Read Northwest Gbaya GIMA 17 Bible Online

GIMA 17 - Northwest Gbaya bible

GIMA 17

¹Kɔfa-sɔ̧ ko David. GASA WAN, ɛ̀nɛ̀ zíí mgbák wen mɛ nú‘m, ɛ̀nɛ̀ zíí saa-sara kɔ‘m; ɛ̀nɛ̀ yéŋ zer'nɛ́ tɛ kɔfa-sɔ̧ kɔ‘m, wen bó nɛ́ zɛŋ à̧‘m de na.

²Nɛ́ ɛnɛ'ɛ tɛ gɔn kita zu'm; yí‘nɛ́ a̧a̧ tɛ deemɔ nɛ̀ tana-a ko bíí.

³Ɛ́nɛ́ wé nɛ see-am, mɛ zɛ ɛ́nɛ́ tɛ̀ɛ̀ zɔk am; ɛ́nɛ́ kia mɔ tɛ‘m, ɓɛɛ ɛ́nɛ́ kpa ŋma mɔ na, ɓɛɛ ɛ́nɛ́ zii ku̧i̧amɔ kɔ‘m na mbɛt.

⁴Nú‘m tɔ̧ ɗaŋ wen hee o ŋma bíí ga na; mi kasa wen nɛ̀ gboo nɛ̀ nú‘nɛ́ nɛ de-a.

⁵Mi ba nɛ war n’ɛnɛ baa ɗafi so'i, mi ndak nɛ oi pata naŋ‘nɛ́ wen ká naŋ-am tɛɛ mbali ŋmaa.

⁶Mi nɛ́ mɔ'ɔ n'am sa'nɛ́'ɛ, Sɔ̧, ɛ̀nɛ̀ kífí nú ha̧‘m. Ɛ̀nɛ̀ yéŋ zer'nɛ́, ɛ̀nɛ̀ zíí wen nú‘m.

⁷Wan-kpasi o wi-yu-mɔ, ɛ̀nɛ̀ úsí gasa dee demɔ k’ɛ́nɛ́ ha̧‘m. Ɛ̀nɛ̀ pɛ́m am ti o wi-nasi-bíí.

⁸Ɛ̀nɛ̀ zɔ́k am hee mɔ'ɔ nɛ‘i zɔk nɛ tu̧ gbaayí-wi’ɛ ga, ɓɛɛ ɛ̀nɛ̀ hú̧s'am ɗɔɔ gi̧ɔ̧ er'nɛ́

⁹wen o wi-ɗaŋ nɔ‘i nɛ̀ yukut'am'i. O wisɛn kɔ‘m kɛra'm ɔm nɛnɛ nɛ̀ ŋgai mɛ gbɛ‘m yinɛ.

¹⁰Zɔ́k yora-a nɛ̀ wa yor tɛnɛ vɔtɔk wo! Nú-wa duna nɛ̀ wen-ŋmaŋ-tɛ.

¹¹Wa a̧ mboɗi tɛnɛ ɗoŋ-am zununu'i; ɓaa mɔ nɛ wa kii kpɔk nɛ́ fio-tɛ‘m ɓɛɛ.

¹²Wa hɔɔ ŋmaa in dila nɛ̀ ɓɛkɛti mɔ mɛ ba; wa duk hee daŋa-ŋgai-dila nɛ̀ hai saɗi mɛ ba’ɛ ga.

¹³Ɛ̀nɛ̀ kúr, GASA WAN! Ɛ̀nɛ̀ gɔ́n ti wisɛn kɔ‘m nɛnɛ! Ɛ̀nɛ̀ túí wa gusi nɛ̀ nù! Gba-paa k’ɛ́nɛ́'ɛ kpas'am er o wi-ɗaŋ!

¹⁴GASA WAN, er'nɛ́'ɛ kpas'am er o bíí nɔ'ɔ zaŋnu’ɛ! Ɛ̀nɛ̀ há̧ mɔɔ-zaŋnu nɛ wa kii’ɛ ha̧ wa; ɛ̀nɛ̀ dé ha̧ wa mɛ ko bem a nù nɛ dɔka-a; ɛ̀nɛ̀ dé ha̧ o bezaŋ-wa mɛ kpa kpɔk mɔ‘i mbɛ́t.

¹⁵Ɓɛɛ kɔ‘m, mɔɔ-oi deemɔ kɔ‘m nɛ yuwar-a nɛ́ zɔka sɔnti'nɛ́. Kà‘m bé tɛ̀ɛ́ tun, zɔka gi̧ɔ̧-tɛ‘nɛ́ n'am tɛ zɔk'i, ɓɛɛ ga̧a̧-a̧ a̧ see-am ga̧a̧‘i.