Read Northwest Gbaya GIMA 104 Bible Online

GIMA 104 - Northwest Gbaya bible

GIMA 104

¹Sɔ̧-tɛ‘m, mɛ̀ zɔ́n GASA WAN! GASA WAN, Sɔ̧ kɔ‘m, ɛnɛ ɔ gasa nyɛmna, ɛ́nɛ́ aa gasamɔ in zɔnamɔ zik'nɛ́;

²ɛ́nɛ́ pi̧i̧ sa̧a̧mɔ tɛ‘nɛ́ hee gasa laa ga. Ɛ́nɛ́ tata yiwese gu zu nù hee tua-laa ga;

³ɛ́nɛ́ dee fara-duk k’ɛ́nɛ́ zu yì, bu-zan nɛ́ keekee-nɛ-nɔ k’ɛ́nɛ́, ɛ́nɛ́ nɛ́ nɔ̀ ɗɔɔ gba-búk;

⁴búk nɛ́ o betom k’ɛ́nɛ́, nyɛka-wese nɛ́ o wi-de-tom k’ɛ́nɛ́.

⁵Ɛ́nɛ́ ee nù zu gɔtɔ-a ɓɛɛ nù fo mɔ na pɛ nɛ̀ pɛ;

⁶ɛ́nɛ́ kpee nù nɛ yì hee mɔ'ɔ nɛ̀ laa kpe nɛ̀ tɛ-wi’ɛ ga, ɓɛɛ yì kpe zu o gasa kaya mbɛt.

⁷Nɛ́ mɔ'ɔ nɛ̀ tuɓa-da̧ k’ɛ́nɛ́ dee ha̧ yì mɛ kɛ̧ ŋmaa, giti mbaŋa-kórò k’ɛ́nɛ́ ndaka yì yaknɛ;

⁸yì kpiɗa yak zu o kaya zir o gboŋgo yak nɛnɛ si fara n’ɛnɛ ɗafa so ha̧ a̧,

⁹ɓɛɛ ɛ́nɛ́ gɔn gbisi nɛ yì beka yak zu a̧ mɛ hur nù woyo na.

¹⁰Ɛ́nɛ́ dee ha̧ yì mɛ gbo nɛ̀ zu-zer fok nɛ mgbara o kaya yaknɛ;

¹¹o saɗi in o tuifuu-zaŋbɛɛ nɔ nɛ yi'i ya nɛnɛ;

¹²o nɔ́í̧ ya ɗɔɔ wa̧a̧-te ká̧ yì‘i bíí nɛ̀ gima nɛ̀ desee.

¹³Nɛ́ ɛnɛ'ɛ ha̧ yì ha̧ o kaya nɛ̀ fara-duk k’ɛ́nɛ́ ŋgɔn mɛ; zaŋnu lɛŋ duna nɛ̀ demɔ nɛ̀ tɛ̀ɛ́ nɛ̀ yiwese k’ɛ́nɛ́.

¹⁴Nɛ́ ɛnɛ'ɛ de ha̧ mbɔɗi-zɔ̧ mɛ ɓɔ ha̧ o mɔ-dai mɛ nyɔŋ; nɛ́ ɛnɛ'ɛ de ha̧ nyɔnɔ mɛ dɛm ha̧ bíí mɛ kpa mɔɔ-nyɔŋ nɛ̀ gbo nɛ̀ tɛ nù.

¹⁵Dɔ̧ɔ̧ nɛ́ mɔɔ-ha̧-tortɛ nɛ̀ de ha̧ saŋa-yi-bíí mɛ tok hee nɔ̧́ ga, ɓɛɛ nyɔŋmɔ nɛ́ mɔɔ-ha̧-ŋgai ha̧ bíí mbɛt.

¹⁶O gbatui[24] ko GASA WAN n'aa guna sɛn nú Libaŋ tɛ kpa yì nyɛm wa.

¹⁷Mɛ̀ nɛ́ sɛn ɗɔɔ da̧a̧ wa̧a̧-te nɔ́‘i a̧ o geɗek nɔ́i̧ de tua kɔ‘i sɛnɛ, ɓɛɛ o nɔ́i̧-gba-dɔya ɔ kɔ‘i sɛn mgbák ndɔŋ zu zawaya mɛ.

