Read Northwest Gbaya GIMA 102 Bible Online

GIMA 102 - Northwest Gbaya bible

GIMA 102

¹Kɔfa-sɔ̧ ko wi-bɔnɛ nɛ̀ ai nú sitɛ GASA WAN.

²GASA WAN, ɛ̀nɛ̀ zíí kɔfa-sɔ̧ kɔ‘m, sara kɔ‘m a̧ dáŋ hɔ tɛ‘nɛ́.

³K’ɛ́nɛ́ hu̧si yí‘nɛ́ nɛ̀‘m na. Ɛ̀nɛ̀ yéŋ zer'nɛ́ pii tɛ‘m wese ɗaŋsee kɔ‘m; wese n'am tɛ sa'nɛ́, ɛ̀nɛ̀ kɔ̧́ sara nú‘m nɛ̀ haya-a.

⁴Wen wese kɔ‘m yak hee tura-zi-wee ga; gba̧a̧-tɛ‘m nyɔŋ nɛ́ wee hee nú-gua ga.

⁵See-am kora kɛsi hee zɔ̧-yí-sɔŋ ga, ɓɛɛ nyɔŋmɔ ɔ̧ nyɔ̧ɔ̧ kɔ̧ nú‘m ɓɔna;

⁶mi ɔ̧ka̧ ba gba̧a̧ tɛ aia-nú kɔ‘m.

⁷Mi hɔɔ ŋmaa in nɔ́i̧-gbara; mi duk hee ɔ̧ka̧ diri nɛ̀ gu zu ŋma gbina-tua ga.

⁸Saŋa-seŋge baa'm tɛ hiɗa mɔ ɛ̀n'am hee ŋma nɔ̧́í̧ nɛ̀ gu zu tua hiɗi nɛ̀ mɔ'ɛ ga.

⁹Wese lɛŋ o wisɛn kɔ‘m da̧ nɛ‘m; o wi nɛ̀ yaa so zɔn nɛ̀‘m bá nɛ́ bɔnɛ kɔ‘m fom nɛ̀ o ŋma bíí.

¹⁰Mi sam nɛ́ búk-wee duk nɛnɛ, yí-nɔɔ kɔ‘m zaŋa ŋmaa in mi̧i̧kɔ̧a̧

¹¹wen nyimsea in ɗaŋsee k’ɛ́nɛ́ zu'm, ɛ́nɛ́ hu̧i̧a̧‘m nɛ̀ ŋgɔn ɓɛɛ ɛ́nɛ́ siŋ am pi̧ nù woyo.

¹²Duka-a kɔ‘m hɔɔ ŋmaa in gi̧ɔ̧-tɛ-wi; mi ɔ̧ka̧ kor hee zɔ̧-bɛɛ ga.

¹³Ɓɛɛ k’ɛ́nɛ́ GASA WAN, ɛ́nɛ́ ɔ wan kpoo nɛ kpoo; tɛ o bíí beka bi ɗoŋ‘nɛ́ na pɛ nɛ̀ pɛ. Hɔ tɛ pɛ́r-nam zu o pɛ́r-nam nɛnɛ.

¹⁴Ɛ̀nɛ̀ kúr ŋgɔn, ɛ̀nɛ̀ dé ko ha̧ ye k’ɛ́nɛ́ Siɔŋ wen ŋgimbi dee ko hɔɔ kaɗi, ŋgimbi-a nɛ́ mɔ‘i.

¹⁵O wi-de-tom k’ɛ́nɛ́ zɔn nɛ́ o ta nɛ̀ wa mboo nɛ Siɔŋ, ɓɛɛ ko de nɛ wa wen bɛɛ-oi ye'i.

¹⁶O wi nɛ̀ iŋ Sɔ̧ na tɛ yu a̧ dɔ zu nɛ̀ wee, ɓɛɛ o gasa wannu lɛŋ tɛ zɔn nɛ́ gasamɔ kɔ̧-a̧.

¹⁷Ŋgimbi nɛ GASA WAN tɛ ba ye kɔ‘i Siɔŋ e ŋgɔn woyo bíí tɛ zɔk a̧ tɛ gasamɔ kɔ̧-a̧.

¹⁸A̧ tɛ zik tɛ-a mɛ zii kɔfamɔ ko o wi-kɔsa, a̧ beka e kɔfamɔ kɔ-wa tɛ geemɔ na.

¹⁹Ɛ̀nɛ̀ yɔ́r mɔ nɛ̀ Sɔ̧ dea zu yɛ ha̧ o bíí nɛ tɛ tɛ nɛ̀ ɗoŋ mɛ tɔr ha̧ wa mɛ gasi a̧.

²⁰GASA WAN oŋga zɔk nɛ̀ mɔ pii mbɔɗɔnu nɛ̀ kusa sa̧a̧ fara-duk kɔ‘i yiwese mɛ

²¹ha̧ a̧ mɛ zii gɔfamɔ ko o bara, ha̧ a̧ mɛ gbo o bíí nɛ̀ wa gɔna kita-fio zu wa.

²²O bíí tɛ pɛsi nin'nɛ́ dam saaye Siɔŋ; wa tɛ zɔn GASA WAN sɛn Jerusalɛm,

²³ɓɛɛ o dukbíí in o wannu tɛ mɔi̧ ŋmaa mɛ gasi a̧ mbɛt.

²⁴Ŋgai-tɛ‘m kaɗa; k’ɛ́nɛ́ n’ɛ̀nɛ̀ duk k’ɛ́nɛ́ kpoo nɛ kpoo’ɛ,

²⁵ɛ̀nɛ̀ dé ha̧‘m mɛ iŋ be oi ŋgimbi duka-a kɔ‘m zu nù'ɛ; k’ɛ́nɛ́ ba'm nɛti gɔn oi ŋgimbi kɔ‘m é dúk na.

²⁶Nɛ́ ɛnɛ'ɛ dee nù nɛ̀ ku̧u̧naŋ-a mɛ, ɓɛɛ yiwese nɛ́ tom nɛ̀ er'nɛ́ dea;

²⁷o mɔɔ nɔ‘i lɛŋ tɛ ɗaŋ, ɓɛɛ kànà nɛ́ ɛnɛ'ɛ tɛ duk ɓɔnsɛnɛ. Duka-a ko o mɔɔ nɔ‘i hɔɔ ŋmaa in laa nɛ̀‘i pi̧ tɛ-wi, ɓɛɛ ɗoŋ-aa nyɛi̧ na a̧ka̧ a nu’ɛ ga; ɛ́nɛ́ kpai wa kpai hee mɔ'ɔ nɛ̀‘i kpai nɛ̀ laa ga.

²⁸Ɓɛɛ k’ɛ́nɛ́, ɛ́nɛ́ kpai na; nduti duka-a k’ɛ́nɛ́ bo na hegɔ kpoo nɛ kpoo.

²⁹O bem ko o wi-de-tom k’ɛ́nɛ́ tɛ kpa fara-duk sɛnɛ, ɓɛɛ o bezaŋ-wa tɛ ya in'nɛ̀ɛ́ ɓɔnsɛnɛ.