Read Northwest Gbaya JOB 42 Bible Online

JOB 42 - Northwest Gbaya bible

JOB 42

¹Job kifa nú ha̧ GASA WAN, ɓɛɛ tɔ̧:

²Mi iŋa'e ɛnɛ nyɛma mɛ de mɔ lɛŋ; ŋma mɔ nɛ̀ ŋgaia gan'nɛ bo na.

³Ɛnɛ‘e mi ɗaŋ nɛ wen k’ɛ́nɛ́, tɔ̧ nɛ wen tɛ mɔ n'am iŋ na. Ii, mi tɔ̧ɔ̧ wen zu ɗukamɔ nɛ gana'm, n'am iŋ mgbara-a na nɛ mbetɛ.

⁴Ɛnɛ‘e, à̧‘m zíí wen kɔ‘i, à̧‘m é ha'i tɔ̧ wen; wi tɛ ak am, ɓɛɛ mi kifa nú ha'i wo.

⁵Kɔ‘m, mi zia so nɛ nyɛrɛ k’ɛ́nɛ́ nɛ wa tɔ̧ɔ̧ so ha̧‘m nɛti, ɓɛɛ kinii, mi zɔka nɛ yí‘m.

⁶Ziimɔ baa'm, hegɔ mɔ n'am tɔ̧ɔ̧ so nɛti, mi kaɗa; mi kiŋgila tɛ‘m tɛ bùk in fuunu.

⁷Ɗoŋ nɛ GASA WAN tɔ̧ɔ̧ wen'i ha̧ Job kaɗi, a̧ tɔ̧ɔ̧ ha̧ Elifaz be Teman: «See-am nyim nyim in mɛɛ ka ba nɛ o sɛm kɔ-mɛ yiitoo, wen ɛ́nɛ́ tɔ̧ wen tɛ‘m nɛ de-a hee Job wi-de-tom kɔ‘m ga na.

⁸Ɛ̀nɛ̀ káí wiwii ndai mɔɔrɔ-ɗoŋ-yiitoo in vala sami mɔɔrɔ-ɗoŋ-yiitoo mbɛt, ɓɛɛ ɛ̀nɛ̀ nɛ́ɛ̀ kpá wi-de-tom kɔ‘m Job. Ɛ̀nɛ̀ dɔ́ wa nɛ̀ kpoo-sɔ̧ wen zu'nɛ́, ɓɛɛ tɛ kpɔk kale ŋgimbi'i, wi-de-tom kɔ‘m Job a̧ ai nú ha̧‘m wen zu'nɛ́ mbɛt. Mɛ̀ nɛ́ wen zu a̧ a̧‘m beka de ha̧ ziimɔ mɛ ba'nɛ́ na, wen ɛ́nɛ́ tɔ̧ de wen zu'm hee mɔ'ɔ nɛ wi-de-tom kɔ‘m Job tɔ̧ɔ̧ nɛnɛ ga na.»

⁹Ɓɛɛ Elifaz be Teman in Bildad be Sua ka ba nɛ Sɔfar be Naama nɛ́ɛ̀ de mɔ nɛ GASA WAN ha̧a̧ so nú ha̧ wa mɛ de, ɓɛɛ GASA WAN yeŋ zer tɛ wora Sɔ̧ ko Job.

¹⁰Ŋgimbi nɛ Job biti wora Sɔ̧ wen o sɛm kɔ‘i, GASA WAN dee ha̧ a̧ mɛ kpa o mɔ kɔ̧-a̧ siɗoŋ woyo war yiitoo.

¹¹O boko nya-a̧ in o nya-a̧ gú nɛ̀ o sɛm kɔ̧-a̧ só nɛti tɛɛ lɛŋ mɛ zɔk a̧, ɓɛɛ wa nyɔŋ mɔ in a̧ sɛn kɔ̧ tua kɔ̧-a̧. Wa aia nú, ɓɛɛ wa ga̧ see-aa tɛ ŋgamɔ nɛ̀ GASA WAN pi̧i̧ zu a̧, ɓɛɛ wa lɛŋ ha̧ kɔya-sede kpɔk kpɔk[61] ha̧ a̧ in wele nɛ‘i dee nɛ lɔr mbɛt.

¹²GASA WAN toka de yoŋgo zu sɔŋkur ŋgimbi ko Job gan wan mɛ ti. Job kpaa sami booro-ɓu-zua-naar, ŋgeloba booro-mɔɔrɔ-ɗoŋ-kpɔk, ndai-de-tom booro-yiitoo in nana tuifuu booro.

¹³A̧ koo be wiwii mɔɔrɔ-ɗoŋ-yiitoo in be okoo taar.

¹⁴A̧ aa nin o be okoo nɔ‘i hee mɔ'ɔ ga: kuti-a nɛ Jɛmina,[62] yiitoo-aa nɛ Kɛtsia,[63] taar-a nɛ Kɛrɛn-Hapuk.[64]

¹⁵Zu nù lɛŋ wi beka nyɛm so mɛ kpa o ŋma okoo nɛ yora zɔŋa gan o boko bem ko Job na. Dáà kɔ-wa ha̧a̧ mɔɔ-oi ha̧ wa hee ko o bu̧i nya-wa ga mbɛt.

¹⁶Ɗoŋ mɔ‘i, Job duka siti tɛ pɛ gɔmŋmaa-nɛ-ɓu-naar, ɓɛɛ a̧ zɔk o bezaŋ-aa ɗoŋ ŋmaa naar.

¹⁷A̧ duka zu nù ɗoŋ-aa nyɛi̧; a̧ sɔka so nyɛmna ɓɛɛ a̧ fe.