Read Northwest Gbaya GIMA 119 Bible Online

GIMA 119 - Northwest Gbaya bible

GIMA 119

¹O wi nɛ̀ nɛ́ ɗoŋ ɗaŋmɔ na, nɛ̀ ndak nɛ́ ɗoŋ heembea ko GASA WAN, ya kɔ‘i nɛ̀ desee.

²O wi nɛ̀ e see lɛŋ tɛ geŋa ko Sɔ̧,

³nɛ̀ bá nɛ́ yuwar kɔ̧-a̧, nɛ̀ de ŋma ɗaŋmɔ na, ya kɔ‘i nɛ̀ desee.

⁴GASA WAN, ɛ́nɛ́ ha̧a̧ geŋa ha̧ bíí mɛ kasi nɛ̀ de-a;

⁵yuwar deemɔ kɔ‘m a̧ zɔ́k nɛ́ ɗoŋ taamɔ k’ɛ́nɛ́,

⁶ɓɛɛ hegɔ foe beka de'm tɛ kasa o heembea k’ɛ́nɛ́ na.

⁷Gɔna-kita k’ɛ́nɛ́ nɛ yuwar-a ha̧a̧ iŋamɔ ha̧‘m, ɓɛɛ nɛ́ mɔ'ɔ n'am de osoko h’ɛ́nɛ́ wen-aa nɛ̀ desee.

⁸Mi tɛ zɔk nɛ́ ɗoŋ taamɔ k’ɛ́nɛ́ de nɛ̀ mɔ kɔ‘m, ɓɛɛ k’ɛ́nɛ́ e'm wɔkɔrɔ na.

⁹Nɛ́ ge a̧ ŋgaiwi tɛ de ha̧ yuwar duka-a kɔ̧-a̧ mɛ sa̧ ge? A̧ tɛ kasi kànà nɛ́ wen k’ɛ́nɛ́ ɓɛɛ.

¹⁰Mi kii ɛ́nɛ́ nɛ̀ see-am lɛŋ, GASA WAN, k’ɛ́nɛ́ e ha̧‘m mɛ a̧r tɛ yuwar heembea k’ɛ́nɛ́ na.

¹¹Mi kasa o tɔ̧ɔ̧-wen k’ɛ́nɛ́ kɔ̧ see-am wen ká‘m tɛɛ de ɗaŋmɔ ti'nɛ́.

¹²Mi zɔn nɛ́ ɛ́nɛ́, GASA WAN, ɛ̀nɛ̀ úsí geŋa k’ɛ́nɛ́ ha̧‘m.

¹³Ndàra-nú‘m wee ɗoŋ o geŋa n’ɛ̀nɛ́ ha̧a̧ nɛ̀ nú‘nɛ́ lɛŋ.

¹⁴Ndaka ɗoŋ geŋa k’ɛ́nɛ́, ha̧a̧ desee ha̧‘m gan dɔka kpaamɔ.

¹⁵See-am ɓɔn tɛ geŋa k’ɛ́nɛ́ wen ha̧‘m mɛ bà nɛ́ yuwar k’ɛ́nɛ́ ɓɛɛ.

¹⁶Nɛ́ usamɔ k’ɛ́nɛ́ a̧ ha̧ o demɔ kɔ‘m lɛŋ ha̧‘m; tɛ‘m beka bi ɗoŋ wen k’ɛ́nɛ́ na.

¹⁷Ɛ̀nɛ̀ dé demɔ ha̧‘m, wi-de-tom k’ɛ́nɛ́, wen ha̧‘m mɛ duk kpasa, ɓɛɛ mi tɛ kasi wen k’ɛ́nɛ́.

¹⁸Ɛ̀nɛ̀ hú̧í̧ yí‘m ha̧‘m mɛ zɔk mɔ sitɛ gasa demɔ zaŋ o heembea k’ɛ́nɛ́.

¹⁹K’ɛ́nɛ́ hu̧si o heembea k’ɛ́nɛ́ nɛ̀‘m na wen mi nɛ́ gɛnɛ zu nù'ɛ.

²⁰Ŋgimbi lɛŋ mi yeŋ kɔ‘m nɛ́ gɔna-kita k’ɛ́nɛ́.

²¹Ɛ́nɛ́ nɛ́ wi-usi-bɔnɛ ha̧ o wi-ŋmaŋ-tɛ in o wi nɛ̀ fom baa wa tɛ a̧ra̧-a tɛ yuwar heembea k’ɛ́nɛ́.

²²Ɛ̀nɛ̀ bá wen-foe in gee tum wen nɛ̀ bíí pi̧ zu'm yinɛ wen mi kasi nɛ geŋa k’ɛ́nɛ́.

²³O be-wan mɔi̧ ya kpɔk fara bá nɛ̀ keta'm, ɓɛɛ kɔ‘m, wi-de-tom k’ɛ́nɛ́, mi e kɔ‘m see-am tɛ dee mɔ n’ɛnɛ kɔ̧a̧.

²⁴Geŋa k’ɛ́nɛ́ nɛ́ demɔ nyɛmna sɛn tɛ‘m; nɛ́ taamɔ k’ɛ́nɛ́ a̧ usi de yuwar ha̧‘m.

