Read Northwest Gbaya GIMA 144 Bible Online

GIMA 144 - Northwest Gbaya bible

GIMA 144

¹Gima ko David. Ɛ̀nɛ̀ zɔ́n GASA WAN, kam-ta kɔ‘m, wen a̧ nɛ wi-gbak-am tɛ ɗafa mɔɔ-biro; nɛ́ a̧ a̧ usi ɗoŋ bíí biro ha̧‘m.

²A̧ nɛ́ wi-e-ta kɔ‘m in ŋga fara-duk kɔ‘m, a̧ nɛ́ ŋga fara-hu̧si kɔ‘m in wi-kpas'am; a̧ nɛ́ ŋgee-biro kɔ‘m, ɓɛɛ mi hu̧si ɗoŋ-aa. A̧ nasa o dukbíí a ɗɔɔ naŋ-am.

³GASA WAN, bíí so nɛ́ ge h’ɛ́nɛ́ mɛ ta mɔ wen-aa ge? Bíí so nɛ́ ge ha̧ tɛ‘nɛ́ mɛ mbaŋ ɗoŋ-aa ge?

⁴Bíí nɛ̀ duk’ɛ nɛ́ géé búk sɔɔ géè; ŋgimbi kɔ̧-a̧ yak hee wara-a ko gi̧ɔ̧ ga.

⁵GASA WAN, ɛ̀nɛ̀ búr yiwese, ɛ̀nɛ̀ zír tɛnɛ; ɛ̀nɛ̀ fó o kaya nɛ̀ nú-zɔ̧ɔ̧-er'nɛ ha̧ zi-wee mɛ tur nduɗɛɛ,

⁶ɛ̀nɛ̀ dé ha̧ kórò mɛ pi̧ ha̧ o wi-sɛn'nɛ́ mɛ pɛsi sót-sót, ɛ̀nɛ̀ pí̧ góò k’ɛ́nɛ́ pɛsi nɛ̀ wa a taŋ.

⁷Ɛ̀nɛ̀ nyɛ́í̧ er'nɛ́ nɛ̀ ŋgɔn mɛ tɛnɛ; ɛ̀nɛ̀ kpás'am, ɛ̀nɛ̀ dák am gbonɛ ɗɔɔ yì, ɛ̀nɛ̀ gbó‘m yinɛ er o gɔni-duk,

⁸nɛ̀ nú-wa duna nɛ̀ ndela, in er-wa nɛ̀ wa kana so nɛ̀ mɔ mbɛt.

⁹GASA WAN, mi bíí nɛ mbe gima zɔn nɛ̀ ɛnɛ nɛ̀ mɔɔ-mbɛr nɛ̀ nyak-aa ɓu.

¹⁰Ɛ́nɛ́ nɛ́ wan-ha̧-ŋgai ha̧ o wannu-gbin-biro; nɛ́ ɛnɛ'ɛ kpasi wi-de-tom k’ɛ́nɛ́, David.

¹¹Ɛ̀nɛ̀ kpás'am nú gba-paa-ari’ɛ; ɛ̀nɛ̀ ɓár'am er o gɔni-duk, yaa-tɔ̧-gɔni-wen nɔ'ɔ nɛ̀ kan mɔ nɛ̀ ndela sɔɔ géè'ɛ.

¹²O bem k’ɛɛ ya hee nyɔnɔ nɛ̀ gasi nɛnɛ nɛ̀ haya-a’ɛ ga; saŋa-yí o zɔŋa k’ɛɛ duk nɛ̀ yɔka-a kpɛ́ɗɛ́-kpɛ́ɗɛ́ hee o de sɛka-ta mɛ nú garo ko wannu ga.

¹³O dam k’ɛɛ duna nɛ̀ nyɔnɔ nɛtɛ nɛtɛ; o geɗek mɔ-dai k’ɛɛ nyɛɓa̧ dam zaŋbɛɛ nɛ̀‘i nyɛm mɛ tɔr na.

¹⁴O mɔ-dai k’ɛɛ ɔ ŋmaŋa; ŋma mɔɔ-ba-tɛ-wa kà bó nɛ̀ mɔɔ-ɗaŋ-wa yinɛ bo na. Fara k’ɛɛ nɛ́ de ga̧a̧ fara yɔlɔlɔ.

¹⁵Dukbíí nɛ̀ duk hee mɔ‘i ga duk kɔ‘i nɛ̀ desee! Dukbíí nɛ̀ GASA WAN nɛ́ Sɔ̧ kɔ-wa duk kɔ‘i nɛ desee mbɛt!