Read Northwest Gbaya GIMA 103 Bible Online

GIMA 103 - Northwest Gbaya bible

GIMA 103

¹Gima ko David. Sɔ̧-tɛ‘m, mɛ̀ zɔ́n GASA WAN! Mɔ nɛ̀ a̧a̧ tɛ‘m lɛŋ a̧ zɔ́n sa̧a̧ nin-a.

²Sɔ̧-tɛ‘m, mɛ̀ zɔ́n GASA WAN! Ká tɛ-mɛ bí ɗoŋ demɔ lɛŋ n'aa de ha̧ mɛ na.

³Nɛ́ a̧ a̧ e yɔɔ-kaya kɔ-mɛ lɛŋ ha̧ mɛ, nɛ́ a̧ a̧ kpasi mɛ tɛ zɛɛ kɔ-mɛ lɛŋ;

⁴nɛ́ a̧ a̧ ba mɛ yinɛ kɔ̧ fio, nɛ́ a̧ a̧ de ko ha̧ mɛ tɛ kɔ̧ɔ̧mɔ kɔ̧-a̧;

⁵nɛ́ a̧ a̧ tok de yoŋgo tɛ-mɛ tɛ pɛ duka-a kɔ-mɛ, nɛ́ a̧ a̧ de ha̧ ɗoŋ pɛ duka-a kɔ-mɛ mɛ nyɛi̧ hee pɛ ko zúá[23] ga.

⁶GASA WAN nɛ́ wi-de-mɔ nɛ yuwar-a, nɛ́ a̧ a̧ ye ɗoŋ o wi-bɔnɛ;

⁷a̧ usa taamɔ kɔ̧-a̧ ha̧ Moisɛ, ɓɛɛ a̧ usi ŋgai kɔ̧-a̧ ha̧ o bem ko Israɛl mbɛt.

⁸GASA WAN nɛ́ wan-de-ko in wi-zɔk-bíí nɛ̀ de-a, a̧ nɛ́ wi-yor-ɗoŋ wi nɛ̀ de nyimsea nɛ̀ haya-a na;

⁹A̧ bó nɛ́ wi-nyiŋgɔ̧rɔ̧ na; a̧ e kiri ɗoŋ-aa nyɛi̧ na mbɛt.

¹⁰A̧ de bɔnɛ in yɛɛ nyɛm nɛ̀ ɗoŋ yɔɔ-kaya k’ɛɛ na; a̧ kifi er h’ɛ́ɛ́ nyɛm nɛ̀ ɗoŋ ɗaŋmɔ k’ɛɛ na mbɛt.

¹¹Hee mɔ'ɔ nɛ̀ yiwese kusa nyɛi̧ nɛ̀ nù ga, mɛ̀ nɛ́ hegɔ a̧ kɔ̧ɔ̧mɔ kɔ̧-a̧ duk nɛnɛ zu o wi-yu-kíí a̧ lɛŋ;

¹²Hee mɔ'ɔ nɛ daŋa-wese nyɛi̧a nɛ̀ ŋmaa in yee-wese ga, mɛ̀ nɛ́ hegɔ a̧ a̧ bá nɛ̀ ɗaŋmɔ k’ɛɛ yinɛ nyɛi̧ nɛ̀ ɛɛ.

¹³Hee mɔ'ɔ nɛ dáà-wan-bem de nɛ̀ ko ha̧ o bem kɔ‘i ga, mɛ̀ nɛ́ hegɔ a̧ GASA WAN de nɛ̀ ko ha̧ o wi-yu-a mbɛt.

¹⁴A̧ iŋa mɔ n'aa ɓoo nɛ̀ ɛ́ɛ́, a̧ iŋa kànà ndé, ɛɛ nɛ́ fuunu.

¹⁵Duka-a ko bíí yak ŋmaa in duka-a ko zɔ̧ na; ɗoŋ duka-a kɔ̧-a̧ gan duka-a ko do-te na.

¹⁶Kà búk yu fɛɛɛ, ɓɛɛ gbéyéŋ wa aia a nù kaɗi, ɓɛɛ wi iŋ fara nɛ̀ wa duka so sɛnɛ ɓɔna.

¹⁷Kɔ̧ɔ̧mɔ ko GASA WAN zu o wi-yu-kíí a̧ duk ɓɔnsɛnɛ hegɔ yaknɛ; ɓɛɛ kà o bezaŋ-wa kásí ha̧a̧nú kɔ̧-a̧,

¹⁸kà wa kásí nɔɔ-tɔk kɔ̧-a̧ mbɛt, ɓɛɛ a̧ tɛ de kànà demɔ ha̧ wa ɓɔnsɛnɛ.

¹⁹GASA WAN ee damti kɔ‘i yiwese ɓɛɛ a̧ ɔ wan zu mɔ lɛŋ.

²⁰Ɛ̀nɛ̀ zɔ́n GASA WAN, o betom kɔ̧-a̧ lɛŋ, ɛ́nɛ́ o yaa-ŋgo-biro, o wi nɛ de mɔ nɛ heembea kɔ̧-a̧ usi, ɛ́nɛ́ o wi-mbo-zu tɛ wen kɔ̧-a̧!

²¹Ɛ̀nɛ̀ zɔ́n GASA WAN, ɛ́nɛ́ o wi-biro kɔ̧-a̧ lɛŋ, ɛ́nɛ́ o wi-de-tom ha̧ a̧, ɛ́nɛ́ o wi-de-mɔ n'aa kɔ̧a̧!

²²Ɛ́nɛ́ o tom mɛ er-a sɛn fara lɛŋ n'aa ɔ wan sɛnɛ, ɛ̀nɛ̀ zɔ́n GASA WAN! Sɔ̧-tɛ‘m, mɛ̀ zɔ́n GASA WAN!