Read Northwest Gbaya GIMA 31 Bible Online

GIMA 31 - Northwest Gbaya bible

GIMA 31

¹Gima ko David ha̧ wan-duk-zu-gima.

²GASA WAN, nɛ́ sɛn tɛ‘nɛ́ a̧‘m kii fara-hu̧si-tɛ‘m; k’ɛ́nɛ́ e foe yí‘m na, ɛ̀nɛ̀ kpás'am nɛ̀ deemɔ nɛ yuwar-a k’ɛ́nɛ́!

³Ɛ̀nɛ̀ yéŋ zer'nɛ́ pii tɛ‘m, ɛ̀nɛ̀ gbák am bee! Ɛ̀nɛ̀ dúk nɛ́ ta-ɛk-tɛ‘m in ŋga fara-hu̧si-tɛ‘m,

⁴wen ɛ́nɛ́ nɛ́ kam-ta kɔ‘m in fara-hu̧si-tɛ‘m. Ɛ̀nɛ̀ mgbɔ́‘m nɛnɛ wen zu nin'nɛ́, ɓɛɛ ɛ̀nɛ̀ úsí yuwar ha̧‘m.

⁵Ɛ̀nɛ̀ búr pɛ́r ko o wisɛn naŋ-am'i yinɛ wen nɛ́ ɛnɛ'ɛ ha̧ ŋgai ha̧‘m.

⁶Mi e sɔ̧-tɛ‘m kɔ̧ er'nɛ́, wen nɛ́ ɛnɛ'ɛ kpas'am, GASA WAN. Sɔ̧ ko kpasawen,

⁷ɛ́nɛ́ sɛna o wi-ɗafi géé-sɔ̧, ɓɛɛ kɔ‘m, mi e ta nɛ ɛnɛ.

⁸Tortɛ gasa kɔ̧ɔ̧mɔ k’ɛ́nɛ́ tɛ ba'm, ɓɛɛ mi tɛ de nyɛŋɛ. Ɛ́nɛ́ zɔka bɔnɛ kɔ‘m, ɛ́nɛ́ iŋa dita-see kɔ‘m mbɛt,

⁹ɓɛɛ ɛ́nɛ́ e'm er o wisɛn kɔ‘m na; ɛ̀nɛ̀ kpás'am bá‘m e nyaŋan.

¹⁰Ɛ̀nɛ̀ dé ko ha̧‘m, GASA WAN, tɛ̀ ŋgamɔ nɛ̀ dikiɗ‘am’ɛ! Yí‘m fɛŋa tɛ hi̧a̧ kɔ̧a̧, ger-am fara lɛŋ, see-am ŋmana.

¹¹Ɗaŋsee tɛ gbɛ‘m kinii! Ɗoŋ duka-a kɔ‘m nyɛi̧ ɓɔna wen mɔ nɛ̀ ba tɛ‘m’ɛ; mi lɔmgba tɛ bɔnɛ n'am zɔk’ɛ kaɗi, o gba̧a̧-tɛ‘m yɔmba a zu ŋmaa.

¹²O wi-kur-zu'm e'm nɛ̀ mɔɔ-zɛkɛɗi kɔ-wa; o ŋma'm-ŋgai zɔk am hee ŋma ɗaŋmɔ ga sɛn yí-wa, ɓɛɛ o sɛm kɔ‘m yu nɛ‘m mbɛt. O wi nɛ kpa'm zan yu nɛ mɔ;

¹³tɛ bíí bìí ɗoŋ am hee mi fee so fee ga, mi duk mgbara bíí hee ŋma gbàrà-kpánà nɛ̀‘i baa so baa pi̧ taŋ kaɗi ga.

¹⁴Mi zii kànà nɛ́ ɗaŋa wen tɛ‘m nɛ̀ o bíí ɗaŋ nɛ̀ katɛ‘m nɛnɛ; wa mɔi̧a ŋmaa lɛŋ e nú mɛ gbɛ‘m yinɛ kaɗi.

¹⁵GASA WAN, mi e wan ta nɛ̀ ɛnɛ na nde? Mi hee ndé, ɛ́nɛ́ nɛ́ Sɔ̧ kɔ‘m wo!

¹⁶Ŋgimbi duka-a kɔ‘m zu nù'ɛ a̧a̧ er'nɛ́; ɛ̀nɛ̀ gbó‘m yinɛ er o wisɛn kɔ‘m in o wi-nukur'am.

¹⁷Ɛ̀nɛ̀ dé ha̧ sɔnti'nɛ́ mɛ tok zu wi-de-tom k’ɛ́nɛ́; ɛ̀nɛ̀ kpás'am nɛ̀ gasa kɔ̧ɔ̧mɔ k’ɛ́nɛ́.

¹⁸GASA WAN, mi sa nɛ mɔ sitɛ‘nɛ́, ɓɛɛ k’ɛ́nɛ́ e foe yí‘m na! Ɛ̀nɛ̀ pí̧ pi̧i̧ foe zu o wi-ɗaŋ nɔ‘i ha̧ nú-wa mɛ kpe hee fio ga ɛ̧!

¹⁹Ɛ̀nɛ̀ kpé nú o wi-ndela nɔ‘i nɛ tɔ̧ ŋga wen zu o wi-de-mɔ nɛ yuwar-a'i! Gasa-zu in ŋmaŋa-tɛ kɔ-wa nyɛmna!

²⁰Oee gasa demɔ n’ɛnɛ e pɛm nɛ̀ o wi-yu-kíí‘nɛ́ wa, GASA WAN, ɓɛɛ ɛ́nɛ́ de mɔ‘i ha̧ o wi nɛ̀ hu̧si ɗoŋ‘nɛ́, wen ha̧ o bíí zaŋnu lɛŋ mɛ zɔk.

²¹Ɛ́nɛ́ pɛ́m nɛ́ o wi nɛ̀ yu mɔ hu̧si ɗoŋ‘nɛ́ wen ká ɗaŋ baa keta ko o bíí tɛɛ tik zu wa, ɓɛɛ ɛ́nɛ́ pɛm nɛ wa kɔ̧ tua k’ɛ́nɛ́ mɛ wen ká o bíí tɛɛ tɔ̧ ɗaŋ wen a zu wa.

²²Mi de osoko ha̧ GASA WAN wen yora-ɗoŋ-wen kɔ̧-a̧ gɔna ɗɛɗ‘am, sɛn saaye bɔnɛ mɛ!

²³Ŋgimbi nɛ̀ mɔ baa nɛ̀ tɛ‘m, mi tɔ̧ so kɔ‘m ndé, ɛ́nɛ́ pi̧a'm taŋ wó; ɓɛɛ nɛ́ mɔ'ɔ n’ɛnɛ zia aia-nú kɔ‘m ŋgimbi n'am hiɗa nɛ̀ mɔ sitɛ‘nɛ́‘i.

²⁴Ɛ̀nɛ̀ kɔ̧́ GASA WAN, ɛ́nɛ́ o wi-mbo-zu ha̧ a̧ lɛŋ! A̧ nɛ́ wi-pɛm o wi-ndak-pata a̧, ɓɛɛ a̧ nɛ́ wi-kifi-er ha̧ o wi-ŋmaŋ-tɛ.

²⁵Ɛ́nɛ́ o wan-e-ta nɛ̀ GASA WAN lɛŋ, ɛ̀nɛ̀ kpá ŋgai! Ɛ̀nɛ̀ nɔ́ ŋgiɗi!