Read Northwest Gbaya GIMA 111 Bible Online

GIMA 111 - Northwest Gbaya bible

GIMA 111

¹Aleluya! Mi de osoko ha̧ GASA WAN nɛ̀ see-am lɛŋ tɛ baa-keta ko o wi-de-mɔ nɛ yuwar-a nɛ̀ mɔi̧a!

²O tom nɛ GASA WAN dea ɔ gasa nyɛmna, ɓɛɛ o bíí nɛ kpɛka o tom nɔ‘i tɛ zɔk mɔɔ-oi-aa.

³Tom mɛ er-a nɛ́ ŋgiri mɔ, bó nɛ́ kpɛksɛ tom na; deemɔ kɔ̧-a̧ nɛ yuwar-a duk kpoo nɛ kpoo.

⁴A̧ e ha̧ tɛ-ɛɛ mɛ bi ɗoŋ o mɔɔ-kifi kɔ̧-a̧ na; GASA WAN nɛ́ de-wi nɛ̀ duna nɛ̀ ko.

⁵Nɛ́ a̧ a̧ ha̧ nyɔŋmɔ ha̧ o bíí nɛ̀ yu kíì a̧; ta-a duk tɛ nɔɔ-tɔk kɔ̧-a̧ ɓɔnsɛnɛ.

⁶A̧ usa o kin tom kɔ̧-a̧ ha̧ dukbíí kɔ̧-a̧; a̧ baa nù ko o ŋma tugun bíí ha̧ wa nɛ̀ mɔɔ-oi.

⁷O tom kɔ̧-a̧ lɛŋ nɛ́ deemɔ nɛ yuwar-a in kpasamɔ; o heembea kɔ̧-a̧ lɛŋ nyɛma ha'i mɛ e nɛ̀ ta.

⁸Kpasawen in deemɔ nɛ̀ yuwar-a nɛ́ gun heembea nɔ‘i; wa tɛ ya kànà kpoo nɛ kpoo.

⁹A̧ kpasa dukbíí kɔ̧-a̧; nɔɔ-tɔk kɔ̧-a̧ tɛ duk kànà kpoo nɛ kpoo. Nin-a ɔ sa̧a̧ nɛ̀ bó nɛ́ mɔɔ-de-zɛŋ ko bíí na.

¹⁰Ku̧u̧naŋ iŋa-mgbara-mɔ nɛ́ yuu kíí GASA WAN. O ndé lɛŋ nɛ̀ yu kíí a̧ a̧a̧ nɛ̀ kpasa taamɔ, ɓɛɛ bíí tɛ zɔn a̧ ɓɔnsɛnɛ.