Read Northwest Gbaya GIMA 132 Bible Online

GIMA 132 - Northwest Gbaya bible

GIMA 132

¹Gima daŋa-a si kɔ̧ tua ko Sɔ̧. GASA WAN, tɛ‘nɛ́'ɛ mbáŋ ɗoŋ David nɛ̀ oi bɔnɛ kɔ̧-a̧ lɛŋ.

²A̧ ha̧a̧ so nú kan nɛ̀ mɔ ha̧ GASA WAN, Wan-ŋgai ko Jakob ndé,

³wi beka ye kɔ̧ tua kɔ‘i na, wi beka ɔm tɛ-wi gɔn gado kɔ‘i na,

⁴wi beka e ha̧ ya mɛ de yí-wi na, kóó wi zura so ya, wi beka ɓur yí-wi na mbɛt,

⁵hɔ ŋgimbi nɛ̀‘i tɛ kpa fara-duk ha̧ GASA WAN, Wan-ŋgai ko Jakob sɛ.

⁶Zɔk, ɛɛ zia'e Kuɓa Nɔɔ-tɔk a̧a̧ sɛn Efrata, ɛɛ kpaa a̧ kɔ̧ kombon[32] mɛ.

⁷Ɛ̀ɛ̀ yé si fara-duk ko Sɔ̧, ɓɛɛ ɛ̀ɛ̀ gbɛ́ zugur yɛ ti mɔɔ-e-ɗɔɔ naŋ-a.

⁸Ɛ̀nɛ̀ kúr, GASA WAN! Ɛ̀nɛ̀ tɛ́ pii fara-ɔm-tɛ k’ɛ́nɛ́, ɛ̀nɛ̀ tɛ́ nɛ̀ oi kuɓa ŋgayamɔ k’ɛ́nɛ́ mbɛt.

⁹O wi-ɗafi'nɛ́ pi̧i̧ laa-usi-deemɔ nɛ̀ yuwar-a tɛ, ɓɛɛ o sa̧a̧-bíí k’ɛ́nɛ́ de nyɛŋɛ.

¹⁰K’ɛ́nɛ́ wɛr sɔnti-wi nɛ̀ wa tɛna nɔ̧́ a zu-a si mgbɔɔr na, wen zu David, wi-de-tom k’ɛ́nɛ́.

¹¹GASA WAN kana so mɔ ha̧ David n'aa beka kpai nú tɛ kanamɔ kɔ̧-a̧‘i na; gba̧a̧ wen-aa nɛ́ mɔ'ɔ: «Nɛ́ bezaŋ-mɛ a̧‘m tɛ e zu damti kɔ-mɛ.

¹²Kà o bezaŋ-mɛ á̧ kasa nɔɔ-tɔk kɔ‘m in o mɔ n'am usa ha̧ wa, ɓɛɛ o bezaŋ-wa mɛ ɗoŋ tɛ duk zu damti oi mɛ nɛ̀ nduti-a beka bo na.»

¹³Wen GASA WAN hoka nɛ́ Siɔŋ nɛ̀ fara-duk kɔ‘i;

¹⁴A̧ tɔ̧ɔ̧ ndé: «Fara'i tɛ duk nɛ́ fara-ɔm-tɛ‘m ɓɔnsɛnɛ; nɛ́ hi̧i̧ a̧‘m tɛ duk sɛnɛ wen nɛ́ mi'i hoka mɔ kɔ‘m.

¹⁵«Mi tɛ de ha̧ nyɔnɔ ko o wi-de-mɔ nɛ yuwar-a tɛ ye'i mɛ dɛm nɛ̀ dɔka-a, ɓɛɛ o wisan mgbara wa tɛ sur nɛ̀ nyɔŋmɔ.

¹⁶Mi tɛ pi̧ laa-duka-kpasa tɛ o wi-ɗafi-sɔ̧ kɔ-wa, ɓɛɛ o sa̧a̧-bíí kɔ‘m tɛ de nyɛŋɛ.

¹⁷«Mi tɛ ha̧ wan ha̧ ŋma bezaŋ David; mi tɛ ɗafi lamba ha̧ wan nɛ̀ wa tɛna nɔ̧́ a zu a̧;

¹⁸nɛ̀ war ko o wisɛn kɔ̧-a̧, mi tɛ pi̧ foe tɛ-wa, ɓɛɛ ko wan'i, kànà nɛ́ laasɔ̧i̧-wan a̧ tɛ tok zu-a lak-lak.»