Read Northwest Gbaya GIMA 118 Bible Online

GIMA 118 - Northwest Gbaya bible

GIMA 118

¹Ɛ̀nɛ̀ dé osoko ha̧ GASA WAN wen a̧ ɔ dee nyɛmna; yora-ɗoŋ-wen kɔ̧-a̧ dúk ɓɔnsɛnɛ!

²Nutua ko Israɛl a̧ tɔ̧́‘e, yora-ɗoŋ-wen kɔ̧-a̧ dúk ɓɔnsɛnɛ!

³Nutua ko Arɔŋ a̧ tɔ̧́‘e, yora-ɗoŋ-wen kɔ̧-a̧ dúk ɓɔnsɛnɛ!

⁴O wi-yu-kíí GASA WAN a̧ tɔ̧́‘e, yora-ɗoŋ-wen kɔ̧-a̧ dúk ɓɔnsɛnɛ!

⁵Mi saa sara sitɛ GASA WAN zaŋ dita-see kɔ‘m, ɓɛɛ a̧ kɔ̧ sara nú‘m ba'm e nyaŋan.

⁶Ŋma mɔɔ-pi̧-kíì tɛ‘m bo na wen GASA WAN a̧a̧ ɗoŋ-am; ge a̧ bíí tɛ de nɛ̀‘m ge?

⁷GASA WAN yor kɔ‘i ɗoŋ-am gbak nɛ̀‘m tɛ mɔ lɛŋ, ɓɛɛ nɛ́ mɔ‘i sa'm zɔk o wisɛn kɔ‘m sur yí‘m na.

⁸Hu̧sa̧-a̧ katɛ GASA WAN gana ee ta nɛ̀ bíí;

⁹hu̧sa̧-a̧ katɛ GASA WAN gana ee ta nɛ̀ o ŋgaya wannu mbɛt.

¹⁰O bíí nɛ̀ iŋ kpasa Sɔ̧ na zika'm kpe e nù, ɓɛɛ mi gɔm wa yai nɛ̀ nù nɛ̀ nin GASA WAN;

¹¹wa kɛra'm kpe e nù hi̧ɗaŋ, ɓɛɛ mi gɔm wa yai nɛ̀ nù nɛ̀ nin GASA WAN.

¹²Wa kɛra'm hee o dɛnɛ ga, ɓɛɛ wa bi lip hee wee poo tɛn ga; mi gɔma wa yai nɛ̀ nù nɛ̀ nin GASA WAN.

¹³Wa nasa'm mɛ gbɛ‘m yinɛ, ɓɛɛ GASA WAN gbak am.

¹⁴Ŋgai kɔ‘m nɛ́ GASA WAN; mi bíí nɛ gima ha̧ a̧ wen nɛ́ a̧ a̧ kpasa'm.

¹⁵O wi-de-mɔ nɛ yuwar-a ya kɔ̧ tua kɔ‘i bíí nɛ̀ gima nɛ̀ tortɛ wen wa kpasa kaɗi: «Wii-er GASA WAN dee ŋgamɔ,

¹⁶wii-er GASA WAN kpaa ŋgai gan zu mɔ lɛŋ, wii-er GASA WAN dee ŋgamɔ.»

¹⁷Kɔ‘m, mi beka fe na, mi tɛ duk kpasa ha̧‘m mɛ we ɗoŋ tom ko GASA WAN ha̧ o bíí;

¹⁸GASA WAN usa bɔnɛ ha̧‘m batɛ, ɓɛɛ mɔ kpɔk, a̧ gbɛ‘m na.

¹⁹Ɛ̀nɛ̀ hú̧í̧ nú tua ko Sɔ̧ ha̧‘m ye a̧‘m de osoko ha̧ a̧.

²⁰Nú tua ko GASA WAN nɛ́ mɔ'ɔ; kànà nɛ́ wi-de-mɔ nɛ yuwar-a a̧ tɛ ye sɛnɛ ɓɛɛ.

²¹Mi de osoko h’ɛ́nɛ́ wen ɛ́nɛ́ zia aia-nú kɔ‘m, ɓɛɛ ɛ́nɛ́ kpas'am, GASA WAN.

²²Ta nɛ̀ o wi-mbo-tua pi̧i̧ so taŋ‘i, nɛ́ ta'i a̧ kifa duk nɛ́ de kina-ta-e mgbii-tua.

²³Mɔ‘i nɛ́ deemɔ ko GASA WAN, ɓɛɛ duk nɛ́ gasamɔ yí-ɛɛ lɛŋ.

²⁴Wese’ɛ nɛ́ Sɔ̧'ɔ̧ dea; ɛ̀ɛ̀ yá nɛ desee de nɛ̀ nyɛŋɛ.

²⁵Ɛ̀nɛ̀ kpásí yɛ, GASA WAN! Ɛ̀nɛ̀ kpásí yɛ! Ɛ̀nɛ̀ gbák yɛ h’ɛ́ɛ́ mɛ gbin biro! Ɛ̀nɛ̀ gbák yɛ!

²⁶Toka-de-yoŋgo a̧ dúk zu wi nɛ̀ ye hɛ̧ɛ̧ nɛ̀ nin GASA WAN; ɛ́ɛ́ yá kɔ̧ tua ko GASA WAN tok nɛ̀ de yoŋgo kɔ̧-a̧ zu'nɛ́.

²⁷GASA WAN nɛ́ Sɔ̧, nɛ́ a̧ a̧ ha̧ sa̧a̧mɔ h’ɛ́ɛ́. Er'nɛ́ a̧ wáí nɛ̀ o gbaa-er-te hɔ nɛnɛ ká̧ fara-ɗafi-sɔ̧ mɛ.

²⁸Mi de osoko h’ɛ́nɛ́ wen ɛnɛ nɛ́ Sɔ̧ kɔ‘m kpɔk ɓɛɛ. Sɔ̧ kɔ‘m, mi zɔn nɛ ɛnɛ.

²⁹Ɛ̀nɛ̀ dé osoko ha̧ GASA WAN wen a̧ ɔ dee; yora-ɗoŋ-wen kɔ̧-a̧ dúk ɓɔnsɛnɛ!