Read Northwest Gbaya GIMA 18 Bible Online

GIMA 18 - Northwest Gbaya bible

GIMA 18

¹Gima ko wi-de-tom ko GASA WAN ha̧ wan-duk-zu-gima. David bia gima’ɛ ŋgimbi nɛ GASA WAN gboo nɛ̀ a̧ er Saul in o wisɛn kɔ̧-a̧ lɛŋ.

²A̧ tɔ̧a̧: Mi kɔ̧ɔ̧‘nɛ́, GASA WAN, wen ɛnɛ nɛ́ ŋgai kɔ‘m. Wan-kpas'am, ɛ́nɛ́ kpàsa'm tɛ ŋgamɔ nɛ kpaa'm.

³GASA WAN nɛ́ ta-ɛk-tɛ‘m, a̧ nɛ́ ŋga fara-duk kɔ‘m; wan-gbo'm er o wisɛn kɔ‘m nɛ Sɔ̧. Mi hu̧si ɗɔɔ gi̧ɔ̧-tɛ-a, wen a̧ nɛ́ kam-ta kɔ‘m; a̧ nɛ́ ŋgee kɔ‘m in zak-kpas'am[3],

⁴a̧ nɛ́ fara-hu̧si-tɛ‘m. Zɔnamɔ a̧ duk nɛ́ kɔ̧-a̧! Kà‘m sá GASA WAN ɓɛɛ a̧ kpasa'm er o wisɛn kɔ‘m.

⁵Fio aa mbul kɔ‘i zik nɛ̀‘m; kin-yì ɗaŋmɔ pi̧i̧ bele tɛ‘m.

⁶Yɔk yukuta'm mɛ zuɗ‘am pi̧ fara ko o fio; fio za̧a̧ lim gɔn nɛ̀ ti'm.

⁷Mi saa GASA WAN tɛ ŋmana-see kɔ‘m'i, mi aia nú sitɛ Sɔ̧ kɔ‘m; nɛ́ mɔ'ɔ nɛ aia-nú kɔ‘m'i aa zer-aa, ɓɛɛ a̧ zii tiger-am nɛ̀ kɔ̧ sa̧a̧ tua kɔ̧-a̧ mɛ.

⁸Nù foo mɔ ɗirr, ɓɛɛ o gun kaya zuɗi ɓut. Nɛ́ nyimsea kɔ̧-a̧ a̧ dee ha̧ mɔ mɛ fo mɔ.

⁹Zi-wee tura nɛ̀ kɔ̧ zɔ̧ɔ̧-a̧a̧ gbonɛ nduɗɛɛ, wee baa kɔ̧ nú-a mbɛt, ɓɛɛ o kɛ̧i̧-wee nyɔŋ yoŋgoŋgo.

¹⁰Nɛ́ mɔ'ɔ n'aa gira yiwese ɓɛɛ a̧ zir tɛnɛ nɛ̀ tu̧-zan ɗɔɔ naŋ-a.

¹¹A̧ daŋa zu keribim[4] ɓɛɛ búk ba a̧ bu̧i̧ nɛnɛ faoo yaknɛ.

¹²A̧ baa tum kpe nɛ̀ tɛ-a; a̧ dee ha̧ tum-kórò mɛ duk nɛ́ tua kɔ̧-a̧;

¹³sa̧a̧mɔ sɔnti-a dee ha̧ ɓɔrɔ in kɛ̧i̧-wee mɛ ba wee gɛlɛm.

¹⁴GASA WAN tuɓa nɛ̀ yiwese mɛ; GASA WAN nɛ̀ duk ŋgɔn mɛ dee ha̧ bíí mɛ zii tiger-a.

¹⁵A̧ pi̧i̧ góò ndak nɛ̀ o wisɛn kɔ̧-a̧, a̧ toma pi̧i̧-kórò pɛsi nɛ̀ wa a taŋ sót-sót.

¹⁶GASA WAN, ɛnɛ tɔ̧ɔ̧ wen nɛ nyimsea, búk gboo nɛ̀ kɔ̧ zɔ̧ɔ̧‘nɛ́ nɛ̀ dee ha̧ yì mɛ ɔ̧si̧ gɔn mgbót-mgbót, in ha̧ o ta nɛ̀ gun-nù duk zu-a mɛ gbo a zan.