²⁵Mi yoo nù tɛ fuunu kpul; ɛ̀nɛ̀ kpás'am nɛ̀ wen k’ɛ́nɛ́.

²⁶Mi wee ɗoŋ yuwar tom kɔ‘m h’ɛ́nɛ́ ɓɛɛ ɛ́nɛ́ kifi nú ha̧‘m. Ɛ̀nɛ̀ úsí geŋa k’ɛ́nɛ́ ha̧‘m.

²⁷Ɛ̀nɛ̀ dé ha̧‘m mɛ iŋ yuwar geŋa k’ɛ́nɛ́ ɓɛɛ nú‘m beka bɛr tɛ wee ɗoŋ mɔɔ-gɔn-ɗɛɗɛ-wi k’ɛ́nɛ́ na.

²⁸Ɗaŋsee baa ya yí‘m yinɛ; ɛ̀nɛ̀ bá‘m e ŋgɔn nyɛm nɛ̀ ɗoŋ wen k’ɛ́nɛ́.

²⁹K’ɛ́nɛ́ e ha̧‘m mɛ tik tɛ yuwar ndela na; ɛ̀nɛ̀ dé ko ha̧‘m, ɓɛɛ ɛ̀nɛ̀ usi heembea k’ɛ́nɛ́ ha̧‘m.

³⁰Mi hoka kɔ‘m nɛ́ yuwar kpasawen yeŋ nɛ̀ gɔna kita k’ɛ́nɛ́.

³¹Mi tɛ ndaɗi tɛ o geŋa k’ɛ́nɛ́; k’ɛ́nɛ́ pi̧ foe tɛ‘m na, GASA WAN.

³²Mi ba yuwar heembea k’ɛ́nɛ́ nɛ̀ wara-yì wen ɛnɛ hu̧i̧a̧ taamɔ kɔ‘m ha̧‘m mɛ iŋ mgbara mɔ.

³³GASA WAN, ɛ̀nɛ̀ úsí yuwar geŋa k’ɛ́nɛ́ ha̧‘m wen ha̧‘m mɛ kasi nɛ̀ mɔɔ-oi kɔ‘m.

³⁴Ɛ̀nɛ̀ dé ha̧‘m mɛ iŋ yuwar heembea k’ɛ́nɛ́ wen ha̧‘m mɛ kasi nɛ̀ see-am lɛŋ.

³⁵Ɛ̀nɛ̀ mgbɔ́‘m nɛ̀ yuwar heembea k’ɛ́nɛ́ wen dua-see-am a̧‘i.

³⁶Ɛ̀nɛ̀ dé ha̧ see-am mɛ ndaɗi tɛ geŋa k’ɛ́nɛ́, ɓɛɛ bó nɛ́ tɛ géé kpaamɔ na.

³⁷Ɛ̀nɛ̀ fó yí‘m tɛ zɔka o géé tum mɔ yinɛ, ɛ̀nɛ̀ kpás'am nɛ̀ wen k’ɛ́nɛ́.

³⁸Tɔ̧ɔ̧-wen k’ɛ́nɛ́ a̧ hɔ́ gba̧a̧ wen wi-de-tom k’ɛ́nɛ́, wen ha̧ bíí mɛ yu kíí‘nɛ́.

³⁹Ɛ̀nɛ̀ kpás'am tɛ dara ziimɔ nɛ̀ o bíí da̧ nɛ‘m’ɛ; gɔna-kita k’ɛ́nɛ́ dee tɛ‘m nyɛmna.

⁴⁰Mi kɔ̧ɔ̧ kɔ‘m nɛ́ geŋa k’ɛ́nɛ́, ɛ̀nɛ̀ kpás'am nɛ̀ deemɔ nɛ̀ yuwar-a k’ɛ́nɛ́.

⁴¹GASA WAN, ɛ̀nɛ̀ úsí kɔ̧ɔ̧mɔ k’ɛ́nɛ́ ha̧‘m; ɛ̀nɛ̀ kpás'am nyɛm nɛ̀ ɗoŋ tɔ̧ɔ̧-wen k’ɛ́nɛ́,

⁴²ha̧‘m mɛ kpa mɔ n'am tɛ kifi nú sɛnɛ ha̧ o wi-da̧‘m, wen mi e ta nɛ̀ wen k’ɛ́nɛ́.

⁴³K’ɛ́nɛ́ ba kpasawen kɔ̧ nú‘m yinɛ na wen mi e ta nɛ̀ gɔna-kita k’ɛ́nɛ́.

⁴⁴Mi tɛ kasi heembea k’ɛ́nɛ́ yaknɛ sɔ̧i̧i̧ hegɔ ɓɔnsɛnɛ kpoo nɛ kpoo,

⁴⁵ha̧‘m mɛ nɛ nɔ̀ nɛ̀ fee-see, wen mi kia so kɔ‘m nɛ́ o geŋa k’ɛ́nɛ́.

⁴⁶Mi tɛ tɔ̧ wen geŋa k’ɛ́nɛ́ ti o wannu ɓɛɛ foe beka de'm na.

⁴⁷Mi kpa o demɔ kɔ‘m lɛŋ tɛ o heembea k’ɛ́nɛ́; o heembea nɔ‘i nɛ́ dua-see-am.

