Read Northwest Gbaya GIMA 107 Bible Online

GIMA 107 - Northwest Gbaya bible

GIMA 107

¹Ɛ̀nɛ̀ dé osoko ha̧ GASA WAN wen a̧ ɔ dee; yora-ɗoŋ-wen kɔ̧-a̧ dúk ɓɔnsɛnɛ!

²O wi nɛ̀ GASA WAN kpasa er o wi-kur-zu wa a̧ dé osoko ha̧ a̧!

³O bíí n'aa mɔi̧a so nɛ̀ tɛ o nù nɛtɛ nɛtɛ ku̧u̧naŋ-a nɛ̀ daŋa-wese si yee-wese, nɛ̀ ká̧-zan-mɛ́-ŋgɔn hɔ ká̧-zan-mɛ́-ɗɔɔ lɛŋ, wa a̧ dé osoko ha̧ a̧!

⁴Wa duka pofi nɛ̀ ŋga-gbárà nɛ̀ fo-mɔ-bíí bo sɛnɛ na;

⁵wɔ tɛ̀ɛ́ kum wa ɓɔn, in ŋgai kaɗa so tɛ-wa lɛŋ,

⁶nɛ́ mɔ'ɔ nɛ̀ wa aia nú sitɛ GASA WAN tɛ bɔnɛ kɔ-wa'i, ɓɛɛ a̧ kpasi wa tɛ ŋgamɔ‘i.

⁷A̧ mgbɔɔ wa nɛ̀ tana-a zeeŋ nɛnɛ hɔ fara nɛ̀ bíí a̧a̧ sɛnɛ.

⁸Wa dee osoko ha̧ GASA WAN wen kɔ̧ɔ̧mɔ kɔ̧-a̧ in wen gasamɔ n'aa dee ha̧ o bezaŋ Adam.

⁹A̧ ha̧a̧ yì ha̧ o wi nɛ wɔ-yì gbɛ, ɓɛɛ zaŋ o wi nɛ̀ wɔ gbɛ sur.

¹⁰O yaa-gan-mbɔrɔ mbo zu ha̧ GASA WAN nɛ̀ duk ŋgɔn mɛ na, ɓɛɛ sa a̧ pi̧ bɔnɛ zu wa gbɔsi nɛ̀ wa ndaɗi nù, ɓɛɛ wa ya ɗɔɔ gi̧ɔ̧-fio de nɛ̀ kɔsa nɛ̀ tɛ-wa tɛ nyak-zɔɓɔ; ŋma wi-gbak-wa bo na.

¹³Nɛ́ mɔ'ɔ nɛ̀ wa aia nú sitɛ GASA WAN tɛ bɔnɛ kɔ-wa'i, ɓɛɛ a̧ kpasi wa tɛ ŋgamɔ‘i;

¹⁴GASA WAN daka wa gbonɛ ti tum ɗɔɔ gi̧ɔ̧-fio, a̧ gbina poka naŋ-wa yinɛ.

¹⁵Wa a̧ dé osoko ha̧ GASA WAN wen yora-ɗoŋ-wen kɔ̧-a̧ in wen mɔɔ-kifi n'aa dee ha̧ o bezaŋ Adam.

¹⁶A̧ gbina nú tua-boi, a̧ mboɓa kìí-boi difi a nù lɛŋ.

¹⁷O ŋma bíí a̧a̧ so sɛnɛ nɛ̀ ɗaŋmɔ yera wa pi̧ nù, nɛ̀ mɔɔ-oi ɗaŋmɔ dita zu wa,

¹⁸ɓɛɛ nú-wa ɔ̧ nyɔ̧ɔ̧ ɓɔna wen wa hɛɗa in fio dɔ̧ɔ̧ kaɗi.

¹⁹Nɛ́ mɔ'ɔ nɛ̀ wa aia nú sitɛ GASA WAN tɛ bɔnɛ kɔ-wa'i, ɓɛɛ a̧ kpasi wa tɛ ŋgamɔ‘i.

²⁰GASA WAN toma wen kɔ‘i wen kpasa wa, ɓɛɛ dak wa nɛ̀ kɔ̧ ɗuka kɔ̧ nɛ̀ wa tika'i gbonɛ.

²¹Wa a̧ dé osoko ha̧ Sɔ̧ wen yora-ɗoŋ-wen kɔ̧-a̧ in wen mɔɔ-kifi n'aa dee ha̧ o bezaŋ Adam.

²²Wa a̧ ɗáfí Sɔ̧ de nɛ̀ osoko ha̧ a̧, wa a̧ dé nyɛŋɛ we nɛ̀ ɗoŋ tom kɔ̧-a̧.

