Read Northwest Gbaya JOB 5 Bible Online

JOB 5 - Northwest Gbaya bible

JOB 5

¹Kà mɛ sá mɔ, bíí tɛ́ kifi nú ha̧ mɛ? Nɛ́ o mgbara o sa̧a̧ betom a̧ mɛ tɛ ak o?

²Wi-bɔkɔ fe nɛ fio ŋga see, ɓɛɛ aa-see-mɔ gbɛɛ mgbelewi.

³Mi zɔka so ŋma mgbelewi baa fara nɛ dea, ɓɛɛ kɔ‘m mi fom fara-duk kɔ̧-a̧ hee mɔ'ɔ ga:

⁴«Ŋma wi-gbak o bem kɔ̧-a̧ à̧ ká bò na, bíí à̧ núkúrí wa fara-kita, nɛ̀ ŋma wi-yor-ɗoŋ wa beka bo na.

⁵O ŋma bíí a̧ nyɔŋ nyɔnɔ n'aa mɔi̧, kóó nɛ̀ oi ŋgárá-tɛn n'aa dee zik ɗoŋ-aa'i; ɓɛɛ o wi-de-wɔ-mɔ a̧ kai o mbɔi kɔ̧-a̧.»

⁶Bó nɛ́ ɗaŋmɔ gbo nɛ tɛ nù na, in bɔnɛ hɔ tɛ fuunu géè na mbɛt;

⁷wen mɛ̀ nɛ́ bíí a̧ de ha̧ bɔnɛ mɛ́ hɔ[4] hee mɔ'ɔ nɛ fú̧ú̧-wee[5] kpíɗí nɛnɛ si ŋgɔn’ɛ ga.

⁸Ɓɛɛ kɔ‘m, mi tɛ̀ɛ́ ak nɛ Sɔ̧ ha̧‘m mɛ we ɗoŋ mɔ kɔ‘m ha̧ a̧.

⁹A̧ nɛ wan-de-gasamɔ nɛ‘i nyɛm mɛ kpa ndaa-a na, in mɔɔ-gɔn-ɗɛɗɛ nɛ‘i nyɛm mɛ tɔr na.

¹⁰Nɛ́ a̧ a̧ de ha̧ kórò mɛ hɔ a zu nù lɛŋ, nɛ́ a̧ a̧ tom kórò a kpɛɛfɔ.

¹¹Nɛ́ a̧ a̧ de ha̧ o bíí nɛ̀ ya si ɗɔɔ mɛ ya nɛ ŋgɔn, ɓɛɛ a̧ dee ha̧ o wi-hi̧i̧-fio mɛ ya nɛ desee.

¹²A̧ ɗaŋ nɛ ee-zu-mɔ ko o wi nɛ e nú mɛ de ŋgamɔ, ɓɛɛ wa nyɛm mɛ de ŋma mɔ ɓɔna.

¹³Nɛ́ a̧ a̧ de ha̧ o wi-iŋ-mgbara-mɔ mɛ tik lim kɔ-wa nɛ wa hura, ɓɛɛ a̧ dee ha̧ o ee-zu-mɔ kɔ-wa mɛ yambali.

¹⁴Kóó nɛ̀ bu wese mbɛt yuwar kɔ-wa ba nɛ tum, mɛ bu wese kerere wa tam nɛ tum.

¹⁵Nɛ́ a̧ a̧ kpasi o ɓɔsa-wi er-wa,[6] ɓɛɛ a̧ gboo o wi-kɔsa yinɛ ɗɔɔ ŋgai kɔ-wa mbɛt.

¹⁶Ziɓa-wi kpaa mɔɔ-e-nɛ-ta; o ɗaŋwi kpa nú-tɔ̧-wen ɓɔna.

¹⁷Wi nɛ Sɔ̧ gai a̧ duk nɛ desee. Ɓɛɛ kɔ-mɛ Job, ká mɛ e tɔ̧ɔ̧ mbɔrɔ ko Wan nɛ a̧a̧ nɛ ŋgayamɔ lɛŋ tɛ geemɔ na.

¹⁸Wen kà GASA WAN e da̧i̧ tɛ bíí ɓɛɛ nɛ́ a̧ a̧ hɛr da̧i̧‘i̧, kà a̧ pi̧ bɔnɛ zu bíí, ɓɛɛ a̧ kpasa wi’ɛi mbɛt.

¹⁹A̧ tɛ kpasi mɛ tɛ dita see war mɔɔrɔ-ɗoŋ-kpɔk, ɓɛɛ war mɔɔrɔ-ɗoŋ-yiitoo-aa, ɗaŋmɔ beka kpa mɛ na.

²⁰A̧ tɛ kpasi mɛ tɛ fio ŋgimbi kaɓa, a̧ tɛ kpasi mɛ nú gba-paa ŋgimbi biro.

²¹Ŋgimbi nɛ bíí tɛ ɓir wen e nú mɛ, a̧ tɛ pɛm mɛ, ŋgimbi nɛ ŋgamɔ be tɛ̀ɛ́ hɔ, kíì beka de mɛ na.

²²Mɛ tɛ mam ŋgamɔ in kaɓa, ɓɛɛ kíí ɗaŋ saɗi zaŋnu beka de mɛ na.

²³O ŋga saɗi beka ɗaŋ mɔ kɔ-mɛ na, o sɔkɔr-ta beka bo kpɛɛfɔ kɔ-mɛ na wen nɔɔ-tɔk a̧a̧ mgbara mɛ in wa.

²⁴Ga̧a̧mɔ tɛ duk kɔ̧ tua kɔ-mɛ; tɛ yara-a zɔk nɛ o mɔ-dai kɔ-mɛ, mɛ tɛ kpa'e mɔ lɛŋ duk nɛ dea.

²⁵O bezaŋ-mɛ tɛ dɔk dun nù, wa tɛ dɔk hee zɔ̧ sɛn zaŋbɛɛ ga.

²⁶Mɛ tɛ sɔk kaɗi sɛka mɛ yee kɔ̧ fio, hee mɔ'ɔ nɛ nyɔnɔ sɔk kaɗi sɛka'i mɔi̧a’ɛ ga.

²⁷Mɔ‘i nɛ́ kpasawen n’ɛɛ kia mɔ sɛnɛ; mɛ̀ zíí wen'i bá zer-mɛ.