⁴⁸Mi mbo nɛ zu tɛ o heembea k’ɛ́nɛ́ n'am kɔ̧a̧‘i; see-am ɓɔn tɛ geŋa k’ɛ́nɛ́.

⁴⁹Tɛ‘nɛ́ a̧ mbáŋ ɗoŋ wen n’ɛnɛ tɔ̧ɔ̧ so ha̧‘m, wi-de-tom k’ɛ́nɛ́, wen nɛ́ wen'i a̧‘m e nɛ̀ ta.

⁵⁰Nɛ́ tɔ̧ɔ̧-wen k’ɛ́nɛ́ a̧ ga̧ see-am tɛ bɔnɛ kɔ‘m, nɛ́ wen k’ɛ́nɛ́ a̧ kpas'am.

⁵¹O wi-ŋmaŋ-tɛ zɛkɛɗa'm mam nɛnɛ suu-suu, ɓɛɛ kɔ‘m, mi e heembea k’ɛ́nɛ́ duk na.

⁵²GASA WAN, tɛ‘m mbaŋa ɗoŋ kita n’ɛnɛ gɔna so ŋma ŋgimbi’ɛ, ɓɛɛ see-am ga̧.

⁵³See-am nyima zu o wi-ɗaŋ nɛ̀ e o heembea k’ɛ́nɛ́ tɛ geemɔ.

⁵⁴Kɔ‘m, mi nɛ́ gɛnɛ zu nù'ɛ, geŋa k’ɛ́nɛ́ nɛ́ gima-bìì kɔ‘m.

⁵⁵Kóó mɛ zɛ mbɛt, tɛ‘m bi ɗoŋ nin'nɛ́ na, GASA WAN, ɓɛɛ see-am ɓɔn tɛ heembea k’ɛ́nɛ́.

⁵⁶Mɔ nɛ̀ nyɛma'm nɛ́ kasa geŋa k’ɛ́nɛ́.

⁵⁷GASA WAN, war mɔ kɔ‘m n'am kɔ̧a̧ nɛ́ kasa wen k’ɛ́nɛ́.

⁵⁸Mi ai nú h’ɛ́nɛ́ nɛ̀ see-am lɛŋ, ɛ̀nɛ̀ dé ko ha̧‘m nyɛm nɛ̀ ɗoŋ tɔ̧ɔ̧-wen k’ɛ́nɛ́.

⁵⁹Kà‘m tá mɔ zu yuwar n'am ba'i, ɓɛɛ mi pia ɗoŋ tɛ geŋa k’ɛ́nɛ́.

⁶⁰Mi nik naŋ-am tɛ ndaka pata o heembea k’ɛ́nɛ́ na.

⁶¹O yɔk ko o wi-ɗaŋ zika'm e see-a, ɓɛɛ kɔ‘m, tɛ‘m beka bi ɗoŋ heembea k’ɛ́nɛ́ na.

⁶²Mi kur nɛ̀ ɗuka zɛ de nɛ̀ osoko h’ɛ́nɛ́ wen o gɔna-kita k’ɛ́nɛ́ nɛ̀ yuwar-a.

⁶³Kɔ‘m, mi ndaɗi in o wi-yu-kíí‘nɛ́ nɛ̀ kasi o geŋa k’ɛ́nɛ́.

⁶⁴GASA WAN, dee demɔ k’ɛ́nɛ́ duna zaŋnu; ɛ̀nɛ̀ úsí mɔ n’ɛnɛ kɔ̧a̧, ha̧‘m de.

⁶⁵GASA WAN, ɛ́nɛ́ dee demɔ in am, wi-de-tom k’ɛ́nɛ́, nyɛm nɛ̀ ɗoŋ wen k’ɛ́nɛ́.

⁶⁶Ɛ̀nɛ̀ úsí demɔ nɛ̀ duk tɛ iŋamɔ in iŋa-mgbara-mɔ ha̧‘m wen mi e ta nɛ̀ o heembea k’ɛ́nɛ́.

⁶⁷Mi a̧ra̧ so ɓɛɛ mɔ ba tɛ‘m, ɓɛɛ kinii mi kasi nɛ tɔ̧ɔ̧-wen k’ɛ́nɛ́.

⁶⁸Ɛ́nɛ́ yaa-de-demɔ, ɛ́nɛ́ ɔ dee; ɛ̀nɛ̀ úsí mɔ n’ɛnɛ kɔ̧a̧, ha̧‘m de.

⁶⁹O wi-ŋmaŋ-tɛ hɛr nɛ‘m nɛ̀ ndela kɔ‘i, ɓɛɛ kɔ‘m, mi kasi kànà nɛ́ o geŋa k’ɛ́nɛ́ nɛ̀ see-am lɛŋ.

⁷⁰See-wa ɔ ŋgaya dekbeɗek hee kaŋa-nɔ̧́ ga, ɓɛɛ kɔ‘m, demɔ kɔ‘m lɛŋ tɛ nɛ̀ tɛ̀ heembea k’ɛ́nɛ́.

⁷¹Bɔnɛ n'am zɔk tɛ yamba mɔ n’ɛnɛ kɔ̧ɔ̧ ha̧‘m mɛ yambi'i kànà nɛ́ demɔ wen am mbɛt.

