Read Northwest Gbaya JOB 38 Bible Online

JOB 38 - Northwest Gbaya bible

JOB 38

¹GASA WAN kifa nú ha̧ Job nɛ ti gba búk-kórò hee mɔ'ɔ ga:

²Nɛ́ ge bíí ge a̧ ɗaŋ ee-zu-mɔ kɔ‘m, tɔ̧ nɛ wen nɛ bíí iŋ zu-a na’ɛ ge?

³Mɛ̀ yór nɛ̀ wiwii; mi tɛ ak mɛ, ɓɛɛ mɛ̀ kífí nú ha̧‘m.

⁴Mɛ́ duka so déè ŋgimbi n'am dee nɛ nù ge? Kà mɛ nɛ́ iŋa, ɓɛɛ nɛ mɛ̀ tɔ̧́ ha̧‘m, wen mɛ́ iŋa mɔ nyɛmna.

⁵Nɛ́ o'o wee naŋ nù o, mɛ iŋa nde? Nɛ́ o'o pi̧i̧ nyak yɔr nɛ naŋ-a o?

⁶O naŋ nù duk zu ge? Nɛ́ o'o ee ta-mgbii-aa,

⁷ŋgimbi nɛ o sɔra-tuyɛ a nɛ nú tɛ gima, in o betom ko Sɔ̧ lɛŋ bíí nɛ gima nɛ desee o?

⁸Nɛ́ o'o kpee nú tua e zu tɔp ŋgimbi n'aa ŋmai̧a nɛnɛ gbonɛ kɔ̧ zaŋ nàà kɔ̧-a̧ o?

⁹Nɛ́ mi a̧ pi̧i̧ kutu tɛ-a hee laa ga, in mi a̧ kpee tɛ-a nɛ tura-zan hee kúfa ga.

¹⁰Mi a̧ gɔna so heembea dor nɛ ŋgai-kin-tɛ-a, mi a̧ mana so o nú tua-a,

¹¹tɔ̧ nɛnɛ: «Mɛ tɛ́ tɛ hɔ hɛ̧ɛ̧, ɓɛɛ mɛ beka yak siti na; ŋmaŋa-tɛ kɔ-mɛ[46] tɛ kaɗi hɛ̧ɛ̧.»

¹²Nɛ̀ mɛ̀ dúk nɛnɛ‘i, mɛ ha̧a̧ nú kóó war kpɔk ha̧ wese mɛ kur nde? Mɛ usa fara ha̧ gɔna ndaa-zan

¹³wen ha̧ a̧ mɛ kasi nù nɛ ka̧ nú-a, ŋmɛkɛsi nɛ o wi-ɗaŋ nde?

¹⁴Nɛ́ tɛ ŋgimbi'i a̧ nù gbo nɛnɛ, hee dap nɛ‘i gɔn zaŋ kpáná-gìì ga; ɓɛɛ mɔ lɛŋ zu nù gboo a zan hee de goia-laa ga.

¹⁵Ŋgimbi'i sa̧a̧mɔ ko o wi-ɗaŋ bia, ɓɛɛ er nɛ wa hu̧i̧a̧ nɛ ŋgɔn gbina.

¹⁶Mɛ hɔɔ fara nɛ gba-tɔp gbo nɛnɛ tɛnɛ nde? Mɛ yara hɔ nduti ɗuka-fara nde?

¹⁷Mɛ zɔka nú tua ko fio nde? Mɛ zɔka nú tua gba tum-fio kpɔ̧ɔ̧-kpɔ̧ɔ̧ nde?

¹⁸Mɛ iŋa gasa nù nde? Mɛ̀ tɔ̧ wen-aa, wen mɛ́ iŋa o mɔɔ nɔ‘i lɛŋ.

¹⁹Fara ko sa̧a̧mɔ a̧a̧ si de? Ye ko tum a̧a̧ déè?

²⁰Mɛ̀ nɛ́ɛ̀ kíí wa fara kɔ-wa mɛ tɛnɛ kà mɛ nɛ́ iŋa yuwar-nɛ sitɛ kɔ-wa.

