Read Northwest Gbaya GIMA 143 Bible Online

GIMA 143 - Northwest Gbaya bible

GIMA 143

¹Gima ko David. GASA WAN, ɛ̀nɛ̀ yéŋ zer'nɛ́ tɛ kɔfa-sɔ̧ kɔ‘m, ɛ̀nɛ̀ zíí aia-nú kɔ‘m. Wen ɛ́nɛ́ nɛ́ wi nɛ̀ yor ɗoŋ ha̧a̧nú k’ɛ́nɛ́, in wi-de-mɔ nɛ yuwar-a, ɛ̀nɛ̀ kífí nú ha̧‘m.

²K’ɛ́nɛ́ ɓa wen in wi-de-tom k’ɛ́nɛ́ na, wen ŋma bíí zu nù'ɛ nɛ̀ wen bo zu-a na bo na.

³Wisɛn ndak nɛ‘m mɛ mbɔl'am yinɛ; a̧ pi̧a'm kɔ̧ gba-tum pɛsi-fio kpɔ̧ɔ̧-kpɔ̧ɔ̧.

⁴See-am gɔna lasak, ɓɛɛ mi ŋgai kaŋiŋi nɛ̀ kíì.

⁵Nɛ́ mɔ'ɔ nɛ̀ tɛ‘m mbaŋa ɗoŋ o kuti mɔ nɛ̀ yaka so, ɓɛɛ mi ta mɔ zu tom n’ɛnɛ dee so nɛti lɛŋ in zu mɔ nɛ̀ er'nɛ́ dee so.

⁶Mi nyɛi̧ nɛ er sitɛ‘nɛ́ wen sɔ̧-tɛ‘m de wɔ‘nɛ́ hee kuɗusu nú-yo-tua nɛ̀ kɔ̧ɔ̧ mɛ nɔ yì'ɛ ga.

⁷Ɛ̀nɛ̀ tɛ́ɛ̀ kífí nú ha̧‘m nɛ̀ haya-a, GASA WAN, wen hiɗ‘am gɔna kaɗi; k’ɛ́nɛ́ hu̧si sɔnti'nɛ́ nɛ̀‘m na wen ká‘m tɛɛ zir si mgbara o bíí nɛ̀ fea so.

⁸Ɛ̀nɛ̀ dé ha̧ kɔ̧ɔ̧mɔ k’ɛ́nɛ́ mɛ duk zu'm ɓɔnsɛnɛ wen mi e ta nɛ̀ ɛnɛ; ɛ̀nɛ̀ dé ha̧‘m mɛ iŋ yuwar n'am tɛ ba, wen ŋgai-tɛ‘m nɛ́ ɛ́nɛ́.

⁹GASA WAN, mi yu mɔ sitɛ‘nɛ́, ɛ̀nɛ̀ gbó‘m er o wisɛn kɔ‘m yinɛ.

¹⁰Ɛ̀nɛ̀ úsí yuwar deemɔ n’ɛnɛ kɔ̧a̧ ha̧‘m de wen ɛ́nɛ́ nɛ́ Sɔ̧ kɔ‘m; de ɔmi k’ɛ́nɛ́ a̧ mgbɔ́‘m nɛnɛ sitɛ de war.

¹¹GASA WAN, ɛ̀nɛ̀ kpás'am nyɛm nɛ̀ ɗoŋ ha̧a̧nú k’ɛ́nɛ́; ɛ̀nɛ̀ gbó‘m yinɛ tɛ bɔnɛ.

¹²Tɛ kɔ̧ɔ̧mɔ k’ɛ́nɛ́ wen am, ɛ̀nɛ̀ ɗáŋ o wisɛn kɔ‘m yinɛ; ɛ̀nɛ̀ kúm o wi-kur-zu'm gbuɗuk, wen kɔ‘m, mi nɛ wi-de-tom k’ɛ́nɛ́.