⁷²Heembea mɛ kɔ̧ nú‘nɛ́ nɛ́ demɔ kɔ‘m nɛ̀ gana gba dɔka mbɔi in lɔr.

⁷³Nɛ́ er'nɛ́'ɛ dea'm e hɛ̧ɛ̧; ɛ̀nɛ̀ dé ha̧‘m mɛ iŋ mgbara o heembea k’ɛ́nɛ́.

⁷⁴Wi-yu-kíí‘nɛ́ zɔk am nɛ̀ desee wen mi e ta nɛ̀ wen k’ɛ́nɛ́.

⁷⁵GASA WAN, mi iŋa ɛnɛ gɔn kita nɛ yuwar-a, ɓɛɛ bɔnɛ n’ɛnɛ usi ha̧‘m'i, nyɛma sɛnɛ.

⁷⁶Dee demɔ k’ɛ́nɛ́ a̧ dúk nɛ́ mɔɔ-ga̧-see-am nyɛm nɛ̀ ɗoŋ tɔ̧ɔ̧-wen k’ɛ́nɛ́ ha̧‘m, wi-de-tom k’ɛ́nɛ́.

⁷⁷Ɛ̀nɛ̀ úsí deako k’ɛ́nɛ́ ha̧‘m kpasi wen demɔ kɔ‘m lɛŋ tɛ nɛ̀ tɛ̀ heembea k’ɛ́nɛ́.

⁷⁸Foe a̧ dé o wi-ŋmaŋ-tɛ nɛ̀ de ndela a zu'm'i, ɓɛɛ kɔ‘m, mi ta nɛ o geŋa k’ɛ́nɛ́.

⁷⁹O wi-yu-kíí‘nɛ́ lɛŋ nɛ̀ iŋa geŋa k’ɛ́nɛ́ a̧ yé ɗoŋ-am.

⁸⁰Mi tɛ de mɔ nɛ̀ geŋa k’ɛ́nɛ́ kɔ̧a̧ nɛ̀ see-am lɛŋ, ɓɛɛ foe beka de'm na.

⁸¹Mi tɛ ndak pata'nɛ́ nɛ̀ see-am lɛŋ h’ɛ́nɛ́ mɛ kpas'am; mi e ta nɛ̀ wen k’ɛ́nɛ́.

⁸²Yí‘m tɛ pɛm kànà nɛ́ tɔ̧ɔ̧-wen k’ɛ́nɛ́ hɔ sɔŋkur-aa, ɓɛɛ mi'e ndé: Ɛ́nɛ́ tɛ ha̧ bɔɔ ga̧a̧-see ha̧‘m mɛ gese ge?

⁸³Mi hɔɔ ŋmaa in ŋma dak nɛ̀ zi-wee tu̧u̧ ɗaŋ biɗiki̧i̧, ɓɛɛ tɛ‘m bi ɗoŋ mɔ n’ɛnɛ kɔ̧ɔ̧ ha̧‘m mɛ de na.

⁸⁴Mɔ'ɔ, zɛ duka-a kɔ‘m, wi-de-tom k’ɛ́nɛ́, dɔk kɔ‘i ɓɔna ɛ̧ gɔ? Ɛ́nɛ́ tɛ gɔn bɔɔ kita zu o wi-nukur'am nɔ'ɔ mɛ gese ge?

⁸⁵O wi-ŋmaŋ-tɛ hur nɛ lim nɛ̀ yuwar nɛnɛ ha̧‘m; wa kasi kɔ-wa heembea k’ɛ́nɛ́ na.

⁸⁶Geŋa k’ɛ́nɛ́ lɛŋ nɛ́ kpasawen; kà o wi-ndela sɛkɛr'am, ɓɛɛ ɛ̀nɛ̀ yé ɗoŋ-am.

⁸⁷Oi-aa ŋgɛlɛk wa tɛ̀ɛ́ gbɛ‘m, ɓɛɛ kɔ‘m, mi e geŋa k’ɛ́nɛ́ duk na.

⁸⁸Ɛ̀nɛ̀ kpás'am nyɛm nɛ̀ ɗoŋ dee demɔ k’ɛ́nɛ́, ɓɛɛ mi tɛ kasi o geŋa n’ɛnɛ gɔna nɛ̀ nú‘nɛ́.

⁸⁹GASA WAN, wen k’ɛ́nɛ́ duk kpoo nɛ kpoo sɛn yiwese mɛ.

⁹⁰Yora-ɗoŋ-wen k’ɛ́nɛ́ kpai kɔ‘i na ndó-ndó-ndó; zɔk nù n’ɛnɛ ɓoo so kànà e fara-a zɛɓɛn'i, nɛ́ mɔ'ɔ nɛ̀ duk nɛnɛ ɓɔn oi er'nɛ́'ɛ.

⁹¹Nɛ́ tɛ gɔna-kita k’ɛ́nɛ́ á̧ mɔ lɛŋ duk nɛ̀ kɔ‘i hɔ sɔsɔɔ‘i, wen mɔɔ nɔ‘i lɛŋ nɛ́ mɔɔ-de-tom k’ɛ́nɛ́.

