Read Northwest Gbaya JOB 40 Bible Online

JOB 40 - Northwest Gbaya bible

JOB 40

¹GASA WAN saa Job, ɓɛɛ ak a̧:

²Wi nɛ̀ si kafɛ in Wan nɛ a̧a̧ nɛ ŋgayamɔ lɛŋ'ɛ a̧a̧ nɛ ŋma wen mɛ tɔ̧ zu'm nde? Wi nɛ̀ kpɛr in Sɔ̧'ɛ a̧ kífí nú!

³Ɓɛɛ Job kifi nú ha̧ GASA WAN:

⁴Mi só nɛ́ ò mɛ kifi nú h’ɛ́nɛ́ o? Mi mana nú‘m.

⁵Mi tɔ̧ɔ̧ so wen nɛti, ɓɛɛ mi beka tɔ̧ mbe-a ɓɔna; mi tɔ̧ɔ̧ so wen nɛ dɔka-a, ɓɛɛ mi nyɛm mɛ tɔ̧ siti na.

⁶Ɓɛɛ GASA WAN kifi nú ha̧ Job nɛ ti gba búk-kórò mɛ hee mɔ'ɔ ga:

⁷Mɛ̀ yór nɛ̀ wiwii; mi tɛ ak mɛ, ɓɛɛ mɛ̀ kífí nú ha̧‘m.

⁸Mɛ kɔ̧ɔ̧ mɛ e gɔna kita kɔ‘m hee geemɔ ga, ha̧ mɛ mɛ ba wen zu'm ha̧ wen kɔ-mɛ yor nde?

⁹Te er-mɛ a̧a̧ nɛ̀ ŋgai hee kɔ‘m ga nde? Ger-mɛ mgbimgbi mgbimgbi hee kɔ‘m ga nde?

¹⁰Mɛ̀ gáɓí tɛ-mɛ nɛ tu̧u̧-tɛ-mɔ in gásì; mɛ̀ pí̧ gasamɔ in zɔnamɔ tɛ-mɛ.

¹¹Nyimsea kɔ-mɛ à̧ kúr, mɛ̀ zɔ́k yí o wi-ŋmaŋ-tɛ ha̧ gba̧a̧ tɛ-wa gbin;

¹²mɛ̀ mbáɗí o wi-ŋmaŋ-tɛ ha̧ foe ba wa; mɛ̀ mbɔ́lí o wi-ɗaŋ ɓɔ́n bɛɗɛ.

¹³Mɛ̀ á wa lɛŋ ɗɔɔ fuunu war kpɔk, mɛ̀ kár wa nɛ dere.

¹⁴Hegɔ mi nɛ tɛ‘m tɛ zɔn mɛ, wen mɛ gana wa nɛ ŋgai te er-mɛ.

¹⁵Mɛ̀ zɔ́k ŋgùɓú:[54] Mi dee a̧ hee mɔ'ɔ n'am dee nɛ mɛ ga; a̧ nyɔŋ nɛ zɔ̧ hee ndai ga.

¹⁶Mɛ̀ zɔ́k ŋgai nɛ a̧a̧ zu goto-a, in wan nɛ duk kpiikisi-a!

¹⁷Dom-aa ɔ hee ŋga te gbatui ga, ku-a lɛŋ nɛ́ gee ɗaɗi a̧ mbali zu ŋmaa.

¹⁸O gba̧a̧-tɛ-a, mɛ̀ zɔ́k kànà nɛ́ ndɛrɛ, ɓɛɛ o gba̧a̧-ŋgazi-a kànà nɛ́ ŋga boi.

¹⁹A̧ duk nɛ̀ gasa tom kɔ‘m; nɛ́ a̧[55] a̧ ɔ wan zu o dɔka saɗi lɛŋ.

²⁰A̧ nyɔŋ mɔ zu o zu-tɔ̧́, o saɗi zaŋbɛɛ de saa nɛ katɛ a̧.

²¹A̧ ɔ nu ti o kɔŋgɔvale; ɓɛɛ o toro-yí-mbuu kpee zu a̧.

²²O kɔŋgɔvale de nɛ gi̧ɔ̧ ha̧ a̧, ɓɛɛ o gasa te ká̧ zaŋ yì ya zik a̧.[56]

²³Kin-yì de kíì pi̧ tɛ-a na; kóó yí Jurdɛn ŋmai̧a nɔ nú-a, kɔ̧-a̧ nɛ́ duka-a.

²⁴Nɛ́ o a̧ tɛ ba zu duk nɛ̀ a̧, ɓɛɛ gboo zɔ̧ɔ̧-a̧a̧ pi̧ nyak sɛnɛ o?[57]

²⁵Mɛ nyɛma mɛ tui gɛ̧i̧-ŋgando ba nɛ ndiɓa[58] nde? Mɛ tɛ pi̧ gba-paa leɓ‘a nde?

²⁶Kóó ɗɔia zɔ̧ɔ̧-a̧a̧ pi̧ ga̧u̧ sɛnɛ, kóó toka yaŋgara-a sar nde?

²⁷A̧ tɛ ai nú ha̧ mɛ, kóó tɔ̧ɔ̧ de ga̧a̧ wen ha̧ mɛ nde?

²⁸A̧ tɛ nɔ tɔk in mɛɛ, mɛ duk nɛ bara kɔ-mɛ ɓɔnsɛnɛ nde?

²⁹Mɛ tɛ de saa nɛ̀ a̧ hee nɔ̧́í̧ ga nde? Mɛ tɛ pi̧ nyak naŋ-a ha̧ o bem kɔ-mɛ mɛ be-okoo-a mɛ de nɛ saa nde?

³⁰O wi-gbɛ-zoro tɛ pɛr gɛnɛ-a nde? O wi-ɗɔr-mɔ tɛ a̧k a̧ wen ɗɔra-a nde?

³¹Mɛ tɛ ŋgasi góò tɛ-a, ɓɛɛ mɛ toka zu-a nɛ̀ sɛ́ɛ̀ nde?

³²Mɛ̀ wé géé tama tɛ-a; tɛ-mɛ beka bi ɗoŋ-aa kà mɛ dé nɛnɛ woyo na.