Read Northwest Gbaya JOB 39 Bible Online

JOB 39 - Northwest Gbaya bible

JOB 39

¹Mɛ iŋa ŋgimbi nɛ o gbadua zu kaya ko nɛnɛ? Mɛ zɔka o zambɛrɛ[50] fara koa-a?

²Mɛ tɔra zɛ zaŋ kɔ-wa dam lɛŋ? Mɛ iŋa ŋgimbi nɛ wa ko nɛnɛ nde?

³Wa gu ko nɛ̀ bem, ɓɛɛ zaŋ-wa kaɗa nyima-a.

⁴Kà gba̧a̧-tɛ o bem kɔ-wa ŋgáí, kà wa gásí mɔ kɔ-wa ɛ̀nɛ́-wa kaɗi, ɓɛɛ wa yaka, wa pii ɗoŋ tɛ nàà kɔ-wa ɓɔna.

⁵Nɛ́ o'o bura tuifuu-zaŋbɛɛ ha̧ a̧ mɛ yak yar nɛnɛ sɔɔ géè o?

⁶Gbárà nɛ́ fara n'am ha̧a̧ ha̧ a̧; nù tɔŋ nɛ́ fara-ɔ kɔ̧-a̧.

⁷A̧ mam kɔ̧-a̧ nɛ o gasa giti mɔ mɛ saaye; a̧ zii tuɓa da̧ ko wan-tuifuu na.

⁸A̧ yar nɛ mgbara kaya kii nɛ be mbɔɗi zɔ̧ wen nyɔŋa-a: fara-nyɔŋ-mɔ kɔ̧-a̧ nɛ́ mɔ‘i.

⁹Nám tɛ kɔ̧ mɛ de tom ha̧ mɛ, kóó ɔa-a kɔ̧ tua nɛ̀ mɛ̀ á o mɔ-dai kɔ-mɛ sɛnɛ nde?

¹⁰Mɛ tɛ pi̧ kpáŋá ger-a, ha̧ a̧ mɛ wa fɔ kɔ̧ ɗɔŋgɔ ha̧ mɛ nde?

¹¹Mɛ tɛ e ta nɛ a̧ wen nɛ a̧ ɔ ŋgaya, ɓɛɛ mɛ ee tom kɔ-mɛ ha̧ a̧ mɛ de nde?

¹²Mɛ tɛ e ta-mɛ nɛ a̧ ha̧ a̧ mɛ mɔi̧ nyɔnɔ kɔ-mɛ a kɔ̧ dam nde.

¹³Ndao gɔm ɓaa nɛ desee, ɓɛɛ wɔr-ɓaa-a in buma tɛ-a de hee war ko nɔ̧́í̧-gba-dɔya ga na.[51]

¹⁴A̧ pi̧ o kui kɔ̧-a̧ mbɔɗɔnu, ɓɛɛ a̧ ee ha̧ wee-nù mɛ de ha̧ wa mɛ mbaŋ.

¹⁵A̧ ta'e naŋ bíí nyɛma mɛ gba wa, kóó saɗi zaŋbɛɛ nyɛma mɛ i̧si̧ wa mbaŋ na mbɛt.

¹⁶A̧ de mɔ in o bem kɔ̧-a̧ hee gɔni nàà ga; wen kɔ̧-a̧ bo tɛ bɔnɛ n'aa zɔka géè na.

¹⁷Wen nɛ̀ Sɔ̧ dɔɔ a̧ nɛ iŋa-mgbara-mɔ; a̧ kɛ̧ ŋma iŋamɔ ha̧ a̧ na.

¹⁸Mɔ kpɔk, kà a̧ kúr mɛ ma yí, nyaŋa in wan kɔ‘i nɛ geemɔ ti a.

¹⁹Nɛ́ mɛ a̧ ha̧ ŋgai ha̧ nyaŋa? Nɛ́ mɛ a̧ de ha̧ dɛdɛ mɛ hɔ gun ger-a?

²⁰Nɛ́ mɛ a̧ de ha̧ a̧ mɛ kpíɗí hee gbarŋgaɗi ga nde? Hiɗimɔ-duk-tɛ kɔ̧-a̧ nɛ mɔɔ-pi̧-kíì tɛ-wi.

²¹A̧ nɔn nù zu ŋgai kɔ̧-a̧ nɛ desee kɔ̧ ɗɔŋgɔ, ma nɛ yì si nú boi-biro.

²²Wen kɔ̧-a̧ bo nɛ̀ kíì in bele na; a̧ yu mɔ ti gba-paa na.

²³Yi gba-paa in labo tok see zu a, giti ɓaro de mɔ gɔn see-aa.

²⁴Kà a̧ zíí dɔma mbia, a̧ yor ɓɔna; tɛ-a nak, ɓɛɛ a̧ bu̧i̧ bu̧i̧.

²⁵Tɛ giti mbia, a̧ ufa zɔ̧ɔ̧-a̧a̧; ɓɛɛ só ɓéé nɛ̀ nyɛi̧a-a, a̧ kɔɓa biro, in tuɓa da̧ ko o gasawi bá nɛ̀ gayamɔ-biro kaɗi.

²⁶Nɛ́ tɛ iŋamɔ kɔ-mɛ a̧ fambɛɛ hu̧i̧ nɛ ɓaa-a si ka̧-zan-mɛ́-ɗɔɔ, wen ha̧ mbe buma tɛ-a mɛ hɔ woyo nde?

²⁷Nɛ́ tɛ ha̧a̧nú kɔ-mɛ a̧ zua[52] bu̧i̧ nɛnɛ nɛ̀ kusa-a, in a̧ a̧ de nɛ yaa kɔ̧-a̧ mgbara ta zu kaya mɛ nde?

²⁸A̧ ɔ kɔ̧ ta; fara-duk kɔ̧-a̧ nɛ ndɔŋ zu kaya mɛ.

²⁹A̧ duk hi̧i̧ zɔk nɛ mɔ nɛ nyɛi̧a-a, kii nɛ̀ saɗi n'aa tɛ ba.

³⁰O bem kɔ̧-a̧ nyɔŋ nɛ tɔk-saɗi zaŋ sur; fara lɛŋ nɛ̀ wɔr-mɔ[53] a̧a̧ sɛnɛ, a̧ a̧a̧ hi̧i̧.