⁹²Heembea k’ɛ́nɛ́ à̧ dé so tɛ‘m na, ɓɛɛ mi baa fe so kɔ‘m tɛ bɔnɛ kaɗi.

⁹³Tɛ‘m beka bi ɗoŋ o geŋa k’ɛ́nɛ́ na ndó-ndó-ndó, wen nɛ́ wa a̧ kpasa'm.

⁹⁴Mi nɛ bíí k’ɛ́nɛ́; ɛ̀nɛ̀ kpás'am wen mi kii nɛ o geŋa k’ɛ́nɛ́!

⁹⁵Zɔk o wi nɛ mbo zu h’ɛ́nɛ́ na kii nɛ‘m mɛ gbɛ‘m yinɛ, ɓɛɛ kɔ‘m, mi e see-am tɛ tɔ̧ɔ̧-wen k’ɛ́nɛ́.

⁹⁶Mi kpaa ndaa mɔɔ-zaŋnu’ɛ lɛŋ hɔ nduti-a, ɓɛɛ ko o geŋa k’ɛ́nɛ́, mi hɔ nduti-a kà bó nɛ̀ kpaa ndaa-a na.

⁹⁷Heembea k’ɛ́nɛ́ nɛ́ dua-see-am; nú‘m ɓɔn sɛnɛ wese lɛŋ.

⁹⁸Nɛ́ geŋa k’ɛ́nɛ́ a̧ ha̧ iŋa-mgbara-mɔ ha̧‘m mɛ gan nɛ̀ o wisɛn kɔ‘m, ɓɛɛ mi ba e nɛ̀ war mɔ kɔ‘m kpoo nɛ kpoo.

⁹⁹Mi ee see-am tɛ tɔ̧ɔ̧-wen k’ɛ́nɛ́, ɓɛɛ mi kpa iŋamɔ gan o wan-usi-mɔ kɔ‘m lɛŋ.

¹⁰⁰Mi kasi o geŋa k’ɛ́nɛ́ nɛ̀ de-a ɓɔnsɛnɛ, ɓɛɛ sa'm iŋ mgbara mɔ gan o kuti-wi lɛŋ.

¹⁰¹Naŋ-am beka ba yuwar ɗaŋmɔ na ndó-ndó-ndó, wen mi kasi kɔ‘m nɛ́ wen k’ɛ́nɛ́.

¹⁰²Mi si kafɛ zu gɔna-kita k’ɛ́nɛ́ na, wen nɛ́ ɛnɛ'ɛ usi mɔ ha̧‘m.

¹⁰³Tɔ̧ɔ̧-wen k’ɛ́nɛ́ ɔ̧ɔ̧ nyɔ̧ɔ̧ tɛ‘m gan gɔrɔ.

¹⁰⁴Nɛ́ o geŋa k’ɛ́nɛ́'ɛ ha̧ iŋamɔ ha̧‘m, ɓɛɛ kɔ‘m kinii, mi tɛ sɛn o yuwar ndela lɛŋ.

¹⁰⁵Wen k’ɛ́nɛ́ nɛ́ lamba ti naŋ-am in sa̧a̧mɔ yuwar kɔ‘m.

¹⁰⁶Mi bee mɔ a tɛ‘m n'am beka e gɔna-kita k’ɛ́nɛ́ nɛ yuwar-a duk na; mi tɛ yor kana zu kanamɔ kɔ‘m mitak.

¹⁰⁷Zɔm ziimɔ baa'm, GASA WAN, ɛ̀nɛ̀ kpás'am nyɛm nɛ̀ ɗoŋ wen k’ɛ́nɛ́!

¹⁰⁸Ɛ̀nɛ̀ kpɛ́k kɔfa-sɔ̧ kɔ‘m, GASA WAN, ɛ̀nɛ̀ úsí gɔna-kita k’ɛ́nɛ́ ha̧‘m.

¹⁰⁹Kɔ‘m, mi hɔ nɛ yɔɔ-fio nɛnɛ; tɛ‘m beka bi ɗoŋ heembea k’ɛ́nɛ́ na.

¹¹⁰Kóó o wi-ɗaŋ a̧ tui nɛ pɛr ha̧‘m, mi beka a̧r ɗɔɔ geŋa k’ɛ́nɛ́ na.

¹¹¹Tɔ̧ɔ̧-wen k’ɛ́nɛ́ tɛ duk nɛ́ mɔɔ-oi kɔ‘m ɓɔnsɛnɛ; nɛ́ a̧ a̧ tɛ duk mɔɔ-ha̧-desee ha̧‘m mbɛt.

¹¹²Mi mɔka see-am ha̧‘m mɛ de mɔ n’ɛnɛ kɔ̧a̧ wen yí-mɔ nɛ̀ tɛ nyɛm am a̧‘i.

¹¹³Mi sɛna o wi nɛ̀ a̧a̧ nɛ̀ see yiitoo; mi kɔ̧ɔ̧ kɔ‘m nɛ́ heembea k’ɛ́nɛ́.

¹¹⁴Ɛ́nɛ́ nɛ́ ŋga fara-hu̧si kɔ‘m in ŋgee kɔ‘m, mi e ta nɛ̀ wen k’ɛ́nɛ́.

