pi̧ zu mɛ, wen nɛ tɛ́ ba mɛ‘i tɛ kai o mɔɔ nɔ‘i yinɛ er-mɛ.

¹⁸Ká ɗaŋsee-bɔnɛ ír mɛ pi̧ tɛ ŋgazu na; ká mɛ ɔr tɛ-mɛ yɔ nɛ kaya'e mbɔi kɔ-mɛ tɛ gbo mɛ na.

¹⁹O mbɔi in o kìì lɔr, kóó nɛ ŋgai tɛ-mɛ beka nyɛm na.

²⁰Ká mɛ e tɛ-mɛ pɛm nɛ zɛ nɛ̀ o dukbíí tɛ yɔ nɛnɛ na mbɛt.

²¹Ká mɛ zik tɛ-mɛ sitɛ ɗaŋmɔ na; nɛ́ wen ká mɛ tɛ tik sɛnɛ à̧ mɛ zɔ́k nɛ̀ bɔnɛ.[44]

²²Mɛ̀ zɔ̀k! Sɔ̧ ɔ gasa in ŋgayamɔ kɔ̧-a̧; ge wi-usi-mɔ ge a̧ tɛ gan a̧ ge?

²³O a̧ tɛ tɔ̧ wen zu duka-a kɔ̧-a̧ o? Ge bíí ge a̧ tɛ tɔ̧ ha̧ a̧‘e, a̧ de mɔ de na, ge?

²⁴Ká tɛ-mɛ bi ɗoŋ zɔna tom kɔ̧-a̧ nɛ o bíí gasi e nɛ gima na.

²⁵Bíí lɛŋ zɔk nɛ tom'i; wa ya nɛ nyɛi̧a-a mbaɗi nɛnɛ.

²⁶Sɔ̧ ɔ gasa nyɛmna, ɓɛɛ ɛɛ iŋ gasa-a kɔ̧-a̧ hɔ ndaa-a na; bíí nyɛm mɛ tɔr pɛ-a na.

²⁷Nɛ a̧ a̧ mɔi̧ yì, de nɛnɛ mɛ kifi tura-zan,

²⁸mɛ hɔ nɛ kórò a zu o bíí zaŋnu.

²⁹Tura-a ko zan in tuɓa-kórò, nɛ́ o a̧ nyɛma mɛ iŋ mgbara-a o?

³⁰Mɛ̀ zɔ̀k, nɛ́ Sɔ̧ a̧ de ha̧ kórò mɛ pi̧ zu wa,[45] in nɛ́ a̧ a̧ hura ndaa o gba-tɔp nɛ yì.

³¹Nɛ́ wa a̧ a̧ ba gɔn nɛ kita zu o dukbíí, ha̧ nɛ nyɔŋmɔ nɛ dɔka-a mbɛt.

³²Kɔ̧ er-a yiitoo lɛŋ nɛ́ pi̧i̧-kórò a̧ duk sɛnɛ; fara n'aa kɔ̧a̧ lɛŋ a̧ toma wa si sɛnɛ.

³³Dika-kórò usi nɛ tɛa-a kɔ̧-a̧; o gii mɔ-dai mbɛt iŋa ŋgimbi n'aa hɛɗi mɛ tɛ.