²³O ŋma bíí duka so yar kɔ‘i nɛ̀ gasa kombon nɛ̀ zu yì de nɛ̀ gɛnɛ kɔ-wa nɛnɛ;

²⁴o wi nɔ‘i zɔka tom ko GASA WAN, wa zɔka o mɔɔ-kifi n'aa dee nɛ̀ zu gba-tɔp nɛnɛ.

²⁵A̧ tɔ̧ɔ̧ ha̧ gba búk-kórò mɛ yu, ɓɛɛ gba búk'i ɓoɓi nɛ̀ ŋgaya-a;

²⁶yì pɛŋa nɛ̀ ŋgai fo kombon kpaŋkuleŋ si ŋgɔn, ɓɛɛ hɔ̧fi̧ mbɛr yì si ɗuka-fara mɛ, hiɗi-wa gɔna bɛlɛm, hee wa tɛ fe fee ga;

²⁷zu-wa zika yelewele, wa pi̧i̧ giɗi-giɗi hee ŋma zura wi-gbɛ-dɔ̧ɔ̧ ga, wa iŋ oi deemɔ kɔ-wa ɓɔna.

²⁸Nɛ́ mɔ'ɔ nɛ̀ wa aia nú sitɛ GASA WAN tɛ bɔnɛ kɔ-wa'i, ɓɛɛ a̧ kpasi wa tɛ ŋgamɔ‘i.

²⁹A̧ dee ha̧ ŋga búk mɛ ga̧ dezeŋ, ɓɛɛ o pɛŋa-yì ga̧ mbɛt.

³⁰Wa zɔka mɔɔ nɔ‘i nɛ̀ ga̧a̧ lɛŋ‘i, ɓɛɛ tortɛ ba wa, ɓɛɛ GASA WAN mgbɔ wa nɛnɛ si nú mbaŋ fara nɛ̀ wa nɛ́ si sɛnɛ‘i.

³¹Wa a̧ dé osoko ha̧ GASA WAN wen yora-ɗoŋ-wen kɔ̧-a̧ in wen mɔɔ-kifi n'aa dee ha̧ o bezaŋ Adam.

³²Wa a̧ tú̧ tɛ-a tɛ mɔi̧a-a ko o bíí, ɓɛɛ wa a̧ zɔ́n a̧ tɛ mɔi̧a-a ko giiwi mbɛt.

³³Ŋma, ɓɛɛ GASA WAN dee ha̧ nana-yì mɛ kifi duk nɛ́ ŋga-gbárà kotoroo, ɓɛɛ zu-zer kifa kɔ‘i nɛ́ kora nù kútú-kútú;

³⁴ŋma, ɓɛɛ a̧ kifa de nù nɛ̀ nù nɛ̀ dɛm nyɔnɔ na. A̧ de mɔɔ nɔ‘i lɛŋ oi ɗaŋmɔ ko o wi nɔ‘i.

³⁵Ŋma, ɓɛɛ a̧ kifa ŋga-gbárà nɛ̀ yí-fuk, a̧ dee ha̧ ndaɗa-nù kpál-kpál mɛ kifi zu-zer,

³⁶ɓɛɛ a̧ ha̧a̧ fara'i ha̧ o wi-wɔ mɛ de ye sɛnɛ.

³⁷Wa guna nyɔnɔ tɛ nù‘i, wa guna nyak-dɔ̧ɔ̧ fara'i mbɛt, ɓɛɛ nyɔnɔ dɛm ha̧ wa nɛ̀ dɔka-a.

³⁸GASA WAN toka de yoŋgo zu o wi nɔ‘i, ɓɛɛ wa nyɛɓi in o mɔ-dai kɔ-wa lɛŋ.

³⁹Wa sira so, wa dɔk ɓɔna sɔgbɔrɔ tɛ bɔnɛ in ŋgayamɔ nɛ̀ tika zu wa,

⁴⁰wen Sɔ̧ zɔk o be-wan sur yí na, ɓɛɛ a̧ yambali wa ɓɔn zaŋbɛɛ.

⁴¹GASA WAN kpasa o wisan tɛ bɔnɛ kɔ-wa, ɓɛɛ ha̧ dɔka bem ha̧ wa hee dɔka mɔ-dai ga.

⁴²Kà o wi-de-mɔ nɛ yuwar-a zɔk mɔ‘i, ɓɛɛ tortɛ baa wa; ko wi-ndela nɛ́ duka-a nɛ̀ oi nú selele.

⁴³Kà ŋma wi-iŋ-mgbara-mɔ nɛ́ bòó sɛnɛ, a̧ a̧ zɔ́k mɔɔ nɔ‘i nɛ̀ Sɔ̧ dea'i, ɓɛɛ a̧ a̧ iŋ nɛ̀ mgbara dee demɔ ko GASA WAN.