¹¹⁵Ɛ́nɛ́ o wi-ɗaŋ nɔ'ɔ, ɛ̀nɛ̀ yák nyɛi̧ nɛ‘m ha̧‘m kasi o geŋa ko Sɔ̧ kɔ‘m.

¹¹⁶Ɛ̀nɛ̀ dúk nɛ́ wi-gbak-am nyɛm nɛ̀ ɗoŋ tɔ̧ɔ̧-wen k’ɛ́nɛ́, ɓɛɛ mi tɛ duk kpasa; mi e ta nɛ̀ ɛnɛ, k’ɛ́nɛ́ e foe yí‘m na.

¹¹⁷Ɛ̀nɛ̀ dúk nɛ́ mɔɔ-ɛk-tɛ‘m ha̧‘m kpasi, ɓɛɛ see-am tɛ duk tɛ deemɔ n’ɛnɛ kɔ̧a̧ ŋgimbi lɛŋ.

¹¹⁸Ɛ́nɛ́ tɛ kai o wi nɛ̀ a̧ra̧ tɛ yuwar k’ɛ́nɛ́ lɛŋ a taŋ wen gɔn-ta kɔ-wa nɛ́ geemɔ yí‘nɛ́.

¹¹⁹K’ɛ́nɛ́ kànà nɛ́ gbɛra o wi-ɗaŋ yinɛ hee mɔ'ɔ nɛ̀‘i gbɛr nɛ̀ gbɛɛ-dua-mɔ yinɛ ɗoŋ boi’ɛ ga; nɛ́ mɔ‘i sa'm ndaɗi in tɔ̧ɔ̧-wen k’ɛ́nɛ́.

¹²⁰Tɛ‘m nak nak tɛ dee kíí‘nɛ́; kíì kita k’ɛ́nɛ́ de'm nyɛmna.

¹²¹Tom-dee kɔ‘m nɛ́ demɔ in deemɔ nɛ yuwar-a; k’ɛ́nɛ́ e'm er o wi-nas'am na.

¹²²Ɛ̀nɛ̀ yé ɗoŋ wi-de-tom k’ɛ́nɛ́ wen ká o wi-ŋmaŋ-tɛ tɛɛ tik zu'm.

¹²³Yí‘m ɗuka tɛ pɛma'nɛ́ h’ɛ́nɛ́ mɛ tɛ̀ɛ́ kpas'am nyɛm nɛ̀ ɗoŋ tɔ̧ɔ̧-wen k’ɛ́nɛ́ nɛ̀ yuwar-a.

¹²⁴Ɛ̀nɛ̀ dé mɔ ha̧ wi-de-tom k’ɛ́nɛ́ nyɛm nɛ̀ ɗoŋ geŋa k’ɛ́nɛ́; ɛ̀nɛ̀ úsí mɔ n’ɛnɛ kɔ̧a̧, ha̧‘m de.

¹²⁵Mi nɛ wi-de-tom k’ɛ́nɛ́; ɛ̀nɛ̀ úsí yuwar tɔ̧ɔ̧-wen k’ɛ́nɛ́ ha̧‘m iŋ mgbara-a.

¹²⁶GASA WAN, ŋgimbi-kifi-er hɔ̧ɔ̧ kaɗi; zɔk, wa gbina heembea k’ɛ́nɛ́.

¹²⁷Kɔ‘m, mi kɔ̧ɔ̧ o geŋa k’ɛ́nɛ́ gan oi mɔ lɛŋ, in gan sa̧a̧ lɔr mbɛt.

¹²⁸Mi ndak kànà nɛ́ pata o geŋa k’ɛ́nɛ́; mi sɛna yuwar ndela pi̧-er-tɛ-wee.

¹²⁹O tɔ̧ɔ̧-wen k’ɛ́nɛ́ nɛ́ mɔɔ-gɔn-ɗɛɗɛ-wi, hegɔ, mi kasi nɛ wa kɔ̧ see-am.

¹³⁰Kà‘i zíí wen k’ɛ́nɛ́ ɓɛɛ nɛ́ sa̧a̧mɔ a̧‘i kpa; nɛ́ wen'i a̧ ha̧ iŋamɔ ha̧ o wi nɛ̀ iŋ mɔ na.

¹³¹Wɔ heembea k’ɛ́nɛ́ gbɛ‘m gbɛɛ nyɛmna.

¹³²Ɛ̀nɛ̀ zík tɛ‘nɛ́ pii tɛ‘m, ɛ̀nɛ̀ dé ko ha̧‘m hee mɔ'ɔ n’ɛ̀nɛ̀ de nɛ̀ ko ha̧ o wi nɛ̀ kɔ̧ɔ̧ nin'nɛ́'ɛ ga.

¹³³Ɛ̀nɛ̀ dé ha̧ naŋ-am mɛ nɔ nù tɛ tɔ̧ɔ̧-wen k’ɛ́nɛ́ wen ká ɗaŋmɔ tɛɛ kpa ŋgai zu'm.

¹³⁴Ɛ̀nɛ̀ kpás'am er o wi nɔ'ɔ nɛ̀ nas'am’ɛ ha̧‘m kasi o geŋa k’ɛ́nɛ́.