¹⁷A̧ nyɛi̧a er-a tɛnɛ nɛ̀ ŋgɔn mɛ ba nɛ̀‘m yinɛ zɛɓɛn; a̧ daka'm ɗɔɔ gasa yì gbonɛ.

¹⁸A̧ gboa'm er ŋga wisɛn kɔ‘m yinɛ; a̧ kpasa'm er o wi-kur-zu'm nɛ̀ ŋgaia gan am.

¹⁹Wa kura so zu'm wese bɔnɛ kɔ‘m, ɓɛɛ GASA WAN ye ɗoŋ-am.

²⁰A̧ ɓara'm er wa yinɛ ha̧‘m mɛ yak mɔ kɔ‘m; a̧ kpasa'm wen n'aa kɔ̧a̧‘m nyɛmna.

²¹GASA WAN ha̧ mɔ ha̧a̧ ha̧‘m nyɛm nɛ̀ ɗoŋ deemɔ kɔ‘m nɛ yuwar-a; a̧ de demɔ dee in am nyɛm nɛ̀ ɗoŋ tom kɔ‘m,

²²wen mi ndaka pata yuwar kɔ̧-a̧ nɛ de-a, mi zik ɗoŋ-am e ha̧ a̧ na mbɛt.

²³O heembea kɔ̧-a̧ lɛŋ duk ɓɔn yí‘m; ɓɛɛ mi e o geŋa kɔ̧-a̧ duk na.

²⁴A̧ iŋa ndè, ŋma ɗaŋmɔ bo tɛ‘m na, wen mi kasi nɛ zu'm ká‘m tɛɛ yɔ kaya.

²⁵GASA WAN de demɔ dee in am nyɛm nɛ ɗoŋ deemɔ kɔ‘m nɛ yuwar-a, wen er-am duk nɛ̀ sa̧a̧-a̧ sɛn ti a̧.

²⁶GASA WAN, ɛ́nɛ́ nɛ́ wan-yor-ɗoŋ wi-mbo-zu; ɛ́nɛ́ nɛ́ wi-de-mɔ nyɛm sɛnɛ in bíí nɛ̀ de mɔ nyɛm sɛnɛ.

²⁷Ɛ́nɛ́ duk nɛ̀ sa̧a̧-a̧ sɛn yí wi nɛ̀ duk nɛ̀ sa̧a̧-a̧; ɓɛɛ wi nɛ̀ a̧a̧ nɛ̀ see yiitoo in'nɛ̀ɛ́, ɛ́nɛ́ de kànà nɛ́ mɔɔ-gɔn-zaŋ in a̧ mbɛt.

²⁸Ɛ́nɛ́ kpasi k’ɛ́nɛ́ nɛ́ dukbíí nɛ̀ a̧a̧ nɛ mɔka-see, ɓɛɛ ɛ́nɛ́ dee ká wi-gasi-zu ba yí nɛ̀ ŋgɔn na.

²⁹GASA WAN, ɛnɛ nɛ́ lamba kɔ‘m; Sɔ̧ kɔ‘m, nɛ́ ɛnɛ'ɛ nyɛk gɔn zik am.

³⁰Nɛ́ ɛnɛ'ɛ gbak am mɛ ye mgbara o wisɛn kɔ‘m, nɛ́ ɛnɛ'ɛ gbak am mɛ kpíɗí yak zu garo sitɛ wa mbɛt.

³¹Wi nyɛm mɛ tɔ̧ wen zu tom ko Sɔ̧ na; wen ko GASA WAN bó nɛ́ ndela na. A̧ nɛ́ ŋgee ko bíí lɛŋ nɛ̀ hu̧si tɛ ɗoŋ-aa.

³²Ŋma bíí nɛ̀ gana Sɔ̧ nɛ́ o? Ŋma ta-hu̧si-tɛ k’ɛɛ yak zu GASA WAN nɛ́ o nde?

³³Nɛ́ Sɔ̧'ɔ̧ ha̧ ŋgai ha̧‘m, ɓɛɛ mɔ n'am de lɛŋ hɔ nɛ gba̧a̧.

³⁴Nɛ́ a̧ a̧ de ha̧‘m mɛ nɛ̀ nɔ̀ nɛ̀ de-a hee zambɛrɛ ga; nɛ́ a̧ a̧ de ha̧‘m mɛ yor mitak zu kusa kaya;

³⁵nɛ́ a̧ a̧ usi bíí biro ha̧‘m; nɛ́ a̧ a̧ usi ŋgaŋa kusaa-ndɛrɛ ha̧‘m.

