Read Northwest Gbaya JOB 37 Bible Online

JOB 37 - Northwest Gbaya bible

JOB 37

¹Yí see-am to too kpɛl-kpɛl, ɓɛɛ ŋmana kɔ̧ a̧ mɛ.

²Ɛ̀nɛ̀ yéŋ zer'nɛ́, ɛ̀nɛ̀ zíí dika ger-a; ɛ̀nɛ̀ zíí géé tuɓa-a n'aa tuɓi.

³A̧ dik dam yiwese lɛŋ, pi̧i̧-kórò kɔ̧-a̧ gɔma hɔ nduti nù mɛ.

⁴Ɓɛɛ tiger-a mgbimgbi; wi zii nɛ tuɓa ger-a. Ŋgimbi nɛ giti a̧ de mɔ, a̧ dor o mbaŋa-kórò ɓɔna.

⁵Sɔ̧ túɓí, ɓɛɛ hiɗi-wi gɔna; a̧ de nɛ o gasamɔ n’ɛɛ iŋ mgbara-a na.

⁶Ŋgimbi n'aa tɔ̧ ha̧ ɓɔrɔ mɛ ai a nù, ŋgimbi n'aa de ha̧ zɔm kórò mɛ zuɗi,

⁷ɓɛɛ a̧ dora o bíí tɛ tom kɔ-wa; hegɔ ɓɛɛ o bíí n'aa dea kpa mɔɔ-de na.

⁸O boko-nam mbɛt sii ɗoŋ si fara kɔ‘i; ɓɛɛ wa hu̧sa̧ kɔ̧ di̧i̧ kɔ-wa.

⁹Gba búk-kórò gbo nɛ̀ fara kɔ‘i mɛ tɛnɛ, ɓɛɛ gɛ̧ɛ̧ yuu yírírí nɛ ká̧-zan-mɛ́-ŋgɔn.

¹⁰Kà Sɔ̧ ɔ́m, ɓɛɛ yì kifa ɓɔrɔ; ɓɛɛ zu yì ŋgaia hee boi ga.

¹¹A̧ a̧ de ha̧ kórò mɛ kok tɛ o tura-zan; ɓɛɛ a̧ pɛsa wa dam fara lɛŋ nɛ̀ oi pi̧i̧-kórò,

¹²tur nɛnɛ ɗɔɔ ŋgai kɔ̧-a̧, wen ha̧ wa mɛ de mɔ lɛŋ n'aa usa ha̧ wa zu nù.

¹³Kóó nɛ́ pi̧i̧ bɔnɛ, kóó nɛ́ dea-a ha̧ kórò mɛ hɔ a zu nù, kóó nɛ́ toka de yoŋgo zu a̧, nɛ́ wa à̧ à̧ tóm.

¹⁴Job, mɛ̀ tá mɔ tɛ o mɔɔ nɔ‘i; mɛ̀ gá̧ tɛ-mɛ, mɛ̀ zɔ́k o mɔɔ-gɔn-ɗɛɗɛ ko Sɔ̧.

¹⁵Mɛ́ iŋa hee ge Sɔ̧ tom nɛ wa, de nɛnɛ ha̧ pi̧i̧-kórò mɛ tok mgbara tura-zan ga nde?

¹⁶Mɛ́ iŋa yuwar tom n'aa de ha̧ o bu-zan mɛ ga̧i̧ ŋgɔn, ɓɛɛ tik nù na’ɛ nde? O mɔɔ-gɔn-ɗɛɗɛ nɔ‘i kana nɛ́ ko Wan nɛ a̧a̧ nɛ kpasa iŋamɔ.

¹⁷Mɛ́ nɛ̀ tɛ-mɛ ɓan na gbɛŋa ɗɔɔ laa ŋgimbi nɛ̀ wee-búk mɛ ká̧-zan-mɛ́-ɗɔɔ yu nɛnɛ, ɓɛɛ ká gɛ̧ɛ̧mɔ baa nɛ nù'ɛ.

¹⁸Mɛ gbaka a tɛ ɗafa gba̧a̧-yí-zan nɛ ŋgaya-a hee boi nɛ ɔ yɔka ha'i mɛ zɔk yí-wi sɛnɛ ga nde?

¹⁹Mɛ̀ úsí mɔ n’ɛɛ nyɛma mɛ tɔ̧ ha̧ Sɔ̧ ha̧‘m. Ɛɛ bó nɛ̀ kifa nú mɛ ha̧ na wen ɛɛ ya ti-tum.

²⁰Wi mbaŋ tɛ-a sɛka a̧ iŋa'e, mi tɔ̧ nɛ wen, na; wi beka tɔ̧ tɔ̧ɔ̧ ha̧ a̧ sɛka a̧ iŋa na mbɛt.

²¹Hee gɔma-yí ga, wi zɔk sa̧a̧mɔ ɓɔna, wen tura-zan kpee yiwese; kà búk yú ɓɛɛ ndaka tura-zan yinɛ.

²²Sa̧a̧mɔ tok nɛ̀ ká̧-zan-mɛ́-ŋgɔn mɛ tɛnɛ zar-zar hee lɔr ga; gasamɔ ko Sɔ̧ nɛ̀ dúk nɛ́ mɔɔ-kíì nyɛmna zika a.

²³Ɛɛ nyɛm mɛ hɔ katɛ Wan nɛ a̧a̧ nɛ ŋgayamɔ lɛŋ na; gásì kɔ̧-a̧ a̧a̧ tɛ ŋgai in tɛ deemɔ nɛ yuwar-a kɔ̧-a̧. A̧ de ŋgamɔ in wi nɛ de mɔ nɛ yuwar-a na.

²⁴Mɛ̀ nɛ́ wen hegɔ, o bíí tɛ yu a̧; ɓɛɛ a̧ pi̧ nú tɛ o wi nɛ tɔ̧‘e, wi nɛ wi-iŋ-mgbara-mɔ, na.