Read Northwest Gbaya JOB 41 Bible Online

JOB 41 - Northwest Gbaya bible

JOB 41

¹Duka-tɛ kɔ-mɛ‘e wi tɛ gan a̧, nɛ́ ɔra tɛ; géé zɔka a̧ hegɔ, ɓɛɛ mɛ a̧a̧ mbɔɗɔnu.

²Ŋma bíí nɛ a̧a̧ nɛ̀ see mɛ kii nú-a bo na; kà bó nɛ‘m, o'o tɛ ba zu nɛ ŋgɔn ti'm o?

³Nyamandoi ko o a̧a̧ zu'm o? Mɔɔ ɗɔɔ yiwese lɛŋ nɛ́ kɔ‘m.

⁴Mi beka kpe nú zu o boi tɛ-a, ŋga tɛ-a in bɔɗa tɛ-a na.

⁵Nɛ o'o hu̧i̧a̧ yí-see laa kɔ̧-a̧ o? Nɛ́ o'o gboo mgbara nin-a o?

⁶Nɛ́ o'o hu̧i̧a̧ mana nú-a fara nɛ o gba̧a̧ nin-a ya nɛ mɔɔ-kíì sɛnɛ o?

⁷Ɗoŋ-aa lɛŋ nɛ géè ŋgee a̧ nɛk ye ŋmaa;

⁸wa yɛk nɛ ŋmaa, búk ɓir mgbara wa na;

⁹wa fura ŋmaa ndaɗi, ŋma mɔɔ-nyun-wa nú ŋmaa yinɛ bo na.

¹⁰Kà a̧ záfí, ɓɛɛ sa̧a̧mɔ gɔma; gbaa yí-a ɔ hee gɔna ndaa-zan ga.

¹¹Leɓe-wee in tuɓa-wee gɔm nɛ̀ kɔ̧ war ger-a.

¹²Zi-wee tur nɛ̀ kɔ̧ zɔ̧ɔ̧-a̧a̧ gbonɛ hee zi-wee-yì-kpánà nɛ̀ kpa̧i̧ ga.

¹³Wee gɔm nɛ̀ kɔ̧ war ger-a ɓɛɛ búk kɔ̧ nú-a ufa kɛ̧i̧-wee gɔn yoŋgoŋgo.

¹⁴Ŋgai tɛ gun ger-a bó nɛ́ mɔɔ-tɔ̧ na; ɓɛɛ sùm-sùm tɛ-a ba nɛ bíí.

¹⁵Zɔm goia ndara-tɛ-a yee ŋmaa ɓɛɛ ŋgai kpoe-kpoe tɛ-a.

¹⁶See-aa nɛ́ ta; kànà hee ŋga ta-hɔ̧n-mɔ ga.

¹⁷Kà a̧ kúr ŋgɔn, ɓɛɛ kíì dee o gasawi;[59] kà a̧ mísí̧ dom-aa, ɓɛɛ bele zara wa.

¹⁸Gba-paa nyɛm mɛ tok a ye, kóó sɛ́ɛ̀ in góò na mbɛt.

¹⁹Boi nɛ́ zɔ̧ ti a̧; ndɛrɛ nɛ́ ɓuka te wen-aa.

²⁰A̧ yu pia-a ko gbaayí-góò pii tɛ-a na; ta nɛ‘i pi̧ mɛ yo nɛ a̧ nɛ mbula zɔ̧ wen-aa.

²¹Ɓira-te nɛ géé kan sɛn tɛ a; giti za[60] de ŋma mɔ tɛ-a na.

²²Ɗɔɔ zaŋ-aa nɛ ɓɛ̧i̧a tɔ̧ɔ̧ nú gbàrà-kpánà n'aa gbur nɛ zu ɓɔtɛ hee boi-wa-fɔ ga.

²³A̧ ye ɗɔɔ yì ɓɛɛ yì nɔi̧a hee wee yì ga; ɓɛɛ gba-tɔp tura hee zi-wee fuu-nyama nɛ gbo nɛ̀ kɔ̧ kpánà-a ga.

²⁴Duia-yì oi-aa ɔ hee fɛŋa ndàrá saɗi ga, ɓɛɛ oi mbaŋa yì kɔ̧-a̧ pɛŋa tok nɛnɛ.

²⁵Ŋma mɔ nɛ nyɛma ŋmaa in a̧ zu nù'ɛ bo na; tɛ̀ dee a̧, kíì bo kɔ̧ zaŋ-aa na.

²⁶A̧ zɔk o wan-ŋgai hee geemɔ ga; nɛ́ a̧ a̧ ɔ wan zu o ŋga saɗi lɛŋ.