¹³⁵Ɛ̀nɛ̀ úsí sa̧a̧mɔ sɔnti'nɛ́ ha̧ wi-de-tom k’ɛ́nɛ́; ɛ̀nɛ̀ úsí mɔ n’ɛnɛ kɔ̧a̧, ha̧‘m de.

¹³⁶Yí‘m fok nɛ̀ mi̧i̧kɔ̧a̧ kata-kata wen o bíí kasi heembea k’ɛ́nɛ́ na.

¹³⁷GASA WAN, ɛ́nɛ́ nɛ́ wi-de-mɔ nɛ yuwar-a nɛ̀ mbetɛ; ɛ́nɛ́ gɔn kita nɛ yuwar-a!

¹³⁸Tɔ̧ɔ̧-wen k’ɛ́nɛ́ duk nɛ yuwar-a in duk nɛ́ kpasa gɔna-kita nyɛmna.

¹³⁹See-am nyima batɛ wen tɛ o wi-kur-zu'm bìí ɗoŋ wen k’ɛ́nɛ́.

¹⁴⁰Tɔ̧ɔ̧-wen k’ɛ́nɛ́ dee mɔ hɔ gba̧a̧ fara lɛŋ, ɓɛɛ wen'i dee tɛ wi-de-tom k’ɛ́nɛ́.

¹⁴¹Tɛ ɔ̧ka̧-a̧ n'am ɔ̧ka̧ láɓá-líɓí in tɛ fɛŋa'm nɛ̀ wa fɛŋ‘i, tɛ‘m bi ɗoŋ o geŋa k’ɛ́nɛ́ na.

¹⁴²Deemɔ nɛ yuwar-a ko GASA WAN, nɛ́ kpasa deemɔ nɛ yuwar-a nyɛmna; heembea k’ɛ́nɛ́ nɛ́ kpasawen ɓɔnsɛnɛ.

¹⁴³Dita-see in bɔnɛ tika zu'm, ɓɛɛ demɔ kɔ‘m lɛŋ tɛ nɛ̀ tɛ̀ o heembea k’ɛ́nɛ́.

¹⁴⁴GASA WAN, tɔ̧ɔ̧-wen k’ɛ́nɛ́ duk nɛ́ deemɔ nɛ yuwar-a ɓɔnsɛnɛ; ɛ̀nɛ̀ dé ha̧‘m mɛ iŋ mgbara-a ha̧‘m duk kpasa.

¹⁴⁵GASA WAN, mi sa sara sitɛ‘nɛ́ nɛ̀ see-am lɛŋ; ɛ̀nɛ̀ kífí nú ha̧‘m ɓɛɛ mi tɛ de mɔ nɛ̀ dee tɛ‘nɛ́.

¹⁴⁶Mi sa nɛ ɛnɛ, ɛ̀nɛ̀ kpás'am ɓɛɛ mi tɛ kasi o geŋa k’ɛ́nɛ́.

¹⁴⁷Nɛti gɔna-ndaa-zan ɓɛɛ mi wora'nɛ́ kaɗi wen mi e ta nɛ̀ wen k’ɛ́nɛ́.

¹⁴⁸Mi ɓur yí‘m mɛ zɛ na mɔ sa̧ nɛnɛ; mi ta nɛ tɔ̧ɔ̧-wen k’ɛ́nɛ́.

¹⁴⁹GASA WAN, tɛ dee demɔ k’ɛ́nɛ́ ɛ̀nɛ̀ zíí tiger-am! Ɛ̀nɛ̀ kpás'am tɛ gɔna-kita k’ɛ́nɛ́.

¹⁵⁰Ɗaŋ o wi-kii-wen in am nɔ‘i a̧ hɛɗi tɛnɛ‘i; wa bo yuwar heembea k’ɛ́nɛ́ na.

¹⁵¹Ɓɛɛ k’ɛ́nɛ́, GASA WAN, ɛ́nɛ́ dúk dɔ̧ɔ̧ nɛ̀‘m; o geŋa k’ɛ́nɛ́ lɛŋ nɛ́ kpasawen.

¹⁵²Nɛti ɓeemɛ mi iŋa so tɔ̧ɔ̧-wen k’ɛ́nɛ́ nɛ̀ tɛ duk ɓɔnsɛnɛ kpoo nɛ kpoo.

¹⁵³Ɛ̀nɛ̀ zɔ́k kɔsa kɔ‘m, ɛ̀nɛ̀ kpás'am wen tɛ‘m bi ɗoŋ heembea k’ɛ́nɛ́ na.

¹⁵⁴Ɛ̀nɛ̀ yór ɗoŋ-am, ɛ̀nɛ̀ yé ɗoŋ-am; ɛ̀nɛ̀ kpás'am tɛ tɔ̧ɔ̧-wen k’ɛ́nɛ́!

¹⁵⁵O wi-ɗaŋ beka kpasi kɔ‘i na ndó-ndó-ndó wen wa kɔ̧ mɛ de mɔ nɛ̀ dee tɛ‘nɛ́ na.

¹⁵⁶GASA WAN, dee demɔ k’ɛ́nɛ́ dɔka nyɛmna; ɛ̀nɛ̀ kpás'am tɛ gɔna-kita k’ɛ́nɛ́.

