Read Northwest Gbaya GIMA 105 Bible Online

GIMA 105 - Northwest Gbaya bible

GIMA 105

¹Ɛ̀nɛ̀ dé osoko ha̧ Sɔ̧, ɛ̀nɛ̀ sá nin-a! Ɛ̀nɛ̀ tɔ̧́ nyɛrɛ zɔm mɔɔ-gɔn-ɗɛɗɛ-wi kɔ̧-a̧ ha̧ dukbíí!

²Ɛ̀nɛ̀ bíí gima, ɛ̀nɛ̀ bíí gima zɔn nɛ̀ a̧, ɓɛɛ ɛ̀nɛ̀ wé ɗoŋ o gasamɔ kɔ̧-a̧.

³Ɛ̀nɛ̀ dúk tɛ‘nɛ́ nɛ̀ sa̧a̧ nin-a, tortɛ'ɛ bá o wi nɛ̀ kii GASA WAN!

⁴Ɛ̀nɛ̀ kíí GASA WAN in ŋgai kɔ̧-a̧; k’ɛ́nɛ́ mbɔi tɛ kia sɔnti-a na!

⁵Ɛ́nɛ́ pɛ́r-nam ko Abraham, wi-de-tom kɔ̧-a̧, ɛ́nɛ́ o bem ko Jakob, o wi n'aa hoka, tɛ‘nɛ́'ɛ mbaŋ ɗoŋ o mɔɔ-gɔn-ɗɛɗɛ n'aa dea in dɔka mɔɔ-kifi ká bá nɛ̀ gɔna-kita kɔ̧-a̧ mbɛt.

⁷A̧ nɛ́ GASA WAN, Sɔ̧ k’ɛɛ; kita kɔ̧-a̧ dama zu nù lɛŋ.

⁸Tɛ-a bi ɗoŋ nɔɔ-tɔk kɔ̧-a̧ na ɓɔnsɛnɛ, ɓɛɛ ha̧a̧nú kɔ̧-a̧‘i duk wen bezaŋ yaknɛ sɔ̧i̧i̧;

⁹kànà nɛ́ kpɔk nɔɔ-tɔk kɔ̧-a̧ in Abraham'i á̧ à̧ kana nɛ̀ mɔ ha̧ Izak mbɛt.

¹⁰Ha̧a̧nú kɔ̧-a̧ hɔɔ gba̧a̧ tɛ ŋgimbi ko Jakob, sɛn zu o be Israɛl kpoo nɛ kpoo'e:

¹¹«Mi tɛ ha̧ nú Kanaŋ h’ɛ́nɛ́ nɛ̀ tɛ duk nɛ́ mɔɔ-oi k’ɛ́nɛ́.»

¹²Ŋgimbi nɛ o be Israɛl yaa so nɛnɛ nɛti, wa dɔk na, wi nyɛma so mɛ tɔr wa nɛ̀ bekete er-wi;

¹³wa yaa so hee o gɛnɛ ga yambali nɛnɛ nɛ̀ mgbara o tugun bíí nɛtɛ nɛtɛ nɛnɛ.

¹⁴Ɓɛɛ Sɔ̧ e ha̧ ŋma bíí kpɔk mɛ nukuri wa na; a̧ dee bɔnɛ in o ŋma wannu wen zu wa,

¹⁵wen a̧ tɔ̧a̧: «K’ɛ́nɛ́ fo tɛ o wi n'am hoka na, k’ɛ́nɛ́ de ɗaŋmɔ in o wi-tɔ̧-wen oi nú‘m na.»

¹⁶Sɔ̧ toma kaɓa pi̧ zu nù‘i; a̧ gbíná dɔ́rá[27] kɔ-wa.

¹⁷Ɓɛɛ nɛ́ mɔ'ɔ n'aa toma ŋma bíí ha̧ wa; wi’ɛi nɛ Jozɛf nɛ̀ wa ɗɔra so nɛ̀ bara.

¹⁸Wa pi̧i̧ poka naŋ-a, wa pi̧i̧ nyak-zɔɓɔ ger-a;

¹⁹duka hegɔɔ, ɓɛɛ wen ko Jozɛf hɔ gba̧a̧; mɛ̀ nɛ́ wen ko GASA WAN a̧ dee ha̧ wen'i mɛ nyɛm sɛnɛ.

²⁰Wannu toma bíí mɛ bur Jozɛf pi̧ nù; gasawi ko o dukbíí gboo a̧ kɔ̧ zɔɓɔ yinɛ;

²¹a̧ ea a̧ nɛ̀ wan zu kira kɔ̧-a̧, ɓɛɛ Jozɛf duk nɛ́ wan zu mɔ kɔ̧-a̧ lɛŋ.

²²Nɛ́ mɔ'ɔ nɛ̀ wannu ea a̧ nɛ̀ wan-usi-mɔ ha̧ o bezaŋ-wan, ha̧ a̧ mɛ usi mɔ ha̧ wa hee mɔ'ɔ n'aa kɔ̧a̧ ga, in ha̧ a̧ mɛ usi iŋa-mgbara-mɔ ha̧ o gasawi kɔ̧-a̧ mbɛt.