²¹Mɛ́ tɛ iŋ mɔ‘i lɛŋ wen wa baa ko so mɛ kaɗi; zɛ duka-a kɔ-mɛ dɔka batɛ.

²²Mɛ yee fara ko o ɓɔrɔ[47] zɔk nde?

²³Mi ɗafa so wa e wen ŋgimbi bɔnɛ, wen wese ŋgamɔ in wese biro.

²⁴Sa̧a̧mɔ gbo tɛnɛ nɛ̀ ge fara ge? Búk mɛ ndaa-zan yu tɛnɛ nɛ̀ déè nde?

²⁵Nɛ́ o'o mbaŋa yuwar ha̧ yì-kórò o? Nɛ́ o'o pi̧i̧ war ha̧ dika-zan o?

²⁶Nɛ́ o'o de ha̧ kórò mɛ hɔ a zu nù nɛ bíí bo sɛnɛ na o, in a zu ŋga-gbárà nɛ̀ bó nɛ́ fara-duk ko bíí na o?

²⁷Kórò‘i de ha̧ nù fara'i mɛ mɔk, ha̧ o mɔ mɛ hɔ in ha̧ o zɔ̧ mɛ ɓɔ hi̧i̧.

²⁸Kórò a̧a̧ nɛ dáà kɔ‘i nde? Nɛ́ o'o de ha̧ mbɛŋ mɛ hui o?

²⁹Nàà ko ɓɔrɔ nɛ o? Mbɛŋ nɛ ba gɛ̧ɛ̧ kifi ɓɔrɔ, nɛ́ o'o dea o?

³⁰Nɛ́ mɔ‘i a̧ de ha̧ yì mɛ ŋgai hee ta ga, ɓɛɛ zu yì ɔ kpoe-kpoe.

³¹Mɛ nyɛma mɛ hɛr Gbaayí-be-zɔŋa kóó bura Hɛr-paa nde?

³²Mɛ nyɛma mɛ de ha̧ o zuduk sɔra mɛ gbo tɛ́ ŋgimbi-a, in foo o gasa sɔra gú nɛ̀ o be-a gbonɛ nde?

³³Mɛ iŋa heembea mɔ mɛ́ yiwese? Nɛ́ mɛ́ a̧ ha̧a̧ ŋgai ha̧ o sɔra zu nù nde?

³⁴Mɛ nyɛma mɛ tɔ̧ wen ha̧ tura-zan ɓɛɛ gba kórò hɔɔ a zu mɛ nde?

³⁵Nɛ́ mɛ a̧ de ha̧ kórò mɛ pi̧, ɓɛɛ o pi̧i̧-kórò tɔ̧ɔ̧ ha̧ mɛ: «Ɛɛ a̧a̧ hɛ̧ɛ̧» nde?

³⁶Nɛ́ o'o ha̧a̧ iŋamɔ ha̧ gata-kɔra o? Nɛ́ o'o ha̧a̧ iŋa-mgbara-mɔ ha̧ desa[48] o?

³⁷Nɛ́ o'o tɛ mɔi̧ o tura-zan gbai nɛ̀ o dak-yì mɛ yiwese,

³⁸ha̧ fuunu mɛ kifi ɓɔtɛ, ɓɛɛ o kìí-nù[49] lata ŋmaa o?

³⁹Nɛ́ mɛ a̧ gbɛ saɗi ha̧ nana dila nde? Nɛ́ mɛ a̧ ha̧ nyɔŋmɔ ha̧ o be dila,

⁴⁰nɛ̀ wa mgbuti nù kɔ̧ kɔ-wa, hu̧si nɛnɛ ti mɔ nde?

⁴¹Nɛ́ o'o kii nyɔŋmɔ ha̧ o gba-kɔra, ŋgimbi nɛ o bem kɔ-wa ai nɛ nú sitɛ Sɔ̧, tik nɛ̀ ŋgata o?