¹⁵⁷O wi-nukur'am in o wi-kur-zu'm dɔka nyɛmna, ɓɛɛ mi wɛr tɛ‘m tɛ tɔ̧ɔ̧-wen k’ɛ́nɛ́ na.

¹⁵⁸Mi zɔka o wi nɛ̀ bɛ̧ɛ̧ yuwar k’ɛ́nɛ́, ɓɛɛ see-am kur in wa wen wa kasi tɔ̧ɔ̧-wen k’ɛ́nɛ́ na.

¹⁵⁹GASA WAN, mi kɔ̧ɔ̧ geŋa k’ɛ́nɛ́ nyɛmna; ɛ̀nɛ̀ kpás'am tɛ dee demɔ k’ɛ́nɛ́.

¹⁶⁰Wen k’ɛ́nɛ́ kànà nɛ́ kpasawen nyɛmna, gɔna-kita k’ɛ́nɛ́ nɛ yuwar-a duk kpoo nɛ kpoo.

¹⁶¹O be-wan nukura'm sɔɔ géè, ɓɛɛ kɔ‘m, nɛ́ wen k’ɛ́nɛ́ a̧‘m yu ɓɛɛ.

¹⁶²Tortɛ nɛ̀ ba'm tɛ tɔ̧ɔ̧-wen k’ɛ́nɛ́‘i bó nɛ́ mɔɔ-tɔ̧-na; duk hee zɔm mbɔi a̧‘m kpaa ga.

¹⁶³Mi sɛna ndela pi̧-er-tɛ-wee, ɓɛɛ heembea k’ɛ́nɛ́ nɛ́ dua-see-am.

¹⁶⁴War mɔɔrɔ-ɗoŋ-yiitoo dam ɗoŋ wese lɛŋ, mi zɔn nɛ ɛnɛ wen o gɔna-kita k’ɛ́nɛ́ nɛ̀ yuwar-a.

¹⁶⁵Mi iŋa wi nɛ̀ duk tɛ bɔtɛ, mɛ̀ nɛ́ wi nɛ̀ de mgbɛlɛ heembea k’ɛ́nɛ́, ɓɛɛ ŋma mɔ ha̧ wa mɛ tir yɔɔ-aa bo na.

¹⁶⁶GASA WAN, mi zɛm nɛ ɛnɛ h’ɛ́nɛ́ mɛ kpas'am; tom kɔ‘m kànà nɛ́ ndaka ɗoŋ geŋa k’ɛ́nɛ́.

¹⁶⁷See-am duk tɛ tɔ̧ɔ̧-wen k’ɛ́nɛ́ ɓɔnsɛnɛ, see-am ɓɔn sɛnɛ lɛk-lɛk.

¹⁶⁸Mi kasi nɛ o geŋa k’ɛ́nɛ́ in o tɔ̧ɔ̧-wen k’ɛ́nɛ́; zɔk, yuwar deemɔ kɔ‘m lɛŋ a̧a̧ ti'nɛ́.

¹⁶⁹GASA WAN, ɛ̀nɛ̀ zíí sara kɔ‘m; ɛ̀nɛ̀ dé ha̧ wen k’ɛ́nɛ́ mɛ ha̧ iŋa-mgbara-mɔ ha̧‘m.

¹⁷⁰O aia-nú kɔ‘m a̧ dáŋ hɔ tɛ‘nɛ́; ɛ̀nɛ̀ kpás'am tɛ tɔ̧ɔ̧-wen k’ɛ́nɛ́.

¹⁷¹Nú‘m a̧ pɛ́sí nyɛrɛ zɔnamɔ k’ɛ́nɛ́ yaknɛ sɔ̧i̧i̧ wen ɛ́nɛ́ usa mɔ nɛ̀ dee tɛ‘nɛ́ ha̧‘m mɛ de.

¹⁷²Nú‘m a̧ wé ɗoŋ tɔ̧ɔ̧-wen k’ɛ́nɛ́ wen mi iŋa o geŋa k’ɛ́nɛ́ lɛŋ duk nɛ̀ yuwar-a.

¹⁷³Ɛ̀nɛ̀ nyɛ́í̧ er'nɛ́ tɛnɛ pii tɛ‘m, ɛ̀nɛ̀ gbák am wen mi hoka kɔ‘m nɛ́ geŋa k’ɛ́nɛ́.

¹⁷⁴GASA WAN, mi kɔ̧ɔ̧ nyɛmna h’ɛ́nɛ́ mɛ kpas'am; demɔ kɔ‘m lɛŋ tɛ nɛ̀ tɛ̀ heembea k’ɛ́nɛ́.

¹⁷⁵See-am a̧ ɓɔ́n tɛ zɔna'nɛ́, ɓɛɛ gɔna-kita k’ɛ́nɛ́ a̧ gbák am.

¹⁷⁶Mi hɔɔ ŋmaa in sami nɛ̀ yɔa; ɛ̀nɛ̀ tɛ́ɛ̀ kíí wi-de-tom k’ɛ́nɛ́ wen tɛ‘m bi ɗoŋ o geŋa k’ɛ́nɛ́ na kóó tikiɗi.