Read Northwest Gbaya JOB 8 Bible Online

JOB 8 - Northwest Gbaya bible

JOB 8

¹Nɛ mɔ'ɔ nɛ Bildad be Sua baa wen ɓɛɛ tɔ̧:

²Mɛ tɛ kaɗi zɔm wen kɔ-mɛ nɔ'ɔ nɛ mɛ tɔ̧ hee gba búk a̧ yu ga’ɛ mɛ gese ge?

³Sɔ̧ de gɔɔmɔ dee? Wan nɛ a̧a̧ nɛ ŋgayamɔ lɛŋ yɔ kaya tɛ gɔna kita kɔ‘i na.

⁴Ŋmafara o bem kɔ-mɛ dee ŋma ɗaŋmɔ ti a̧, ɓɛɛ sa mɔɔ-oi ɗaŋmɔ‘i tik zu wa.

⁵Kɔ-mɛ, kà mɛ kíí Sɔ̧, kà mɛ áí nú ha̧ Wan nɛ a̧a̧ nɛ ŋgayamɔ lɛŋ,

⁶kà mɛ bó nɛ́ wi-tɔ̧-kpasawen in wi-de-mɔ nɛ yuwar-a, ɓɛɛ a̧ tɛ pɛm mɛ; a̧ tɛ de ha̧ mɛ mɛ duk hee mɔ'ɔ nɛ mɛ duka so nɛnɛ nɛti ga, nyɛm nɛ ɗoŋ deemɔ kɔ-mɛ nɛ yuwar-a,

⁷ɓɛɛ dɔka mɔ nɛ̀ mɛ kpaa so lɛŋ tɛ duk nɛ́ geɗek mɔ, katɛ mɔ nɛ mɛ tɛ kpa nɛ ɗoŋ.

⁸Mɛ̀ ák mɔ in o kuti bíí ɓeemɛ, mɛ̀ kíí ha̧ mɛ mɛ iŋ mgbara duka-a ko o zɔmdáa kɔ-wa.

⁹Ɛɛ nɛ o mbaŋa bíí mɛ mboyɛɛ, ɛɛ iŋ k’ɛɛ mgbara mɔ na, wen duka-a k’ɛɛ zaŋnu hɔɔ ŋmaa in gi̧ɔ̧.

¹⁰Ɓɛɛ kɔ-wa, wa tɛ usi mɔ ha̧ mɛ; wa tɛ tɔ̧ wen ha̧ mɛ; tɛ iŋa mgbara mɔ kɔ-wa, wa tɛ tɔ̧ mbɔrɔ ha̧ mɛ hee mɔ'ɔ ga:

¹¹«Ɓoɓo hɔ tɛ ŋga nù na! Kà yì bo na, toro gbo na!

¹²Kà yì ɓan ŋgimbi n'aa ɓɔ, ɓɛɛ a̧ ɔ̧ka̧ kor nɛti ha̧ o oi dɔka zɔ̧, kóó ŋma mɔ nyɔŋ so kunin-a na mbɛt.»

¹³Mɔ nɛ hɔ zu bíí nɛ̀ tɛ̀ bi ɗoŋ Sɔ̧ nɛ mɔ‘i. Ee-ta ko wi-de-ɗaŋmɔ tɛ de geemɔ.

¹⁴Ee-ta kɔ̧-a̧ nɛ́ géé garaazi, mɔɔ-duk-tɛ kɔ̧-a̧ nɛ géé mbul wanto.

¹⁵Kà a̧ ɛ́k tɛ nɛ te-see-tua kɔ̧-a̧, ɓɛɛ gbina, kà a̧ gá̧í̧ sɛnɛ ɓɛɛ yor na.

¹⁶A̧ hɔɔ ŋmaa in ŋma te-yor-wese nɛ̀ tɔk-aa ɔ dɔka, nɛ̀ gbaa-er-a ɓɔɔ kpe zu mɔ lɛŋ.

¹⁷Kunin-a ye nù nɛ ɗuka-a hɔ mgbara ta mɛ mbɛt.

¹⁸Ɓɛɛ kà bíí zúɗ‘a yinɛ tɛ fara n'aa duk sɛnɛ‘i, fara'i tɛ kaf'a'e: «Mi tɛ zɔk mɛ nɛti na.» Hegɔ ŋma mbe te tɛ hɔ oi-aa.

¹⁹Desee mɔ nɛ̀ kpa a̧ nɛ́ mɔ‘i, mɔ nɛ tɛ kpa pɛr bíí hegɔ, nɛ́ mɔ‘i.

²⁰Mɛ̀ zɔ̀k, Sɔ̧ e wi nɛ̀ ŋma wen bo zu a̧ na tɛ geemɔ na; a̧ gbak o wi-de-ɗaŋmɔ na mbɛt.

²¹A̧ tɛ de ha̧ nú-mɛ mɛ gɔn mami, in ha̧ mɛ mɛ gai mɔ nɛ desee.

²²Foe tɛ de o wisɛn kɔ-mɛ, ɓɛɛ o tua-laa ko o wi-ɗaŋ beka bo ɓɔna.