Read Northwest Gbaya GIMA 145 Bible Online

GIMA 145 - Northwest Gbaya bible

GIMA 145

¹Gima ko David. Mi bíí nɛ gima zɔn nɛ̀ ɛnɛ, wannu, Sɔ̧ kɔ‘m; mi zɔn nɛ nin'nɛ́ ɓɔnsɛnɛ.

²Mi kɔ̧ɔ̧ mɛ zɔn'nɛ́ wese kpɔk kpɔk; mi tɛ gasi nin'nɛ́ kpoo nɛ kpoo.

³GASA WAN ɔ gasa, wi zɔn a̧ nɛ kpasa zɔnamɔ; a̧ ɔ gasa nyɛmna nɛ̀‘i beka we zu nɛ̀ a̧ na.

⁴GASA WAN, o bezaŋ a̧ wé ɗoŋ zɔm mɔ n’ɛnɛ dea ha̧ o ŋmaa; wa a̧ zɔ́n o tom nɛ̀ er'nɛ́ dea.

⁵Wa tɛ zɔn'nɛ́ ɓɛɛ nin'nɛ́ tɛ hur, ɓɛɛ mi tɛ we ɗoŋ gasamɔ k’ɛ́nɛ́ ha̧ tɛ‘m nɛ̀ tɛ‘m mbɛt.

⁶Wa tɛ tɔ̧ nɛ́ nyɛrɛ ŋgaya mɔɔ-gɔn-ɗɛɗɛ-wi n’ɛnɛ dea, ɓɛɛ mi tɛ tɔ̧ kɔ‘m nɛ́ nyɛrɛ gasamɔ k’ɛ́nɛ́;

⁷tɛ bíí beka bí ɗoŋ dee demɔ k’ɛ́nɛ́ na, wa tɛ sumburi ɛnɛ wen deemɔ nɛ yuwar-a k’ɛ́nɛ́.

⁸GASA WAN nɛ́ wi-de-mɔ nɛ̀ de-a, a̧ nɛ wan-de-ko; a̧ de nyimsea nɛ̀ haya-a na, dee demɔ kɔ̧-a̧ ɔ dɔka nyɛmna.

⁹GASA WAN ɔ dee in bíí lɛŋ; a̧ de demɔ ha̧ o mɔ n'aa dee lɛŋ.

¹⁰GASA WAN, o mɔ n’ɛnɛ dee lɛŋ a̧ dé osoko h’ɛ́nɛ́; o sɛm k’ɛ́nɛ́ a̧ zɔ́n'nɛ́.

¹¹Wa a̧ tɔ̧́ nyɛrɛ gasa mɔɔ-wan in ŋgayamɔ k’ɛ́nɛ́,

¹²ha̧ o bíí mɛ iŋ ŋgayamɔ in gasa mɔɔ-wan k’ɛ́nɛ́.

¹³K’ɛ́nɛ́, ɛ́nɛ́ ɔ wan kpoo nɛ kpoo; mɔɔ-wan k’ɛ́nɛ́ duk pɛ nɛ̀ pɛ. Wen ko GASA WAN nɛ̀ tɔ̧ lɛŋ nɛ́ kpasawen; yora-ɗoŋ-wen kɔ̧-a̧ a̧a̧ tɛ mɔ n'aa de lɛŋ.

¹⁴GASA WAN tɛ ba o wi nɛ̀ tika nù e ŋgɔn, ɓɛɛ a̧ tɛ nyafi ɗoŋ o wi nɛ̀ ɗoŋ bira.

¹⁵Yí o bíí lɛŋ a̧a̧ tɛ‘nɛ́, GASA WAN, nɛ́ ɛnɛ'ɛ ha̧ nyɔŋmɔ ha̧ wa nɛ̀ ŋgimbi-a;

¹⁶nɛ́ ɛnɛ'ɛ hú̧í̧ er'nɛ́ ha̧ nɛ̀ nyɔŋmɔ ha̧ o mɔ lɛŋ nɛ̀ ya kpasa.

¹⁷Deemɔ ko GASA WAN lɛŋ duk nɛ yuwar-a; yora-ɗoŋ-ha̧a̧nú kɔ̧-a̧ a̧a̧ tɛ mɔ n'aa de lɛŋ.

¹⁸GASA WAN a̧a̧ katɛ o bíí lɛŋ nɛ̀ kɔfi a̧; bó nɛ́ o géé bíí nɛ̀ nú-tum na, nɛ́ o kpasa wi-wor-a.

¹⁹Mɔ nɛ̀ o wi-yu-kíí a̧ kɔ̧a̧, nɛ́ mɔ‘i a̧ a̧ de ha̧ wa; kà a̧ zii aia-nú kɔ-wa, ɓɛɛ a̧ kpasa wa.

²⁰GASA WAN nɛ́ wi-pɛm o wi nɛ kɔ̧ɔ̧ a̧, ɓɛɛ a̧ tɛ ɗaŋ o wi-ɗaŋ lɛŋ yinɛ.

²¹Nú‘m a̧ zɔ́n GASA WAN! Mɔ lɛŋ nɛ̀ ya kpasa a̧ zɔ́n sa̧a̧ nin-a hegɔ kpoo nɛ kpoo.