³⁶GASA WAN, ɛ́nɛ́ ha̧a̧ ŋgee-gbin-biro ha̧‘m; wii-er'nɛ́ ha̧a̧ ŋgai ha̧‘m. Ɛnɛ usa mɔ ha̧‘m nɛ̀ de-a.

³⁷Nɛ́ ɛnɛ'ɛ de ha̧‘m mɛ ma yì nɛ ŋgaya-a, ɓɛɛ ŋgɛɗɛ-naŋ-am mbɔi na.

³⁸Kà‘m ndák pata o wisɛn kɔ‘m ɓɛɛ mi kpaa wa; mi kum wa lɛŋ kaɗi sɛka'm pia ɗoŋ.

³⁹Kà‘m yó wa a nù, wa kur ɓɔna; wa aa nù gbuɗuk, ɛ̧ɛ̧ kinii’ɛ wa a̧a̧ ɗɔɔ naŋ-am.

⁴⁰GASA WAN, ɛ́nɛ́ ha̧a̧ ŋgai ha̧‘m tɛ biro; ɛ́nɛ́ dee ha̧ o wi-nas'am mɛ tir a nù gbéyéŋ sɛn ti'm.

⁴¹Ɛnɛ dee ha̧ o wisɛn kɔ‘m mɛ zik tɛ, yu mɔ yak, ɓɛɛ mi gbɛ o wi-kur-zu'm nɔ‘i lɛŋ.

⁴²Wa hiɗa mɔ ɓɛɛ wi-ye-ɗoŋ-wa bo na; wa hiɗa mɔ sitɛ GASA WAN, ɓɛɛ kifa-nú bo ha̧ wa na.

⁴³Mi hɔ̧na wa kifi nɛ kutumu̧i̧; mi i̧sa wa gɔn lekete hee ɓɔtɛ yuwar ga.

⁴⁴GASA WAN, ɛ́nɛ́ kpasa'm er dukbíí kɔ‘m nɛ̀ kura so zu'm; ɓɛɛ nɛ́ mɔ'ɔ n’ɛ̀nɛ́ ea'm zu o tugun bíí, ɓɛɛ ɛ́nɛ́ ha̧ ŋma dukbíí n'am iŋ na ha̧‘m mɛ ɔ wan zu wa mbɛt.

⁴⁵O gɔni-duk nɛ́ mɔ'ɔ nɛ tɛ tɛ‘m ha̧‘m mɛ de demɔ ha̧ wa; kà‘m hé mbea ha̧ wa war kpɔk ɓɛɛ wa zia kaɗi.

⁴⁶Tɛ o gɔni-duk nɔ‘i mɔka lɛŋ; wa gbo nɛ̀ kɔ̧ ŋga tua-hu̧si-tɛ kɔ-wa nɛ̀ naka-tɛ.

⁴⁷GASA WAN kànà nɛ́ ɛ́nɛ́ ɓɛɛ! Mi tɛ de osoko ha̧ a̧ nɛ̀ duk nɛ́ kam-ta kɔ‘m! Mi tɛ gasi Sɔ̧, wan-kpas'am!

⁴⁸Nɛ́ Sɔ̧ a̧ kifi er ha̧ o wisɛn kɔ‘m; nɛ́ a̧ a̧ e ha̧‘m mɛ ɔ wan zu o dukbíí.

⁴⁹GASA WAN, nɛ́ ɛnɛ'ɛ gbo'm er o wisɛn kɔ‘m; nɛ́ ɛnɛ'ɛ ba'm e ŋgɔn ha̧‘m mɛ gan zu o wi-nas'am; nɛ́ ɛnɛ'ɛ gbo'm er o wi-de-ŋgamɔ.

⁵⁰Mɛ̀ nɛ́ hegɔ sa'm gasi'nɛ́ mgbara o tugun bíí nɛ̀ iŋ‘nɛ na. Mi tɛ bìì gima zɔn nɛ̀ nin'nɛ́ mbɛt.

⁵¹GASA WAN nɛ́ wi-gbak-wannu n'aa ea mɛ gbin biro; a̧ yor ɗoŋ wi n'aa hoka, ɗoŋ David in o bezaŋ-aa hegɔ ɓɔnsɛnɛ.