²³Israɛl gbina si Egiptɛ, Jakob nɛɛ de ye nù ko Kam.

²⁴Sɔ̧ dee ha̧ dukbíí kɔ‘i mɛ ko bem nɛ̀ dɔka-a, a̧ ha̧a̧ ŋgai ha̧ wa gan ko o wi-ɔ-wan zu wa;

²⁵nɛ̀ ɗoŋ, a̧ dee ha̧ o wi nɔ‘i mɛ sɛn dukbíí kɔ̧-a̧ in ha̧ wa mɛ de ɗaŋmɔ in o wi-de-tom kɔ̧-a̧ mbɛt.

²⁶Nɛ́ mɔ'ɔ nɛ̀ Sɔ̧ toma Moisɛ, wi-de-tom kɔ̧-a̧, in Arɔŋ, wi n'aa hoka so,

²⁷mɛ nɛ̀ɛ́ de mɔɔ-usi-mɔ in mɔɔ-kifi sɛn nù ko Kam ha̧ o wi nɔ‘i.

²⁸Sɔ̧ toma tum, ɓɛɛ tum ba nù kpɔ̧ɔ̧ kpɔ̧ɔ̧; nɛ́ mɔ'ɔ nɛ̀ o wi nɔ‘i ŋgoo zer;

²⁹a̧ dee ha̧ yì kɔ-wa mɛ kifi tɔk dekpe dekpe, ɓɛɛ o zoro kum lɛŋ.

³⁰Nù kɔ-wa lɛŋ duna nɛ̀ yaa-gbazal hɔ kɔ̧ gɔna-bɛr-tua ko wannu kɔ-wa mɛ mbɛt;

³¹Sɔ̧ tɔ̧ɔ̧ wen ɓɛɛ o kokoɗo-mɔ in o zifa hur nù kɔ-wa lɛŋ.

³²A̧ ha̧a̧ ɓɔrɔ ha̧ wa oi kórò, nyɛka leɓe-wee tika zu nù kɔ-wa lɛŋ;

³³a̧ ɗaŋa o nyak-dɔ̧ɔ̧ in o te-mbɔra kɔ-wa, a̧ gbina o te sɛn tɛ nù kɔ-wa a nù lɛŋ.

³⁴A̧ tɔ̧ɔ̧ wen, ɓɛɛ o diŋgo in o gba-dɔya nɛ‘i nyɛm mɛ tɔr na hur wa,

³⁵ɓɛɛ nyɔŋ zɔ̧ in o bɔr-nyɔnɔ nù‘i mgbót-mgbót;

³⁶ɓɛɛ a̧ kum o kaya-bem ko o wi nù‘i; o daŋa-ŋgaiwi zuduk kɔ-wa fee lɛŋ.

³⁷A̧ dee ha̧ dukbíí kɔ̧-a̧ mɛ kur tɛ nù‘i yak nɛ̀ oi lɔr in bu-mbɔi ko o zuduk bíí nù‘i lɛŋ; ŋma mɔ fo tɛ-wa na.

³⁸Kíì dee so o bíí Egiptɛ nyɛmna, ɓɛɛ kinii wa ya nɛ̀ desee tɛ gbina-a ko o wi nɔ‘i yak,

³⁹Sɔ̧ kpee zu dukbíí kɔ‘i nɛ̀ bu-zan, a̧ dee ha̧ wee mɛ nyɛk ti wa mɛ zɛ.

⁴⁰Wa kɔfa mɔɔ-nyɔŋ er-a, ɓɛɛ a̧ tom kpaŋanaŋa in nyɔŋmɔ nɛ̀ aa nù nɛ̀ yiwese ha̧ wa, ɓɛɛ wa nyɔŋ zaŋ-wa sur.

⁴¹Yí-nɔɔ maa tus nɛ̀ kɔ̧ ta n'aa hu̧i̧a̧ ha̧ wa, ɓɛɛ yì fok yaknɛ nɛ̀ tɛ ndaɗa-nù hee nana-yì ga.

⁴²Tɛ-a mbaŋa ɗoŋ ha̧a̧nú n'aa ha̧a̧ so ha̧ Abraham, wi-de-tom kɔ̧-a̧;

⁴³a̧ gboo dukbíí kɔ̧-a̧, ɓɛɛ tortɛ ba wa; o bíí n'aa hoka so'i gboo yak nɛ̀ gima desee.

⁴⁴Nɛ́ mɔ'ɔ n'aa baa nù er o tugun bíí nɛ̀ iŋ a̧ na ha̧ wa, ɓɛɛ wa kpa kɔ-wa nyɔnɔ ko o wi nɔ‘i sɔɔ géè.

⁴⁵Sɔ̧ dee hegɔ wen ha̧ wa mɛ kasi geŋa in heembea kɔ̧-a̧. Aleluya!