Read Northwest Gbaya GIMA 16 Bible Online

GIMA 16 - Northwest Gbaya bible

GIMA 16

¹Kɔfa-sɔ̧ ko David; gima ha̧ Miktam. Sɔ̧, ɛ̀nɛ̀ pɛ́m am wen ɛ́nɛ́ nɛ́ fara-hu̧si-tɛ‘m.

²Mi tɔ̧ɔ̧ ha̧ GASA WAN: «Ɛnɛ nɛ́ wan kɔ‘m; de duka-a kɔ‘m kànà nɛ́ sɛn katɛ‘nɛ́, ŋma mɔ nɛ̀ yaka zu'nɛ́ bo na.»

³O sa̧a̧-bíí nɛ ya zu nu’ɛ nɛ de bíí nyɛmna; wa nɛ́ desee kɔ‘m.

⁴O wi-ɗafi-gee-sɔ̧ ndak nɛ́ ɗoŋ o géé-sɔ̧ kɔ-wa'i. Mi tɛ tɛn tɔk saɗi-wor-sɔ̧ ha̧ o géé-sɔ̧ nɔ‘i nɛ er-am nde? Ndó-ndó-ndó! Mi tɛ hú̧í̧ nú‘m mɛ sa nin-wa nde? Ndó-ndó-ndó!

⁵GASA WAN, mɔɔ-oi kɔ‘m in be ɗele-nɔ-mɔ kɔ‘m nɛ́ ɛnɛ; nɛ́ ɛnɛ'ɛ pɛm duka-kpasa kɔ‘m.

⁶Ɛnɛ gbaa fɔ ha̧‘m tɛ de mɔka nù; kɔ‘m, nɛ́ de mɔɔ-oi a̧‘m kpaa.

⁷Mi tu̧ tɛ GASA WAN, wan-tɔ̧-mbɔrɔ ha̧‘m; mɛ zɛ lɛŋ see-am ɓɔn tɛ mɔ n'aa usi ha̧‘m.

⁸GASA WAN nɛ́ wan-duk-ti kɔ‘m ɓɔnsɛnɛ; kà à̧ nɛ́ duka nɛ̀ war wii-er-am, mi beka kɔ̧ naŋ-am na.

⁹Hegɔ mi duk nɛ̀ desee, mi de nɛ́ nyɛŋɛ, ɓɛɛ kiitɛ‘m tɛ duk kànà nɛ̀ de-a mbɛt,

¹⁰wen ɛ́nɛ́ beka e ha̧‘m mɛ ɓɔn ye ko o fio na. Ɛ́nɛ́ beka e ha̧ wi n’ɛnɛ kɔ̧a̧ mɛ tik kɔ̧ gombo-kɔ̧ na.

¹¹Ɛ́nɛ́ tɛ usi yuwar duka-kpasa ha̧‘m; ɛ́nɛ́ tɛ de ha̧‘m mɛ duk in'nɛ̀ɛ́ ha̧‘m mɛ kpa desee, ɓɛɛ ɛ́nɛ́ tɛ e'm nɛ̀ war wii-er'nɛ́ ha̧‘m mɛ kpa demɔ nɛ̀ beka kaɗi na ɓɔnsɛnɛ.