Read Northwest Gbaya GIMA 108 Bible Online

GIMA 108 - Northwest Gbaya bible

GIMA 108

¹Gima ko David.

²Sɔ̧, see-am ga̧a̧; mi kɔ̧ɔ̧ mɛ kuli mɔɔ-mbɛr bíí nɛ̀ gima h’ɛ́nɛ́. Ha̧‘m kur bɔɔ kɔ‘m sɛ!

³Kunde in koloŋ, ɛ̀nɛ̀ nɔ̧́í̧! Baa dik kaɗi, wese tɛ daŋ yɛ sɔsɔɔ!

⁴GASA WAN, mi tɛ gasi'nɛ́ mgbara o dukbíí, mi tɛ gasi'nɛ́ mgbara o tugun bíí!

⁵Dee demɔ k’ɛ́nɛ́ a̧a̧ fara lɛŋ hɔ yiwese mɛ mbɛt, ɓɛɛ kpasawen k’ɛ́nɛ́ dama tɛ tura-zan.

⁶Sɔ̧, ɛ̀nɛ̀ úsí tɛ‘nɛ́ nɛ̀ yiwese mɛ tɛnɛ! Ɛ̀nɛ̀ úsí gasamɔ k’ɛ́nɛ́ zu nù lɛŋ!

⁷Ɛ̀nɛ̀ kífí nú h’ɛ́ɛ́! Wii-er'nɛ́ a̧ kpásí yɛ! Ɛ̀nɛ̀ gbó o bíí k’ɛ́nɛ́ yinɛ tɛ bɔnɛ!

⁸GASA WAN baa ha̧ so nú nɛ̀ sa̧a̧-fara kɔ‘i ndé: «Mi Gbìn-biro, nɛ́ mi'i tɛ kɛ̧ nú Sikɛm, kànà nɛ́ mi'i tɛ kɛ̧ ɗɔŋgɔ Sukot mbɛt.

⁹«Galad tɛ duk nɛ́ kɔ‘m, in Manase tɛ duk nɛ́ kɔ‘m mbɛt; Efraim tɛ duk nɛ́ laasɔ̧i̧-boi zu'm. Juda tɛ duk nɛ́ dɔ́rá-wan kɔ‘m.

¹⁰Mɔab tɛ duk nɛ́ ɗɔŋgɔ fara-zui-yì kɔ‘m. Mi tɛ siŋ ndárà kɔ‘m pi̧ zu Edɔm; hegɔ mi bíí nɛ gima-biro zu o be Filistii!»

¹¹Nɛ́ o'o tɛ mgbɔ‘m ye nɛ̀ ye-ŋgárá‘i o? Nɛ́ o'o tɛ mgbɔ‘m hegɔɔ ye nɛ̀ nú Edɔm o?

¹²GASA WAN, bɔɔ nɛ́ ge s’ɛnɛ nɛ́ bɔɔ biro in o wi-biro k’ɛ́nɛ́ ɓɔna’ɛ ge?

¹³Ɛ̀nɛ̀ gbák yɛ tɛ bɔnɛ k’ɛɛ wen gbakamɔ ko bíí nɛ́ geemɔ.

¹⁴Kà Sɔ̧ nɛ́ yee ɗoŋ yɛ, ɛɛ tɛ de gasamɔ, ɓɛɛ a̧ tɛ mbɔli o wi-kur-zu yɛ nɔ‘i yinɛ.