Read Northwest Gbaya GIMA 141 Bible Online

GIMA 141 - Northwest Gbaya bible

GIMA 141

¹Gima ko David. GASA WAN, mi sa nɛ́ ɛ́nɛ́! Ɛ̀nɛ̀ tɛ́ pii tɛ‘m bee! Ɛ̀nɛ̀ zíí sara n'am sa sitɛ‘nɛ́‘i.

²Kɔfa-sɔ̧ kɔ‘m a̧ dáŋ sitɛ‘nɛ́ hee de pɛr nyama ga, a̧ dúk nɛ́ ha̧a̧mɔ-ɗafi'nɛ́ mɛ ga̧a̧mɔ.

³GASA WAN, ɛ̀nɛ̀ dór nú‘m, ɛ̀nɛ̀ pɛ́m ndàrá-nú‘m wen ká‘m tɛɛ tɔ̧ ndiŋ wen;

⁴k’ɛ́nɛ́ é ha̧ see-am mɛ wɛr sitɛ ɗaŋmɔ na, kóó ha̧‘m mɛ gbam yari in o wi-de-mɔ de na, na. Mi beka fo demɔ kɔ-wa nɛ̀ nú‘m na kóó tikiɗi.[35]

⁵Kà wi-de-mɔ nɛ yuwar-a mbɛr am, ɓɛɛ nɛ́ yora-ɗoŋ-wen kɔ̧-a̧ a̧ a̧ úsí ha̧‘m, ɓɛɛ ká nɔ̧́ ko wi-ɗaŋ hɔ́ zu'm na ndó-ndó-ndó. Mɔ kpɔk, kɔfa-sɔ̧ kɔ‘m wen zu ɗaŋ kɔ-wa'i a̧ duk ɓɔnsɛnɛ.

⁶Wa kaia o wi-gɔn-kita kɔ-wa ndusi mgbara ta, ɓɛɛ kinii wa iŋa wen n'am tɔ̧ɔ̧ so ha̧ wa'i nɛ́ kpasawen.

⁷Wen-aa nɛ mɔ'ɔ: Hee mɔ'ɔ nɛ kpánà gba nɛnɛ mbɔɗɔnu ɗɛ́sɛ́-ɗɛ́sɛ́'ɛ ga, nɛ́ hegɔ a̧ gba̧a̧-tɛ-ɛɛ sɔti nɛnɛ kɔ̧-fio mɛ.

⁸GASA WAN, Sɔ̧ kɔ‘m, yí‘m a̧a̧ tɛ‘nɛ́. Mi hu̧si katɛ‘nɛ́, k’ɛ́nɛ́ pi̧‘m taŋ na.

⁹Ɛ̀nɛ̀ pɛ́m am tɛ pɛ́r nɛ̀ wa tuia ha̧‘m in o sak nɛ̀ o wi-de-ɗaŋmɔ tɔna e ŋgɔn ha̧‘m'i.

¹⁰O wi-ɗaŋ nɔ‘i a̧ mɔ́í̧ ŋmaa a kɔ̧ yɔk kɔ-wa nɛ̀ wa aa'i, mi kpaa a̧‘m ɓir kɔ‘m yak.