¹⁸O ban[25] ya kɔ‘i zu o kaya mɛ, ɓɛɛ o kparɛ ɔ kɔ‘i kɔ̧ ta nyɛŋtɛŋ.

¹⁹Ɛ́nɛ́ dee nyaŋa-zɛ nɛ̀ mɔɔ-usi-ŋgimbi ha̧ bíí; wese iŋa ŋgimbi yea-a kɔ‘i,

²⁰tum ba nù ha̧ zɛ mɛ de; o saɗi-kombo lɛŋ yar nɛ̀ ti tum'i,

²¹o daŋa-ŋgai-dila hiɗi nɛ́ mɔ ɗoŋ saɗi-nyɔŋ kɔ-wa kii nɛ̀ mɔɔ-nyɔŋ kɔ-wa er'nɛ́ Sɔ̧.

²²Ká wese dáŋ ɓɛɛ wa lɛŋ sii ɗoŋ, nɛ́ɛ̀ ɔ nù kɔ di̧i̧-ta kɔ-wa,

²³ɓɛɛ bíí gboo kɔ‘i mɛ de tom hegɔɔ mɔ ga̧ nɛnɛ.

²⁴GASA WAN, tom k’ɛ́nɛ́ ɔ dɔka nyɛmna! Ɛ́nɛ́ dee mɔɔ nɔ‘i lɛŋ tɛ iŋa-mgbara-mɔ k’ɛ́nɛ́; zaŋnu lɛŋ duna nɛ̀ mɔ n’ɛnɛ dea.

²⁵Gba-tɔp nɛ́ ɔ fa̧a̧fi̧i̧ nɛ‘i zɔk ŋgere-a na duna nɛ̀ o mɔ ɗɔɔ-aa nɛtɛ nɛtɛ: o gasa-a in geɗek-a mbɛt;

²⁶o kombon yar kɔ‘i serere-serere nɛ̀ zu yì nɛnɛ, ɓɛɛ ɛnɛ dee ndiɓa ɗɔɔ gba-tɔp nɛ̀ mɔɔ-desee k’ɛ́nɛ́.

²⁷Mɔ lɛŋ pɛm nɛ ɛnɛ h’ɛ́nɛ́ mɛ ha̧ nyɔŋmɔ ha̧ wa tɛ ŋgimbi-a.

²⁸K’ɛ̀nɛ̀ nɛ́ ha̧a̧ mɔ, ɓɛɛ ko bíí nɛ́ kaia-a; k’ɛ̀nɛ̀ hú̧í̧ er'nɛ́, ɓɛɛ zaŋ-wa sura.

²⁹K’ɛ̀nɛ̀ hú̧sí sɔnti'nɛ́, bele zara wa; k’ɛ̀nɛ̀ bá ɔmi tɛ-wa yinɛ, ɓɛɛ wa fee si ɗoŋ tɛ fuunu;

³⁰k’ɛ̀nɛ̀ ɔ́m á tɛ wa, ɓɛɛ wa kpasa woyo, ɓɛɛ ɔmi‘i dee bíí, kifi duk nɛ o mbe mɔ ɓɔnsɛnɛ.

³¹Zɔnamɔ ko GASA WAN a̧ dúk ɓɔnsɛnɛ; tortɛ'ɛ bá GASA WAN zu mɔ n'aa dea.

³²Kà GASA WAN zɔ́k mɔ sitɛ nù, ɓɛɛ nù naka; kà a̧ tám tɛ o kaya, ɓɛɛ zi-wee gboa.

³³Mi tɛ bìì gima zɔn nɛ̀ GASA WAN ŋgimbi duka-a kɔ‘m lɛŋ zaŋnu’ɛ; mi tɛ zɔn nin GASA WAN hegɔ hɔ wese fio kɔ‘m.

³⁴Hee mɔ'ɔ nɛ̀ GASA WAN ha̧a̧ desee ha̧‘m ga, wen mɛ kɔ̧ nú‘m a̧ há̧ desee ha̧ a̧ mbɛt.

³⁵O wi-de-ɗaŋmɔ a̧ yù zaŋnu; ká‘i zii nyɛrɛ ko o wi-ɗaŋ ɓɔna! Sɔ̧-tɛ‘m, mɛ̀ zɔ́n GASA WAN! Aleluya![26]