Read Northwest Gbaya JOB 4 Bible Online

JOB 4 - Northwest Gbaya bible

JOB 4

¹Elifaz be Teman baa wen ɓɛɛ tɔ̧:

²Géé wéé mɛ́[3] nɛ GASA WAN wèè war kpɔk, nɛ mɔ'ɔ nɛ mɛ tika kaɗi’ɛ! Kà‘i tɔ̧́ wen ha̧ mɛ, mɛ tɛ kpɛk? Ɓɛɛ wi tɛ duk nɛ oi nú-wi hee ge?

³Mɛ duka nɛ wi-usi-mɔ ha̧ o bíí, mɛ duka so nɛ wi-ha̧-ŋgai ha̧ o bíí nɛ kpa ŋgai na.

⁴Tɔ̧ɔ̧-mbɔrɔ kɔ-mɛ duka so ba o bíí nɛ yo nù e ŋgɔn, ha̧ nɛ ŋgai ha̧ o wi nɛ zugur mɔk.

⁵Ɓɛɛ kinii, hee mɔ'ɔ nɛ war kɔ-mɛ hɔɔ zu mɛ ga, mɛ́ nɔ́ ŋgiɗi ɓɔna; mɔ kpaa mɛ, ɓɛɛ kíì ba nɛ mɛ.

⁶Hee mɔ'ɔ nɛ mɛ mboo so zu ha̧ Sɔ̧ ga, in hee mɔ'ɔ nɛ mɛ dee so mɔ nɛ yuwar-a ga, bó nɛ mɛ tɛ̀ɛ́ nɔ ŋgiɗi e nɛ ta nɛ Sɔ̧ na nde?

⁷Mɛ̀ íŋ ndé, nɛ́ ge bíí ge nɛ‘i nyɛm mɛ tɔ̧ ŋma wen zu a na a̧ nyɛma mɛ fe ge? Nɛ́ ge wi-de-mɔ nɛ yuwar-a ge a̧ nyɛma mɛ yɔ ge?

⁸Mɔ n'am iŋa nɛ́ mɔ'ɔ: o wi-wa-fɔ-ɗaŋmɔ in o wi-pɛ-kpar-bɔnɛ tɛ mɔi̧ kànà nyɔnɔ-a.

⁹Géé búk mɛ kɔ̧ nú Sɔ̧ nɛ yu a tɛ wa géè, ɓɛɛ wa fea, in géé ɔma-a nɛ kɔ̧ zɔ̧ɔ̧-a̧a̧ sitɛ wa géè mbɛt, ɓɛɛ wa kuma.

¹⁰Dila hiɗi mɔ gbo ɓɔna, o nin bao-dila gbina.

¹¹Dila fee wɔ, ɓɛɛ o be dila pɛsi sót-sót.

¹²Ŋma wen yee zer-am nɛ hu̧sa̧-a̧, zer-am kɔɓa ŋma ku̧i̧amɔ.

¹³Mɛ zɛ, ŋgimbi nɛ‘i ɔ nɛ zu, ŋgimbi nɛ ya ba nɛ o bíí,

¹⁴ŋma gasa kíì baa'm, ɓɛɛ tɛ‘m lɛŋ nak.

¹⁵Ŋma búk yuu a yí‘m, ɓɛɛ o buma tɛ‘m lɛŋ kur.

¹⁶Wi’ɛi hɔɔ yor, ɓɛɛ mi iŋ ti a na; a̧ ɓɔna kànà fara yora-a yí‘m. Mɔ duka selele, ɓɛɛ ŋma tiger tɔ̧:

¹⁷«Bíí nɛ̀ ɔm ɔm nyɛma mɛ de mɔ nɛ yuwar-a gan Sɔ̧ nde? Bíí nyɛma mɛ duk nɛ sa̧a̧ a̧ gan wi nɛ dee a̧ nde?

¹⁸O wi-de-tom ko Sɔ̧ nɛ Sɔ̧ e nɛ ta na, o betom kɔ̧-a̧ n'aa zɔk de mɔ nyɛm sɛnɛ na mbɛt’ɛ,

¹⁹kà bó nɛ̀ géé bíí n'aa dee nɛ nù, nɛ mur tɛ-wa nɛ fuunu sɔɔ géè, nɛ‘i nyɛma mɛ mbɔli hee géé kokoɗo mɔ ga’ɛ nde!

²⁰Kuma-a kɔ-wa nɛ́ gɔma-yí, ɓɛɛ wa yambala, wi iŋ oi wa ɓɔna.

²¹Bó nɛ́ wi daka te-tɔn-tua kɔ-wa yinɛ na nde? Wa fea, wa iŋ mgbara mɔ na.»